Ali攞視后其實唔算爆冷

刊登於 2017-10-30 By 明鏡 All, 書與影評

所有圖片來自Ali Facebook

係我衰嘅，睇完《踩過界》都唔寫文，我真係唔敢話宜家自己仲有清晰記憶去寫Ali嘅演繹。正如舊年Ali攞飛躍之後我寫文講一樣，我對佢嘅信心仲大過佢自己。雖然我唔係業內人士，都叫睇過唔少日本、英國嘅電視劇同電影，甚至法國、德國電影都有接觸過，咩叫演技好、演繹出色都仲識分嘅。

Ali其實好擅長掌握角色，即使係同佢本人性格差距比較大嘅角色。其實演員需要嘅係觀察力同思考能力，咁先對掌握角色有幫助，呢個可能就係佢有天份仲要進步明顯嘅原因。

講番Never Wong王勵凡一角，其實絕對唔易演。一開始嘅魅力非凡、夜場女王本身就無人做到佢嘅效果，再加上高中prefect嘅純情look contrast，之後嘅極專業、聰明絕頂方面，後期嘅感性、純真，認為佢唔係視后級真係太低估佢。正如我上一篇文講，無線嘅御用情婦唔少，有本事演繹魅力型角色嘅女演員，由胡定欣到陳法拉、朱慧敏，雖然淨係講呢部分我都仍然認為三位都唔會演繹得有Ali咁好，不過計埋其他方面就差得更加遠。先講專業形象，朱慧敏嘅事務律師無咩法庭戲，不過陳法拉同胡定欣分別都做過大律師角色，感覺同Ali嘅演繹差好遠。純情方面就好似得法拉仲算有說服力，雖然要著番套校服扮中六好似牽強少少。感性方面的確算係四位女演員都做到，畢竟如果女演員連呢樣都做唔到應該都無咩演技可言。不過，咁啱另外三位喺性格方面都有不同程度嘅男性化，你只要回想下某部分嘅場景由Ali演繹，如果換咗另外三位效果會幾奇怪，就知點解Ali絕對係實至名歸嘅視后：例如Never坐喺自己屋企張梳化度拎住杯紅酒；Never 學自衛術；Never 同 Hopeman雨中跳舞；甚至係Never 同 Hopeman嘅(差少少)床戲場景。最後當然不得不提，同演技無關，純真自然嘅笑容。Ali本人嘅純真笑容、特別吸引人嘅可愛，令Never更加豐富、更加立體。

其實Ali的確係每一個角色都有唔同嘅演繹，成功展現到每個角色嘅性格。我無喺佢演繹其他角色嘅時候見到屬於Ali嘅笑容，所以，Never喺呢一方面都算係一個突破？咁當然，Ali值得憑Never Wong攞視后，又唔代表返到香港喺主場會攞到視后嘅。頒獎禮大家都睇唔少，唔係話角色演釋得最好就攞到獎嘅…雖然唔係大熱，但我唔會用爆冷嚟形容佢攞獎。不過話時話，無線嘅劇本，下一個重戲份又夠立體嘅角色真係唔知要等幾耐…

重申：我唔係一個fans，雖然我有被Ali嘅吸引力影響，但呢份偏愛唔足以影響我嘅分析。

最後，以我想對Ali講嘅做總結：加油！相信自己，and stay true to your heart！對我嚟講，你嘅內在美比無對手嘅外在美更有吸引力。I like you as who you are！