我始終都係認為Daniel Day-Lewis技高一籌

刊登於 2018-04-09 By 明鏡 All, 書與影評

話說今年嘅奧斯卡猛片，我有興趣嘅唔多，唯一留意嘅係男主角category。喺香港未上《Darkest Hour》之前Gary Oldman已經係影帝大熱門，喺香港一上畫我第一個周末已經走咗去睇。當然，套戲本身精彩絕倫，Gary Oldman扮演嘅Churchill亦像真度極高，我絕對睇唔出有任何問題。不過，要比較，問題永遠喺對手度。Daniel Day-Lewis退休前最後一套戲《Phantom Thread》同樣係今年入圍作品。

雖然我對Daniel Day-Lewis嘅認識有限，佢嘅作品我甚至只係睇過佢喺2012年憑扮演Lincoln技壓絕對夠實力攞影帝嘅《Les Misérables》男主角Hugh Jackman，我個人認為Daniel Day-Lewis嘅絕對係神級演繹。亦因為我對佢嘅演繹太驚嘆，我仲喺網上研究咗一輪咩叫method acting。而Gary Oldman嘅Churchill我並無呢種咁深刻嘅驚艷感，亦即係話如果兩套戲喺同一年對撼，恐怕Gary Oldman會輸得同Hugh Jackman一樣清脆利落。

亦正正係呢個原因，無論幾多人話Gary Oldman今年有幾強，甚至係攞埋Oscar，我仍然係堅持睇埋《Phantom Thread》先再判斷。結果？一如所料，我自己覺得開場頭十秒Mr. Woodcock起身著衫、著襪、著褲、梳頭，一連串動作展現嘅演技已經完勝Churchill。之後Daniel Day-Lewis演繹嘅一個對自己要求極高、甚至係吹毛求疵嘅嚴肅couturier完全係達致說服力嘅極致。中段由不適到卧病在床、頻死嘅幾場戲更加係達到人類嘅極限。後段嘅fashion show嘅演繹同樣令人沉迷，同Raf Simons本人喺紀錄片《Dior and I》入面嘅頂尖時裝設計師喺fashion show嘅舉動完全無分別，再到臨近結尾明知妻子落毒而自願服毒嘅一場戲，完全表達出神級演技，不愧為Time喺2012年所講嘅The Greatest Living Actor，The World’s Greatest Actor。

先利申，我係直至到宜家落手寫呢篇文先上網做少少資料搜集。無論係2012年我認為Daniel Day-Lewis完勝影帝級演繹嘅Hugh Jackman，定係我睇完Gary Oldman嘅Churchill，再到睇完Daniel Day-Lewis嘅Reynolds Woodcock覺得佢仍然完勝Gary Oldman，我都唔知Time曾經話過佢係最偉大演員，雖然我2012年係有呢個感覺。當然，Washington Post嘅影評家Ann Hornaday都有提及Gary Oldman係considered one of the greatest screen actors of his generation。

我要講嘅係，我的確無受過專業演技訓練，雖然我對自己嘅觀察力好有自信，不過我唔排除喺專業演員眼中我係有睇錯演技嘅。我解釋唔到點解我認為Daniel Day-Lewis嘅Reynolds Woodcock完勝Gary Oldman嘅Winston Churchill。勉強要搵個原因嘅話可能係我個人比較prefer subtle, reserved嘅演繹，而唔係expressive “big” acting style。咁啱我早幾個禮拜睇到一位導演Marcus Geduld講點樣睇演技，係值得引用下嘅。

Marcus Geduld係一位Shakespearean director，co-founded咗一個叫Folding Chair Classical Theatre，喺Broadway嘅Circle in the Square theatre assistant-directed Holiday，喺BBC London assistant-directed咗Broken Class。佢嘅講法係：「其實無客觀標準。只係一個個人口味問題。我可以話俾你聽我認為好演技嘅定義，不過如果最後你唔同意我嘅睇法，我嘅經驗唔會令我啱、令你錯，咁只係代表大家口味唔同。」佢喺文章中講咗佢認為好演員嘅五個元素，最後特別提及嘅係，好多觀眾容易因為鍾意一個角色而以為一個演員演得好，又或者因為鍾意、唔鍾意一個演員喺戲外嘅本人，而影響咗佢點睇個角色，呢啲係值得留意嘅。

結論？無結論。我應該搵多幾套Gary Oldman同Daniel Day-Lewis嘅經典作品嚟睇下，學下嘢。吖，其實Alan Rickman嘅遺作都演得好精彩，應該搵多幾套嚟睇。