新一代最受歡迎女歌手 — 重新認識許靖韻

刊登於 2017-11-21 By 明鏡 All, 生活文化, 音樂分享

今年七月，我喺facebook度見到一段video，歌手叫「小背心」，唱《逼得太緊》。因為幾養眼，我就好自然click咗入去聽啦…跟著發覺出奇地好聽喎，咁就好自然click入去個page聽多幾首啦。第一晚聽嘅結論係：「喂！我鍾意聽佢唱吳雨霏多過吳雨霏喎，佢唱連詩雅多過連詩雅本人喎！」咁神奇嘅？無啦啦去邊搵個咁嘅聲靚、青春、身形有睇頭嘅女仔？

後來我就睇到有人話係許靖韻嚟，咁件事就嚴重喇！點解？因為許靖韻出度果年其實我係有留意過：「喂，呢個𡃁妹個樣都唔錯喎！」之後？無喇。對佢有咩歌完全無印象，佢唱唔唱得都完全無印象。咁代表咩？Marketing有問題囉。喂，如果個女歌手，仲要係有樣嘅女歌手，佢間公司無辦法將佢推到係人都知，咁間公司好大責任㗎喎…

之後，我再認真聽一次佢cover過嘅歌，仲特登唔望條片淨係聽，以確保無受視覺影響。雖然未有近年最唱得嘅實力派女歌手咁唱得，甚至比起同樣有喺youtube cover其他歌手嘅官恩娜同陳僖儀都有距離，不過其實小背心真係唱得好過唔少女歌手，包括攞唔少獎嘅女歌手。之後無幾耐就到許靖韻推出新歌《琢磨》，我睇完個MV的確覺得佢唱得兼睇得，絕對好過九十年代中出道嘅幾位七十後天后。

最神奇係咩？無論係Facebook page定youtube channel，小背心嘅page like/subscriber喺短短兩、三個月就追過咗許靖韻本身儲咗幾年嘅page like、subscriber，咁證明佢公司嘅marketing真係出咗好大問題。最重要係咩？許靖韻本身係一個靚女。咁當然，同公司嚟講，佢無梁洛施咁靚，都無湯怡咁靚，但佢的而且確算係一個靚女，亦即係話佢唔係需要唔出樣先紅得起。喂，你話容祖兒唔出樣會紅啲咁當然好合理啦，但宜家係個個樣無問題、而且算係靚女嘅女歌手喎。嗱，再數落去就會質疑佢公司捧人嘅往績㗎喇，都係唔好數喇…

簡單講，許靖韻唱功方面仲有唔少進步空間，比起實力派嘅幾位係有差距，不過都係屬於實力派，亦即係比非實力派嘅好太多；而外形方面就超哂班，其實唔止實力派，數埋偶像派都無咩對手。講真，要搵唱功同樣同時比佢出色嘅，已經要數到官恩娜（雖然同樣唔係好紅…）

好，講多無謂，自己睇片啦。小背心喺E-Max開演唱會嘅live：

高人指點

comments

highlight, 音樂