慶祝買到演唱會飛兼新歌派台：周國賢〈在天之靈〉
社交網絡久唔久都會有啲唔知咩最想邊個歌手上紅館嘅帖文，你問我，答案一定係周國賢。2004年出道，十三年間代表作多到十隻手指數唔晒，中間因為不同原因幾次退出再復出，喺2015年終於正式回歸樂壇。講唱功，佢絕對算不上係好好，但佢就係有一種特別嘅感染力，加上冇得輸嘅外表，贏晒。最近佢宣佈將會喺12月喺麥花臣開演唱會，隨即引起一陣哄動同撲飛熱潮，兩場演唱會喺一個鐘內賣晒要加開一場「平息民怨」，而幾乎喺同一時間，佢亦都推出咗佢今年嘅第一首新歌〈在天之靈〉。
根據周爸爸同填詞人黃偉文所講，〈在天之靈〉係向一眾曾經用心去保護過、捍衛過、愛過香港呢個地方嘅列祖列宗們致敬。首歌分為兩部份，第一部份比較抒情，以重讀前人留下嘅字句同事蹟、抬頭想像天上星星係前人幻化成嘅精靈去守護住我哋，去抒發對前人嘅懷念。第二部份就係情緒嘅爆發，前人離開，後人如常生活，努力讀書、發奮圖強，但係得唔到應有回報，身邊上位嘅盡是小人禽獸。第二部嘅歌詞非常直白，歌詞直指香港依家各種各樣嘅情況—回歸後政制法治民生倒退、國民教育、科技發達令人人變成網絡判官鍵盤戰士、網絡欺凌、土地問題等等。已經嘩嘩聲？仲未算。最最最犀利嘅兩句歌詞係「聽講所有撕裂 搞show可以補救」同埋「回家post個嬲嬲足夠」，完全係直指777講嘅修補撕裂同仲做緊政務司司長時搞嘅維穩show，仲有689嘅「呃嬲」Facebook posts！試問有邊個歌星夠膽唱出口？唯有周國賢！
其實〈在天之靈〉呢首歌同爸爸x Wyman嘅前作〈今生不回家〉一樣，都係兩位寫俾香港嘅情歌。佢哋兩個一個其實有紐西蘭同加拿大國籍，隨時可以話走就走兼一去不返，另一個則多次放棄咗可以申請離開嘅機會，都要留喺呢個地方，盡佢哋能力發聲守護呢個家，唔係愛係咩？所以好認同爸爸嘅講法，〈在天之靈〉嘅情其實比普通情歌更甚，因為佢所寫緊嘅係對呢個地球上只係得一點嘅地方同埋為呢個地方付出咗好多嘅前人們嘅愛。
高人指點
Follow 爾雅集