「你放咗工仲有咩做?」

cc photo by flickr user Hendrik Wieduwilt

依條係噚晚我同爾雅集呆總食飯嗰陣佢問我嘅問題(大約意思啦下)。老實講,我有一秒疾咗疾。

係喎,我而家放咗工有咩做?

我答佢都係打下機寫下嘢耐唔耐同朋友出去食個飯咁,我想答多啲架,不過我又好似真係冇咩節目啦喎,上次去酒吧已經講緊上兩個月。諗返起IVE嘅多姿多彩,諗返以前係出街出到一個禮拜唔知有冇一晚會喺屋企食飯,而家嘅我原來又變返一個宅男。

唔係我唔想搵節目啊,身邊朋友忙返工嘅返工,要拍拖嘅拍拖,食餐飯都難,一講到落酒吧?「聽朝返九點」係標準答案。有幾個交心嘅朋友同佢WhatsApp係幾個月之前。搵食嘛,想好似以前咁成日得閒無事出嚟食飯行街?依個諗法太奢侈。以前返學好羨慕啲大人出嚟做嘢搵錢之後放工一大班同事朋友食飯酒吧嘻嘻哈哈又一晚,結果到自己出嚟做嘢先知道同事唔一定係朋友,朋友唔一定有時間,TVB嘅妙手仁心係好睇,但香港啲醫生點會咁得閒?

拍拖係困身,但要Kill Time真係一流,若果你女朋友痴身小小,就算朋友有飯局你都唔得閒參與。不過現實邊有咁多飯局比你出席吖,你出街食飯見到啲廿五六以上等位通常都係一男一女。有邊個肯出嚟做嘢之後仲花咁多時間喺你身上?咪你男女朋友。所以你唔怪得個個都咁恨拍拖,與其晚晚自己一個岸鳩鳩唔知做乜,有個人陪下自己係好啲嘅,真唔真愛,理得你咩。

食完飯,呆總提議過近近地諾士佛臺飲返杯 (編按:嗱我建議毛哥去飲杯嘢去結識烏克蘭女子),不過今次係我托佢手肘。理由唔係我要返九點,而係呆總依啲工作狂,我唔好意思要佢扔低手頭上啲文件太耐。最後我地去食咗個雪花冰,十二點前完場,我走嗰陣都未有N巴出沒。

幾年前?我出完街唔係N巴就要搭的士。你問我邊架巴士去邊,我淨係識講前面有N字嗰啲。

到咗今日返工,呆總FB INBOX我問我有冇興趣星期五又食個飯,今次會多個人。「新界架,近你啊喂」,噚晚講過我啲EX住邊,佢話服咗我。

「我未放低」我咁答佢。

係啊,我好悶。但拍拖為Kill Time,我接受唔到。或者因為我懶,我想一追就追個啱嘅。

「不過食飯我就得」我補咗一句。只係時間夾唔到,又要下次。

放咗工,連想搵啲嘢做都咁困難。

毛言地

你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」。Fanpiece: http://women.fanpiece.com/moyinday/

More Posts - Website

Follow Me:
Facebook

高人指點

comments