慘死在女神手上的男角

刊登於 2018-03-08 By 明鏡 All, 書與影評

啱啱大咗結局嘅倉底劇《波士早晨》應該係Ali第一套做第二女主角嘅劇，雖然演技比起2017年就係有啲差距，不過由於角色設定係女神、娘娘，先天太強嘅Ali真係行出嚟已經殺哂，說服力100%。基本上喺劇中嘅角色Roxie已經有機會展現哂Ali唔同嘅吸引力，可愛賣萌、魅力放電、喊、笑都有，我相信唔倉底Ali早兩年已經有資格攞最受歡迎電視女角色獎。不過要強調嘅係，並唔係劇本、角色設定太出色，而係Ali太有吸引力，真係睇佢試衫已經夠精彩。當一個女演員本身太有吸引力，觀眾難免覺得一個由佢演繹嘅角色只有佢可以演繹。如果唔係Ali，換任何一個女演員演Roxie都會出事。

咁當然，睇下題目都知我要講嘅係佢嘅男拍檔Ryan啦。洪永城嘅演技不值一提，角色設定亦唔討好，雖然有Roxie喺中段幫佢解釋佢唔係淨係識鬧人、侮辱人，不過淨係憑佢同女神一pair但又傷透女神心已經罪無可殊。咁當然，養得起女神呢一方面係令人羨慕兼嫉妒嘅…劇情推展到後段，見佢收起Roxie個紙版公仔、又無出賣公司機密，都算係搶番唔少分，拉均嚟講對於唔係心痛女神被傷透嘅人嚟講，其實Ryan都唔算太差。不過，如果呢兩段係重點，我點會寫文？

呢篇文嘅重點係大結局一集嘅Roxie。初段佢同Hazel講嘅「只要我鍾意佢佢又鍾意我，話之佢係殺人犯吖（唔係原對白）」絕對係將女神感覺推上最高峰，應該所有男人都希望有個女人，尤其係靚女，咁同佢講。喺所有人都以為會係happy ending嘅時候，竟然嚟個令人意想不到，甚至係連我都理解唔到嘅twist…Roxie再一次表達佢好想同Ryan生仔，Ryan猶疑完之後應承咗佢，但被Roxie睇出佢唔想生仔…當Roxie直接問佢係咪唔想生仔嘅時候，Ryan無答，而Roxie亦都因為咁而同佢分手…

喂！咁簡直係晴天霹靂喎！唔想生都因為愛你肯同你生都仲要被分手？我理解唔到…好彩現實中無機會被Ali問呢個問題啫，如果喺同一情況下被分手，真係死得好慘…搞到我都唔知應該羨慕被Roxie深愛嘅Ryan定係可憐被分手嘅佢…淨係想像下現實中有可能因為呢個理解唔到嘅原因而被判死刑，我就忍唔住要特別寫呢篇文。我唯一可以講嘅係，好彩我反應會快過Ryan好多…喺呢個情況下會好快答到同Roxie生仔…其實更加好彩嘅係現實中無女神搵呢個問題問我…