「HJ兩Q，賓周都損」自救手冊
網上圖片
WhatsApp群組多，有時手快快Send錯Message，相信唔少人都試過。如果內容無關痛癢，最多俾大家笑下當冇事；但內容如果太敏感，就唔係笑下自嘲下可以算數。好似今日嗰位「HJ兩Q，賓周都損」阿爸，下場係點，大家有眼睇。不過雖然Send錯訊息固然收唔返，但當刻如果有心補救，都可以一試。參考下面方法，分分鐘救你一命……
家長群組
叫得做家長群，群組入面自然都係阿爸阿媽。父母最緊張嘅就係仔女，所以只要將焦點拉返到兒女身上，將事件連繫去親子議題，就唔會有人覺得奇怪，仲會熱烈參與討論。如果不慎誤發「HJ兩Q，賓周都損」呢句，你可以即刻打出以下句子(任擇其一)：
「今日囝囝/囡囡問我呢句嘢點解，可以點解釋俾佢聽？」
「囝囝/囡囡無啦啦同我講呢啲，係咪有同學教壞佢？」
「頭先接放學見學校附近有啲咁嘅燈牌，好易教壞小朋友喎……不如寫信投訴！」
另一半
唔小心向另一半（包括但不限於男友女友妻子丈夫）誤發「HJ兩Q，賓周都損」，你唔單止戀情隨時凍過水，分分鐘仲可能命仔不保。呢個時候你要做嘅唔係否認，而係要巧妙地將自己由受事主體轉換成施事主體。所以你應該打(任擇其一)：
「本來今晚仲想同你大戰三百回，但我睇完動作片真係忍唔住自己……Sor」
「頭先諗住挑戰日本個自＿世界紀錄，點知兩次就損晒……果然好難」
「你仲係唔肯同我＿＿，咁落去我真係會搞到小弟不保。」
老友群組
或者有時你都會同朋友講下有味笑話、開下擦邊球，但大大句「HJ兩Q，賓周都損」打落嚟，可能佢哋都會「覺得呢個人相當有嫌疑」。不過只要善用以下自救句式，逢凶化吉就未必講得上，但或者你可以喺大家心中留下幽默有趣嘅印象呢？
「猜一句歇後語。」
「漢成帝遺言會唔會係呢句？」
「我朋友話佢將呢句Send咗去家長群組，笑死我 XD」
不過即使以上方法係有效，無人懷疑「賓周都損」嘅其實係你本人，但講大話始終都係唔啱嘅行為，而且紙係包唔住火嘅，加上大話只會一個接一個，講大話亦都係利用咗身邊人對你嘅信任……（下刪一百個原因），所以筆者只係提供學術性嘅理論，並唔係鼓勵大家講大話。下次遇上「HJ兩Q，賓周都損」嘅情況，大家最好都係直接誠實咁打：「係呀我賓周損晒呀，分享返俾大家知啫。」
高人指點
Follow 爾雅集