早幾日講開MENSA……

刊登於 2017-05-22 By 明鏡 All, 生活文化, 香港小故事

cc photo by flickr user David Bolton

話說墳總青永屍早幾日講開點解香港咁多蠢人個平均IQ都有107，係咪好多MENSA會員拉高條curve，我就醒起我大學無聊時去考咗轉交咗次年費，發現呢個歷史悠久，但活動唔太吸引嘅members club，其實真係唔知做咩嘅…

MENSA香港分會嘅入會，係需要透過由佢哋舉辦嘅IQ test，大概係同80後做過嘅學能測驗，或者某啲跨國企業嘅aptitude test差唔多。要求又唔係好高嘅，98th percentile其實都只係IQ 132或以上，當然，佢唔會話俾你聽你啱幾多條，IQ有幾高，一係入一係唔入。不過俾你知都無用，果30條MC係無咩可能test到你係IQ 140、150、160定係金田一咁嘅180嘅。

咁交完會費又點呢？你就會發覺呢個club嘅會員，即使喺香港，都係鬼佬多過本地人。佢哋嘅活動除咗搞下行山、抬橋、棋牌，就係吹水會。即係話就算係未有facebook嘅年代，對學生嚟講都係無咩吸引力嘅老人活動。所以我交咗一次年費就無繼續喇…

咁其實係咪香港先咁悶呢？上去Mensa International個網睇，又好似唔係，都係呢類活動。可能係對歐美喺非大城市住嘅人嚟講，生活本身就比較悶，要同人聯繫又唔太方便，所以可以接受呢類活動？不過喺21世紀，起碼喺有facebook之後嘅年代，大概都係應該與時並進，改變下。

雖然聽落好似係無咩用嘅老人活動俱樂部，其實佢喺上世紀應該提供咗一個環境俾家長向資優者理解點樣培育資優兒童嘅…不過，喺香港嚟講，應該無點work過。養仔呢味嘢，喺香港無幾千萬身家兼少少見識，資優都無用。IQ高係咪無用？唔係，不過以香港嘅考試制度，IQ高唔可以直接轉換成成績好。如果無本錢無見識，資優嘅最後都係正正常常入大學攞個學位之後捱騾仔，呢個就係所謂「起跑線」嘅真正意義。

香港係咪真係蠢人愈嚟愈多？未必係。只係喺有互聯網嘅年代，識得吸收新知識嘅同唔識嘅相差會愈嚟愈大，每代人嘅兩極化愈嚟愈嚴重，而社交媒體提供咗個平台俾我哋接觸啲以前接觸唔到嘅人，亦即係衝出嚟柒方便咗，唔洗淨係著住條底褲企喺中環。所以，睇落香港蠢人多到嚇死人，其實只係同我哋睇到靚女嘅機會高咗係同一個現象。