想冇手尾跟?千祈咪同呢種人做愛……

A couple making love in a room. Gouache painting.
Credit: Wellcome Library, London.
CC BY 4.0

做愛做嘅事係人之常情,而要點樣做、同邊個做甚至喺邊度做,任何一樣都係個人嘅選擇,外人無權干涉。但如果可以嘅話,特別係女士千祈要小心一種人,寧願得唔到佢嘅喜愛都唔好同佢做愛。

就係做愛嗰時鍾意影相嘅人。

為你留倩影、紀念愛嘅一刻、想學下做攝影師、分心等唔好咁快射諸如此類……要講嘅話幾百萬個理由都有。不過正所謂:做愛時影相嘅理由有好多種,但幾乎種種都可能令你嘅身體俾人收睇。因為你永遠唔知呢堆留咗喺手機或者相機入面嘅虛擬數據,會唔會有日流出咗喺網絡嘅虛擬世界。

可能只係唔小心,又或者唔知點解由小圈子傳咗出大圈子,甚至因為壞機——相信直至今日,大家都仲記得某個/堆藝人——只要係影低咗相,就一定有流出嘅機率。更加唔好提部份影相嘅人,本來就係想同人晒命炫耀、一開始就存心偷影,咁樣流出嘅機會率自然更加高。

而無論男女喺其他事上面點樣平等,喺性愛相嘅方面,事實上係冇可能平等嘅。普遍嘅男人,其實唔會有太大興趣對另一個男人嘅性器官或者身材評頭品足,特別當相中片中人比自己更「雄偉」嘅時候,妒忌或者自卑心都會消減男性討論嘅意欲。而樂於討論呢類嘢嘅女性亦只會更少,無論係因為羞於談論定係搵唔到合適嘅人去講。

相反,如果流出性愛影像中嘅主角係女性,出於欣賞、意淫、獵奇等唔同角度,男性之間嘅「熱烈討論」係必然會出現嘅;至於部份女性,出於劃清界線嘅心理,亦甚少會作出任何同事件相關嘅表態;少數則甚至會批評事主嘅「唔自愛」、「唔小心」。綜合各種因素,男性同女性出現喺流出嘅性愛影像入面,所得到嘅迴響(特別係負面反應上)必然會有差別。

所以如果唔想自己嘅裸體或者性器官有日出現喺網絡上面,下次當你做愛嘅時候,見到有人拎出佢嘅手機,請你即刻大嗌唔好,然後講比你未必信任嘅人(即係你眼前嘅性伴侶)聽:唔好影。如果堅持要影,就索性咪做落去。特別係喺容易令人得意忘形嘅後背體位,請小心對方雙手任何可疑嘅舉動。樂極生悲你應該聽過啦。

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments