遲來的2017無線演技大點評

刊登於 2018-03-02 By 明鏡 All, 書與影評, 生活文化

話說無線個公信力成疑嘅萬千星輝頒獎典禮已經過咗唔止成個月，其實事前已經知呢個演技頒獎禮同其他無線嘅音樂頒獎禮、選美比賽一樣，係無咩公信力可言，不過既然Ali係視后熱門之一，咁我無理由事前就數往績預告定個頒獎禮會出咩爭議性賽果嘅。

咁啱新年重播《不懂撒嬌的女人》，就由呢套講起啦。其實我由首播已經好欣賞王浩信同唐詩詠嘅演繹，甚至個人口味我欣賞王浩信嘅Saving仲多過佢做盲俠；而唐詩詠演嘅Cherry亦好感動到我，如果無Ali嘅Never同Paris，我毫無疑問會投佢一票。我絕對唔懷疑唐詩詠嘅演技，甚至喺《四個女仔三個Bar》嘅時候已經好欣賞佢嘅演技，只係我覺得Ali嘅兩個角色都更勝一籌。

既然講開女演員就順便講埋最受歡迎電視女角色。雖然我唔知幾時開始無線會俾一套劇入面多於一個女主角、男主角爭獎，亦唔知喺邊年開始取消咗一個演員多於一個角色入圍爭獎，不過要專業、公平嘅話，呢兩個都唔係合理選擇。無線每年可以做男、女主角嘅演員唔多，其中演技出色到可以爭獎嘅好可能唔止得一套劇出街，就好似今年嘅王浩信同Ali咁，都有兩個角色應該入圍最後五強，自己同自己爭獎。傳統上最受歡迎電視角色獎係視帝、視后嘅替代品，係要嚟俾有實力攞視帝、視后而爭輸嘅演員，所以喺有少數演員憑一個角色包辦兩個獎嘅時候佢哋都會喊哂咁講「我以為攞咗最受歡迎角色，即係攞唔到女主角…」咁個問題喺邊？首先就係定位應該同喺星和攞男配角嘅張振朗一樣嘅蔡思貝到底算唔算係女主角級而唔係女配角級呢個問題，其次就係就算當趙正妹係第二女主角，因為佢完全唔可能係視后熱門，所以根本無可能攞最受歡迎女角色獎（唔好意思Ali，即使你為佢攞獎開心我都係咁講）。至於點解喺宣布得獎者嘅時候唐詩詠會黑面，我嘅睇法係因為唐詩詠都覺得自己無理由攞視后，連最受歡迎女角色都攞唔到即係食白果。

再講番轉頭，唔好以為「爭主角獎熱門」呢個元素唔重要，一直被認為係視帝、視后替代品嘅角色獎如果開放俾其他角色，一來含金量會再下跌，二來亦解釋唔到點解得獎嘅唔係人氣一直同Ali不相伯仲嘅朱千雪，或者我唔係好識欣賞但唔知點解喺網上好受歡迎嘅《降魔的》入面嘅劉佩玥。簡單講，蔡思貝其實係比較適合攞飛躍女演員嘅，當然，同早一年攞飛躍女演員嘅Ali比又…可能差少少。

簡單講，比較折衷嘅方法係唐詩詠憑Cherry攞最受歡迎女角色，Ali憑Paris一角封后。比較合理嘅賽果？Ali憑Paris一角攞最受歡迎女角色再憑Never一角封后，或者調轉。兩個角色對於我嚟講都係咁出色，仲難揀過《天與地》嘅陳豪大戰林保怡。（重申：我唔係Ali fans，只係正常一個好欣賞佢嘅男人，雖然要加少少迷戀，但就好似我迷戀王敏弈同武井咲一樣，睇演技仍然可以比九成九人客觀）

講完女演員就到男演員。正如我所講，王浩信係Saving、盲俠兩個角色都足以爭視帝獎，不過，頒獎禮推遲咗兩個月就真係唔同講法。《誇世代》嘅Ali同《踩過界》嘅Ali係不相伯仲，但《誇世代》嘅陳豪，尤其係最後兩日嘅演技大爆發，毫無疑問地係技壓王浩信，絕對係無線當之無愧嘅第一視帝（張國強無主角做，所以無得爭），所以2017年視帝應該係陳豪，王浩信唯有等多一年，攞最受歡迎男角色獎。

跟著就係唔知點解爭議性好大嘅部分：正如我所講，視帝、視后嘅替代品最受歡迎角色獎係應該由演技、演繹都毫無疑問嘅演員獲得。而馬國明嘅演技，我的確認為不如黎諾懿。尤其係重播《不懂撒嬌的女人》，有睇黎諾懿做賤Han應該唔會唔同意。唔止黎諾懿，同時亦不如《踩過界》嘅張振朗。所以我的確唔明演技明顯不如王浩信嘅馬國明點解會變成視帝大熱門，畢竟視帝、視后獎唔係老人牌講資歷，提名次數夠多就應該攞。咁當然，除非有啲嘢係觀眾隔住個螢幕睇唔到嘅，只有專業演員喺現場拍攝嘅時候先感受到，咁可能唔同。雖然，我唔知道透過螢幕睇唔出嘅演技叫唔叫演技，畢竟我香港、日本、英國、美國嘅頂級演員演繹都睇唔少。

咁當然，作為一個睇過下劇同戲，但無受過專業訓練，本身又唔係演員嘅觀眾，係有啲差異係我唔夠眼力睇得出高低嘅，例如2017年Ali嘅Never同Paris，王浩信嘅Saving同盲俠（我個人認為係Saving），2009年拍但2011年尾先播嘅《天與地》入面嘅陳豪同林保怡（我第二次睇到最尾一集係投俾林保怡，可能第三次睇會投俾陳豪）。但，有啲差異係睇得出嘅，例如上面講嘅Ali vs 唐詩詠、陳豪 vs 王浩信、王浩信 vs 馬國明，同埋2012年奧斯卡嘅Daniel Day-Lewis vs Hugh Jackman。