紅磡隱世大廚的西餐廳Fresco
Photos credit: Che Wong, Fresco facebook page, centamap
我寫過嘅題材唔少，寫餐廳真係第一次。唔係我唔鍾意食好嘢，而係喺香港一個收入唔高嘅年輕人根本無錢去食好嘢。全靠網友美食歷史學家黃邪同爾雅集總編呆總推介，我先有機會試到呢間唔係單單用「物超所值」就可以形容到嘅餐廳。食評唔係我強項，所以呢篇文章除咗會約略提及我哋星期一晚包場食過嘅菜式，之後會再講下有咩因素令呢間餐廳太少客幫襯。
由於我哋係包場，所以係可以試到好多道菜式。先講清楚，其實每道菜都突顯到主廚歐師傅對食材嘅高要求、同佢煮每道菜嘅心機、功夫，不過由於我真係唔係食家，我只會特別為幾道令我驚嘆嘅菜式講多兩句，其他菜式只會略為提及。
冷盤總共有三道，分別係冰鎮鮑魚、冷鎮海蝦、劍魚腩沙律。我個人最欣賞嘅係劍魚腩沙律，真係咬第一啖就眼都突埋，口感特別，味道出色。跟著上嘅係牛肝菌湯配蒜蓉包，兩樣都比平日飲到嘅出色。飲完湯上嘅係西班牙黑毛豬，係我第二個驚嘆位，咬落去完全唔係豬嘅口感，係驚艷級嘅菜式。據呆總引述，歐師傅嘅黑毛豬係同Ritz Carlton爭貨嘅，真係好食到我呢啲外行人難以形容。
黑毛豬之後又係令人驚嘆嘅，仲要係由老闆娘出手嘅燒雞扒，我咬第一啖嘅感覺就係「咦？點解可以做到入面咁淋嘅呢？」而我開口果句係「大鑊，咁我以後點喺大家樂叫雞扒？」因為我唯一會自己煮嘅係雞扒，我真係想向老闆娘偷下師。之後係香草羊架，雖然我好少會自己整羊架，但我都算食得多羊架，所以一咬落去係有被佢極惹味嘅香草味嚇親。羊架之後係香草芝士焗澳洲魔鬼大蝦，同埋歐師傅特別炮製嘅蝦汁意粉。主菜完咗之後仲有柚子青檸蜜同埋紅酒煮梨伴雪糕。
講真，以Fresco set dinner 三百蚊左右，包括餐湯、主菜、飲品、甜品，有咁嘅食材咁嘅功夫真係絕對物超所值，而我哋包場都只係每人五百蚊可以試足十一個item，已經唔係物超所值可以形容。咁點解會唔夠客到老闆曾經考慮過要提早結業呢？
位處何文田B1出口橋底嘅Fresco，就咁睇係有位置唔太顯眼嘅問題。不過，咁只係代表佢難有walk-in客（之後我會講，有walk-in客都唔係好事）。只需要行3分鐘，就係喺家維邨隔離嘅法國國際學校，雖然只有大約320個小學、幼稚園學生，不過已經有25個老師喺度；6分鐘行到去黃埔新邨；7分鐘行到去半島豪庭；行到去黃埔號都只係12分鐘。換句話講，只要marketing做得好，呢個範圍內任何一個住宅項目都足夠支撐Fresco有餘，甚至可以話單係法國國際學校嘅25個老師，連佢哋嘅家人朋友，已經差唔多撐得起間餐廳。
咁點解我話walk-in客唔係好事呢？其實係香港人耐性嘅問題。我聽過當晚唔係第一次嚟食嘅朋友講過，平日嚟食一餐飯都需要三個鐘左右。呆總都講過等餐湯，亦即係牛菌湯，都要等一個鐘。我相信大部分香港人喺平日外出晚飯大概預計喺60～90分鐘內食完，對於一餐長過一套戲嘅晚餐，好少人會喺周末以外嘅日子考慮。而我自己嘅朋友入面，如果係要可以單對單傾到三個鐘計嘅，都係得一個肯定得，一個有機會得。不過，對於情侶約會、幾個朋友聚會嚟講都未至於難以接受。最好彩係咩？香港其實好多外藉人士。對歐洲人嚟講三個鐘嘅晚餐應該幾易接受。只要marketing target得啱人，要坐滿間餐廳唔算難。到時要考慮嘅，就變咗係歐師傅夫妻檔做唔切咁多客…
高人指點
Follow 爾雅集