轉工唔會幫你搵返團火

cc photo by flickr user Sunghwan Yoon

或者好多人喺返第一份工嘅第一日都會好似我咁雄心壯志:我要好好發揮自己,我要喺公司出人頭地。覺得只要肯學肯做,一定可以升職加薪,幾年後未必大富大貴,但起碼一星期出街食兩三次飯唔洗睇價錢,一年飛兩三轉都冇問題。

但原來現實同你嘅理想真係有好大出入。

或者你個位係PR、MKT、HR,但你發現大家做嘅嘢其實差唔多,都係幫同事影下印,睇下Email咁,又或者係做跑腿送信入票。你曾經諗住喺公司將學校學到嘅嘢應用出嚟,好似係幫公司搞場好成功嘅宣傳、喺大客手上拎到一張合約、幫公司好好控制住個支出成本咁。但原來你讀咁多書學咁多嘢,到頭來做嘅嘢可能一啲關係都冇,你唔明點解用部影印機都要大學畢業,你唔知上堂學過嘅嘢幾時應用過喺公司度,結果返工唔係影印送件就係上網睇新聞。幾個月之後你即刻遞信,希望可以喺下一間公司繼續你本來嘅夢。

但你轉完工會發現,除咗返工地點同同事變咗之外,情況可能同之前份工一樣,甚至更差。

我記得我第一份工之所以會走,係因為我覺得自己浪費緊生命:每日返去冇咩嘢做,睇下Email之後就係咁睇新聞睇到夠鐘食飯,然後玩下電話碌下Facebook直到收工。我想要嘅生活唔係咁,我唔希望自己好似個廢柴一樣,所以有一日返到去之後我冇再睇新聞,而係打咗封辭職信,然後等老闆一返嚟就同佢講唔做。結果而家轉到第三份工我得到啲乜?就係今日老闆叫我寫封公司嘅「自薦信」,然後搵下唔同公司嘅Email,毫無目的咁Send出去「尋求合作機會」。

聽落同轉工求變一樣好笑。

其實比起份工,磨滅團火更多時候係自己造成。可能份工真係好悶,但其實搵工都係為出糧,點解唔將團火放喺自己真正興趣?Kobe可以為咗練波凌晨四點開始訓練,因為佢對籃球,對贏都有團火;咁我地係咪可以用返工冇嘢做段時間或者放工之後去繼續做自己有興趣嘅嘢?正如我十一點幾仲會寫嘢,有人仲為渣馬練緊跑。係啊,放工好攰好想抖,但自己嘅興趣就應該要堅持,而團火就係比你喺想放棄嘅時候咬實牙關撐過去,唔係你咁堅持團火嚟做乜?又或者你對份工真係有興趣,但硬係做唔到你想做嘅範圍,咁係因為你仲係新人,冇理由你試用未過就比單大嘢你跟。你轉工情況都係一樣,乜都要重新嚟過,又係由影印開始,咁嘅轉工有意義咩?

團火應該用喺有興趣嘅方向,而一搵到依個方向就應該靠團火去行過一開頭依段最辛苦嘅路。或者有一日你可以將興趣變成事業,又或者你終於可以喺公司一展所長,發揮你嘅價值。夢、希望、願景個個都識講,但識唔識一邊保持團火,一邊靠佢實現夢想,依件先係最重要嘅事。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments