拍拖一定唔少得鬧交依個環節

刊登於 2018-03-06 By 毛言地 All, 女人心事

如果你未同你男女朋友鬧過交唔代表係你地感情好好，而係你地跟本唔似拍緊拖。

咩係拍拖？拍拖即係兩個人融入大家嘅生活，接受自己生命當中有多一個人存在，然後試下兩個人一齊行落去。咁兩個個體要一齊生活一定會有衝突，即係好似我之前講嘅食唔食辣，又可能係廁所板放唔放落嚟之類，或者講返個個男人一拍拖都會面對，自己女朋友好鍾意講電話但自己一啲興趣都冇。兩個人相處落有咁多唔同而又唔會鬧交得兩個可能，一係有人死忍難忍緊，一係大家根本唔志在依段感情，冇諗過會同對方長長久久。

冇錯啊，鬧交唔係一個大家鍾意嘅拍拖節目，但我好肯定你想段感情維繫得長就一定唔少得佢。平時大家相處得好地地嗰陣唔會無啦啦去嫌棄對方一啲生活上嘅習慣，肯定係有人做咗對方唔鍾意又或者一而再再而三踩到對方底線嘅事先會有人爆發，將平時有啲咩睇對方唔順眼嘅事講哂出嚟。鬧交嗰下大家只係想將心中不滿講哂出嚟發洩情緒，但咁樣反而可以比大家知道原來喺依段關係當中自己做嘅一啲嘢原來係會影響到對方，或者對方一直唔想自己點樣點樣。正正因為鬧交嗰陣大家都只會講心底話，依個時間先係了解對方諗法嘅最佳時機。到大家冷靜落嚟，其中一方（通常係男）氹返人之後你地感情依舊，同時又可以知道點樣去改善自己本身或者要注意乜嘢細節令到段感情保持得更好。

另一個角度睇，如果唔係關心對方，緊張依一段關係，你或者佢根本唔會哂氣同你去嘈，因為依個舉動代表住你唔想依段關係就咁完結，你想大家可以融入埋一齊生活甚至組織家庭。你會記住佢有咩做得唔好，嘗試去包容佢接受佢嘅生活，到真係接受唔到先講出嚟希望對方可以為你作出改變。你唔覺得無論係包容你又好，想你改變又好，每一個舉動都有愛嘅成份喺入面咩？如果你睇得夠通透，你會發現有一個肯同你鬧交嘅另一半係一件好幸福嘅事，因為你喺佢心入面好重要，佢寧願對住你講哂粗口冇哂儀態都唔想冇咗你。

如果下次你同男女朋友鬧完交，不妨喺平靜好自己之後好好攬住佢同佢講聲多謝：多謝佢肯同你講出心底話、多謝佢冇粒聲唔出就走咗去、多謝佢願意為你地嘅未來而咁激氣。

要搵一個肯同你鬧交嘅人，你估易架？