數，唔係咁找㗎，阿天王

刊登於 2018-02-21 By 明鏡 All, 生活文化, 香港小故事

話說吸金力極強又識享受生活嘅郭天王被人翻舊帳，搵出佢喺94年接受電視訪問嘅時候講話如果佢結婚就全香港市民一人一封利是。當年佢年近30，已經喺台北、新加坡、香港、北京、武漢、深圳開過演唱會。今日佢出嚟話找數，明眼人就知找數同走數之間有好大空間，佢係一如既往地要威要面，其實走精面，可惜香港人一講捐錢就上哂腦，可能同慣咗六四七一捐下錢買咗贖罪券就當為咗守護香港盡咗力作出好大貢獻有關。即係學90後民主女神周庭講：「捐出去嘅錢，等如潑出去嘅水…」又好似職工盟同中國政府咁，總之你捐咗嘅錢你就無得問，你唔好質疑人點用，你質疑就係你錯，你就唔係好人。

先講明，我無諗住收到郭天王封利是，所以我無當係我嘅錢，佢要捐咗筆錢或者捐俾邊個機構唔捐俾邊個機構我係無意見嘅。不過我想問，拍套戲都過千萬片酬嘅郭天王平時派開幾錢利是？

據我所知，無線出名人工低，底薪萬幾嘅新晉演員都要攞五位數字出嚟派利是，斷估都唔係封緊十蚊封利是；搵到下錢嘅都派六位數利是，求其上網搵下都見到阿Bob林盛斌、薛家燕、王祖藍甚至廖碧兒都派六個位，唔係無線嘅G.E.M.同Chilam同樣派六個位，斷估都真係無一封得廿蚊咁少，可能最少五十蚊封，咁二千封以上先啱啱好有六個位。咁出道到宜家開過過百場演唱會、曾經經歷過出隻CD賣幾白金、宜家拍套電影八位數字片酬嘅郭天王，講真你話佢派利是唔係一百蚊起跳都無人信。唔係講緊公司同事、助手，係講緊派俾看更、餐廳侍應，入馬場派俾工作人員，都起碼一舊水起跳。

雖然據外國網站推斷佢係四大天王身家最豐厚嘅一個，不過我哋就下人，唔好要佢照平時習慣嘅一百蚊封利是起跳喇，當佢同啲派六位數字利是，樓都唔知買得起未，唔好話超跑，跑車都無架嘅後輩一樣，五十蚊封利是起跳啦。阿天王，你要找數，代全香港市民捐錢，麻煩你折實將七百四十萬人每人五十蚊利是，即係三億七千萬捐出嚟找數吖。

聽聞佢身家起碼廿億以上，淨係啲超跑都值兩億。其實無嘅，係人都知佢唔會捐三億七，甚至每人廿蚊嘅億五都唔會捐出嚟。其實無嘅，低低地認句自己廿八、九歲人講嘢唔經大腦，咪唔洗扮找數囉。