身為暖男,夏天一定要識「紳士眼」

cc photo by flickr user Sheree Zielke

今時今日,如果你連「紳士手」係乜都唔知,你都咪話自己係暖男。所謂「紳士手」,其實就係同異性相處嘅時候避免肢體接觸,以免女士覺得自己俾人借機抽水。通俗啲嚟講,就係「克制自己隻鹹豬手」:搭膊頭唔掂膊、攬腰唔掂腰,係禮貌而且有教養嘅表現。

不過我認為比起「紳士手」,其實「紳士眼」更值得學習。特別係喺夏天呢啲夏日熱辣辣熱褲熱背心嘅日子,點樣可以做到望而不淫、睇而不傷,實在係每位紳士都應該知道。俗語有云:新屎坑都有三日香;但紳士眼唔使三日,三秒就學得成。抽時間學一學,又何妨?

「紳士眼」速成:
1‧左眼望向右
2‧右眼望向左
3‧完成

以後街上見到低胸背心、迷你短裙,只要即刻使出「紳士眼」,你身邊嘅另一半除咗可能會受你嘅君子風度感動,仲話唔定會當咗你係正人君子,愛得你更深;而即使你冇另一半,街上美女見你坐懷不亂,唔單止會覺得你係正人君子,仲可能懷疑你視力有問題,對你心生憐憫。

而撇除上述功利目的,「紳士眼」更重要嘅係用嚟保命。古有李白舉頭望明月,低頭思故鄉;而今日無論係喺巴士樓梯定係自動電梯,如果一個唔覺意,你對眼舉頭望到裙下「明月」,低頭思到胸前「故鄉」,你嘅下場恐怕都會好似李白一樣——死硬。記住,呢個世界嘅不變定律係:無論女士着得再暴露都好,你望到就係你錯。到時先後悔唔識「紳士眼」?太遲喇……

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments