我係一個好中意玩Henna嘅男仔

圖片來源:作者

Henna人體繪畫源於印度,係一種用henna花提取其汁液而製成嘅顏料。henna本來係印度女仔結婚時嘅打扮之一,由於上至額頭下至腳指都會畫上henna,所以出嫁嘅女仔會搵埋其他姐妹幫手畫Henna。而且印度女仔一生之中可能只有呢個時候攞正牌唔洗做家務,因為畫完henna 係郁得越少上色越靚,最好唔好郁到皮膚同肌肉。

筆者係個好喜歡玩henna嘅男生。第一次認識henna係見到網上有個女仔畫得好靚,而當咁啱要幫一間畫室搞活動,所以就冒昧邀請左呢位女仔黎畫室搞henna workshop。佢第一次黎我就比左兩隻手嘅第一次佢,一隻手畫左個有羽毛嘅指南針,一隻手就寫左句金句。真係好靚!你話我中二病又好,貪靚又好,我已經中意左henna呢樣野。Henna基本上係無得改,亦都無得起稿,一揮而就,就好似做人都無得返轉頭咁,我諗當時我就係比呢種刺激感吸引左 (須知道純天然印度henna可以維持一個月,上色後洗唔甩)。

除此之外,henna對我黎講係一種好直接嘅抒發,畫嘅時候要心無雜念,全神灌注落個圖案到,然後成個人會好平靜。另外平時返工放工都無咩心機再開壇畫Acrylic painting,就算我有玩刮畫,成日刮都會傷眼。相反畫henna一攞上手就可以開始,自己身體就係一張畫布,任何時候任何地方都可以畫:我試過搭巴士畫、等車畫、開會悶又畫兩筆,等緊捐血又畫兩筆。嗰種隨心隨性同無拘無束嘅感覺,係令我由黑板嘅生活暫時跳到去另一個空間咁,所以每次畫完都覺得好治癒。

畫左一段時間之後,開始有唔少人問我會唔會去擺市集,我多數劈頭第一句就話:「唔會」。之前試過因為要幫朋友,本著撐場嘅身份去過一次擺檔,的確,就算自由定價都搵唔少。但我唔明點解香港人會將所有野都即時同錢拉上關係。就好似寫文,有人話我知某平台有固定稿費;玩手作,親戚見我整得靚,就問我想唔想做下小生意;亦都有市集主動聯絡過我叫我擺檔;咖啡都有人試過叫我擺檔。但係咪香港地就一定要樣樣野同錢掛帥?我每樣興趣都會花少少時間研究,唔想只係停留入門階段,因為唔深入到一定程度根本唔會了解嗰樣事物嘅本質,三分鐘熱度係無可能了解到一樣興趣嘅趣味。但如果將興趣同錢拉上興趣,成件事對我黎講就完全失去義意,反而會變成壓力來源,而且事倍功半,根本做唔好。我中七班主任講過一句說話好影響我:「教人係你要響嗰個範疇高過被教嘅人好多好多倍你先好諗個『教』字。」

最後一個我中意畫henna嘅原因係人。雖然成日畀人話我畫henna係為識女女,但呢個完全唔係事實啊……就好似,有人用相機記錄大自然嘅美麗,或者另一伴嘅美態;有人用油畫表達佢對事物嘅觸覺同顏色嘅感知;有人會用文字雕刻心入面嘅感受;而我會選擇henna。你諗下自己幾耐無試過坐定定同一個人傾計傾幾十分鐘?畫henna嘅時候我師可以好好享受人同人之間嘅交流,所以如果被畫嘅人完全唔出聲我就會求其收筆唔想畫。但大部份時間都可以同朋友好好咁傾下計,而最後嘅henna完成品就好係一個印記,呢個印記會隨住時間而消退,但印記背後經歷過嘅時、地、人、事係唔會消失,每一次睇返啲相,見到自己作品嘅時候都會勾起好多回憶同情感,無論開心定唔開心都會隨之而湧現。Henna嘅美,除左線條上,更重要嘅係精神上嘅美。

goldfish@uncle.com'

金魚大叔

不懂寫作, 更不會用言語表情流露, 只想用文字刻劃自己的感覺。

More Posts

Follow Me:
Facebook

高人指點

comments