如果我同你飲手工啤

刊登於 2018-01-15 By 毛言地 All, 人生思考, 生活文化, 酒+咖啡, 飲飲食食, 香港小故事

有段時間，我好鐘意飲手工啤。

一嚟支持本土品牌，二嚟真係幾好飲。雖然比普通一街都係嘅啤酒貴一截，但如果係同老友又或者一班啱Channel嘅人邊摸酒杯底邊傾下計，飲兩三支已經夠我過成晚，分分鐘平過去酒吧劈過你死我活。

冇錯，對我嚟講飲咩酒好睇同咩人同咩場合。有啲人只可以同佢飲手工啤飲威士忌飲Cocktail，因為一坐低我地會係傾多過飲，有啲係好耐冇見嘅朋友、有啲係寫嘢而識嘅文人、有啲出嚟係為咗訴苦。唔同人有唔同話題，但都離唔開真係交心，講嘅每一句說話大家都會聽入耳，或者係輪流交換意見。如果你掛住飲你根本冇可能理解地人地講乜，亦失去咗飲兩杯嘅原意。

至於有幾班人我同佢地出親嚟都只會劈。一坐低就叫一Set或者一個塔，骰盎啤牌咩都玩齊飲到入廁所嘔完出嚟再飲都試過。唔係同佢地冇計傾，不過總有人飲酒係為狂歡盡興，而我只係咁啱兩種都冇問題。喺依個時候唔好同我講認真嘢或者問咩意見，我只會拎個骰盎埋你面前，然後問你「大話定Lucky」。入鄉總要隨俗，唔好搞串人地個party。

至於點解我有一排會鍾情手工啤？因為嗰陣我覺得自己多嘢諗到只想靜靜地坐低拎住支啤酒，然後一邊飲一邊訴苦。我想同人講我擔心嘅事、我想話比人知我有咩唔開心、我想有人同我一齊望下我望唔清嘅未來。只不過每次出到嚟唔係對面自動就同我訴苦先，就係我唔想自己嘅情緒影響到佢，最後又變咗閒話家常。結果酒水就飲哂，苦水照舊吐唔到出嚟。所以話顧人感受可以係一個人嘅缺點。

如果有一日我約你出嚟飲手工啤，可能其實我真係好多嘢想講，而我只係等你講一句「有咩事講嚟聽吓」。

不過如果我約你去何蘭正就除外，因為我純粹想試下佢啲小食，聽講好好味。美食當前，個個人都係開心嘅。