其實黃子華唔做楝篤笑都係因為佢
圖片來源：蘋果日報
話說子華神話因爲現實已經痴線到令人笑唔出所以唔做楝篤笑，不過唔緊要，香港有個楝篤笑新星 — 公民黨法律界代表，郭榮鏗大狀。
本身特首選舉我就興趣不大，就算泛民智障到叫曾俊華做「民主之父」我都無興趣寫，極其量只係重申民主黨由司徒華、李柱銘到宜家都係建制派、都係大中華膠啫。但估唔到，除咗PR人、Marketing人喺佢身上學PR、Marketing之外讚下無問題之外，事隔咁耐都仲有人讚佢嘅路線，我真係完全理解唔到。
楝篤笑新星郭榮鏗就曾經盛讚曾俊華兩個月內統一武林，唔係，係團結泛民建制，話湯家驊走中間路線兩年一事無成。呢個講法簡直係廿一世紀政界第一笑話，如果用漫畫《天使禁獵區》嘅天堂地獄設定，就係天使拉斐爾寸天使尤利爾統一唔到地獄，但盛讚地獄七君主之一嘅貝利亞統一到天界同地獄。或者換個講法，用武俠小說嘅設定，就係令狐沖寸岳不群幾年都統一唔到武林，但盛讚東方不敗兩個月就一統江湖。講真，我真係聽唔明，好彩郭榮鏗係大狀唔係法官啫。
我知，好多人覺得政治唔可以咁簡單分正邪嘛，唔緊要，換個現實政治例子。咁其實同英國工黨老鬼寸完貝理雅嘅新工黨理念唔夠左之後，盛讚保守黨嘅卡梅倫唔太右可以統一左右一樣。成件事真係好難理解…
喂，你成班扮民主嘅大中華統一主義者喺14年扮完反對831宜家轉身射個三分波撐831，你自己鬆章做港奸二五仔對家梗係一統江湖啦，你係咪低能㗎？咁你唔洗撐曾俊華做民主之父啦，陳雲一樣係大中華統一主義者，你撐佢做泛民共主嘛笨。佢除咗窮個曾俊華、賣相無咁靚仔之外有咩分別呢？話哂佢都有搞邪教經驗，都係一種技能吖。喂，好心你啦，班老海鮮就話幾十年嚟都想攞番張回鄉卡參加北上尋歡團啫，你後生遙遙一表人才，唔洗下話？
（編輯再次頭盔：本文只反映作者意見，並非本台立場～）
高人指點
Follow 爾雅集