狀元讀醫又點會有問題

cc photo by flickr user Hamza Butt

話說香港嚟講,讀咩都可以揸兜就係人都知嘅,不過連讀法律都可以窮就未必好多人知。咁啱呢,醫科就係少數由做實習直至到考到專科為止家庭背景都唔係好重要嘅行業之一,之後私人執業就梗係要有客底啦。咁唔讀醫唔通讀Global Business就叫造福社會咩…

好喇,點解連讀法律都可以窮呢?首先,如果你想做大律師,喺你做見習跟師傅果年係無人工嘅,即係你有一年要靠人養。出師後就要自己喺Chambers租房,租唔起就要租枱。記住喎,大律師唔可以直接同客傾,要經事務律師,或者你自己請個師爺。師爺就梗係你負責出糧啦,咁事務律師你一無戰績二無後台,你唔請人飲下靚酒打下關係做咩要彈客俾你?貪你個髮型後現代?所以,有唔少年輕大狀要做兼職幫補下租枱費。亦都所以有人唔做大狀走去做補習…梗係個後台唔夠客啦,唔通因爲佢口才好得罪哂啲客咩?定係因為佢讀完數學22歲人先學人襯墟去讀法律?唔通讀醫係跟風,讀法律係自由意志、想維護公義、想幫人好偉大,讀完唔做係因為突然又唔偉大、世界無公義咩?咁做娛樂圈又係為咩呢?肯定唔係因爲生得靚仔唔俾人望下係香港人嘅損失啦;屋企咁有錢一定唔係貪有免費髮型師啦;唔通係貪有挑戰性,想示範下唔睇得、一開口又得罪人都可以撈得掂娛樂圈?定係其實因為自己係大情聖,專登做醜角襯托起自己個港姐前女友?咁呢樣又真係幾成功,前女友嘅形象喺對比下真係直線標升。講緊讀醫無成就,做律師又無成就,我希望佢人生最大嘅成就唔係有個女友做咗港姐,之後撇咗佢啦。話時話,10A係唔包眼光嘅。唔知同某人拍過拖會唔會係狀元人生污點呢?不過,人格可以同陳雲相題並論都係一種特點嚟,都值得自豪嘅。

咁事務律師又如何呢?咪同i-bank一樣,你老豆無幾十億身家,無成班uncle等住俾生意你,city firm做咩要請你?你咪等做local firm囉。我就見過中年事務律師拎住美心西餅拉客兼賣埋MPF…咁當然,local firm都有大嘅,人工我就唔知喇。

另外,其實高考年代的確無咁多人讀醫,因為考完會考唔係去咗英國、美國讀名牌大學,就拔咗尖,根本無考高考。至於我果屆我果間名校呢,就三個10A狀元都唔係讀醫嘅,而且三個都無考高考,仲好似三個都係去美國Top 10大學升學嘅添。9A有一位就係攞獎學金拔尖入港大讀醫嘅…至於所謂地區名校我就唔知喇,我係唔知十幾年前無「地區名校」呢樣嘢,定係對名校嚟講呢樣嘢不嬲都係笑話,無人聽過。多A入U率高嘅學校就有聽過嘅,恆商囉~咁點解宜家好似個個都留港讀U?可能係因為外國唔承認DSE學歷,DSE嘅grade又唔等同GCSE或者AL嘅grade。

咁咩叫對社會有貢獻呢?從政?係人都知喺香港從政唔洗識字㗎啦,讀書多仲對從政無幫助添,你睇下法律系副教授?再睇下愛國左膠靈童?讀咩話?公開大學?仲要喺香港特首要無政治背景添,你睇下某主席愛國一生都輪唔到。最特別係咩?三個特首有兩個入唔到大學,淨番果個係老豆有錢先可以去英國讀三流大學。最神奇係咩?原來講得出揀邊科代表有無獨立思維呢樣咁無邏輯嘅嘢都可以係牛津數學系畢業,做過下大狀,有錢真好。香港人近兩年學到咩?做大狀唔洗邏輯囉…除咗大狀黨前揸旗人同現任法律界代表,宜家加多過前大狀。

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments