我眼中的Ali

刊登於 2018-02-27 By 明鏡 All, 人生思考, 生活文化, 香港小故事

話說近期Ali有套三年前拍落嘅舊劇《波士早晨》出街，我見到有facebook page出post問佢同簡淑兒比邊個正啲；又有人話宜家嘅女星不如8、90年代嘅女星咁靚，令我有呢個idea寫下到底我係點睇Ali嘅。

先講外形，身為時裝愛好者嘅我係偏好Ali呢種偏瘦身形嘅，而且佢瘦得嚟真係幾高下，真係著咩衫都靚，我喺《潮流教主》已經留意到。有樣可能無咩人留意嘅，係Ali同陳瀅有場天台戲，陳瀅係一個靚女應該好多人都同意，我由佢個One-day Acuvue廣告已經留意到，不過一拍埋Ali度…我睇就有少少慘不忍睹。所以，被Ali KO嘅年輕靚女演員，點止簡淑兒一個？

除咗完美級嘅model身形，Ali同樣吸引嘅當然係標緻嘅五官同極出色嘅表情，除咗我個人極欣賞嘅賣萌可愛表情，平時拍劇嘅笑容、傷心樣、魅力放電樣都極出色。基本上就算唔計佢嘅視后級演技，淨係做硬照model佢已經魅力沒法擋，企出嚟已經無咩對手。淨係講樣，我係覺得Ali呢位現任無線魅力女王係贏埋上一任魅力女王陳法拉嘅。

我咁講可能有少少失禮，不過Ali最吸引我嘅唔係完美級外形，而係佢本人，即係內在。雖然我未有幸同佢做到好朋友，唔可以話好了解佢，不過不難睇得出佢間中流露出嘅可愛童真，呢種喺20歲出頭都已經難有嘅童真，再加上佢平時表達出嚟對生活、人生嘅理解，係一種完全相反嘅獨立、成熟，忠於自己嘅感受，的確足以令睇到佢呢一面嘅人都視佢為女神。

最後我想用一個有少少離題嘅角度做總結。每一個人都有屬於佢哋嘅年代，就係由佢哋過咗迷茫階段，開始邁向顛峰，直至登頂嘅時期。喺屬於佢哋嘅舞台上不斷學習、不斷進步，就係最光芒四射嘅時候，而時代係屬於佢哋嘅。所以，5、60後難免停留喺佢哋自己嘅、90年代，一個屬於佢哋嘅年代。人，應該活在當下。如果認為宜家嘅女藝人無8、90年代嘅女藝人咁靚，絕對係理解錯誤。我會用呢個例子形容：喺2017年見識過Gal Gadot嘅innocent smile嘅人都會認同佢嘅世界頂級殺傷力。而如果同Gal Gadot一齊出現喺我面前我都仲會話我唔揀Gal Gadot嘅，Ali肯定係香港極少數嘅其中一個。而呢極少數嘅人入面，只有8、90後女藝人，並無8、90年代女藝人。