初哥學人寫碟評終於返嚟喇:糯米糰《別急著說愛我到天長地久》-向八十年代致敬

唔知大家有冇聽過糯米糰?唔係食得嗰啲,佢哋係一隊台灣樂隊。冇聽過?咁有冇聽過一首歌叫〈巴黎草莓〉?係咪即刻覺得個歌名有啲熟?呢首歌正正是出自呢隊樂隊嘅手筆,當年糯米糰就係憑呢首歌紅遍中港台,唔少大牌歌手例如許茹芸都翻唱過。屈指一算,原來呢首歌都已經係17年前嘅作品。當年筆者都仲係高小/初中,嗰時已經好鐘意首歌,到依家間唔時都仲會開嚟聽,輕鬆嘅曲風令人每次聽都會覺得好放鬆好舒服。如果你要我揀我呢世人聽過嘅好歌,呢首絕對榜上有名。

不過糯米糰自2004年最後一次公開演出之後,就完全停止公開活動,成員們都各自投入幕後工作,只係得主音馬念先偶爾會喺幕前亮吓相咁。而當每次被問到幾時會再合體出碟,佢都係話冇咁嘅計劃,叫一眾粉絲好不失望。不過去到今年嘅三月,答案終於出現咗變化,相隔14年之後佢哋終於宣佈喺4月推出全新EP《別急著說愛我到天長地久》,仲派咗首featuring王若琳嘅〈長白襪上〉,mv大玩向上世紀武俠片致敬嘅fu,令人開始期待究竟《別急著說愛我到天長地久》呢隻ep會係咩葫蘆賣咩藥。

Tracklist:
別急著說妳愛我到天長地久
喬治克隆人
趕快打電話
第一次想妳的感覺
黃金單身漢
長白襪上

就咁睇個唱片封面,都大概估到呢隻ep係走復古風。冇錯,成隻碟你都唔難搵到八十年代音樂同文化嘅痕跡。第一首歌〈別急著說愛我到天長地久〉已經係一陣濃濃嘅八十年代跳舞音樂味道,令人一種想聞歌起舞嘅感覺,加上馬念先貼地抵死嘅歌詞,聽過一次之後都已經可以琅琅上口跟住唱。

〈喬治克隆人〉同〈趕快打電話〉則有啲David Bowie同Prince嘅感覺。前者歌詞係講型佬George Clooney嘅狂粉,狂粉到要瘋狂複製佢嘅一切甚至成為佢嘅複製人,chorus入面嘅歌詞「我要Clone你」就巧妙地運用咗Clooney嘅諧音。緊接嘅〈第一次想妳的感覺〉一聽前奏就知道係向八十年代嘅ballad致敬,仲有啲令我諗起當年張智霖同許秋怡首〈現代愛情故事〉𠻹。之後嘅〈黃金單身漢〉根本就係一首八十年代嘅disco music,成首歌勁有畫面,一路聽腦海一路有個畫面就係一個爆炸頭著住一套金色戰衣喇叭褲喺個銀色disco波下面指天篤地。

全隻ep最後一首歌就係派台歌〈長白襪上〉。首歌一聽就知係擺明向上世紀武俠片嘅主題曲致敬,糯米糰自己都表示其實呢首歌係以電視劇《長白山上》主題曲為靈感來源,而歌詞裡面嘅「長白襪上有三條槓」明顯講緊八十年代由各路猛人著紅嘅adidas,再加上王若琳玩味獻聲,為呢隻向八十年代致敬嘅企劃畫上完美句號。

(筆者後記)
其實呢隻ep早喺4月已經推出,因咩解救我依家先寫?說來慚愧,我喺香港完全搵唔到呢隻碟嘅實物,就算喺網上亦都唔係咁容易搵得到(之前只係得kkbox有而我並非用戶),於是搵咗一排我就放棄咗,直到最近終於喺Spotify同百度音樂見到,立刻收聽,果然冇令我失望。之後呢隻ep就成為咗我日常play list嘅一部份,每朝返工途中聽一聽,格外醒神,索一索,舒筋活絡。所以話,糯米糰出品,必屬佳品。

vivien@vivien.com'

Vivien Lam

(Editor's comment: writer with good taste in music)

More Posts

Follow Me:
Facebook

高人指點

comments