悶聲發大財永遠無錯

cc photo by flickr user Hamza Butt

機師有錢有女攬,是常識吧。所以二副機師因為一篇飛機文同攬女相,慘被網民起底「批鬥」,確係幾不可思議。但諗深層,搞成咁其實又冇乜咁出奇。

分享下個人嘅飛行經歷、本身仲要係私人post,寫啲咩講啲咩似乎同外人冇咩關係。問題係,Facebook本來就係社交網站,所謂「私人post」其實即係朋友間嘅「公開post」,只不過係另類形式嘅「公開分享」。而機師忽略咗,擁有優勢本身係冇錯,但公開「曬命」喺唔少人眼中就係錯(雖然呢件事係唔合理)。

機師本人出文話從來都冇「炫耀」呢個諗法,可能係真嘅,但係咪炫耀從來唔係由自己判斷,而係人哋產生嘅主觀感覺。譬如富二代走出嚟話:「我最近又買咗架林寶堅尼。」句子本身可能只係陳述事實,但只要聽者覺得有炫耀成份,就算言者本身冇炫耀心態亦都百口莫辯。

更何況,人喺描述個人經歷嘅時候,往往有意無意間會美化或者修飾細節,好容易會變成「吹大咗」。吹大咗,即係有漏洞;有漏洞,就易俾有心人有位入。所以或者成件事,根本就係有同事或者「朋友」眼紅,借「吹大咗」呢個漏洞將小事化大,點知結果一發不可收拾。

「吃不到嘅葡萄係酸嘅」,無關攬嘅女仔身份係咩、亦無關你的樣子如何,要酸嘅人總會有酸嘅理由。曬葡萄絕對無錯,但既然阻止唔到有人會覺得酸嘅可能,唯有收埋啲葡萄。俗語話:悶聲發大財。悶聲攬女,其實都係一種智慧。

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments