今年的夏天也會非常炎熱－第一章 我們總是不能好好地說再見（3）
cc photo by flickr user cheer Lee
上回提要：路嘉茵在大學面試時出了糗，之後相約中學同學鄧雨茵和柯以樂傾訴，懷念中學畢業的時光，發現中學時代最掛念的是因病辭職的班主任。
—–
2008年 夏
幾日後，Miss汪在醫院去世了。
那天，路嘉茵和鄧雨茵分別在自己家裏收到了班長在MSN的群組上發放的消息。
路嘉茵看着因窗外太亮而反光的螢幕。
螢幕上，粉藍色的天空上飄着幾朵白雲，「Miss汪在醫院去世了」刺眼地印在這樣的風景上。
「叮咚」MSN來訊息的聲效響起。與鄧雨茵的二人對話視窗彈了出來。
「鄧雨茵：雖然話Miss汪走咗，但係，我竟然無咩感覺」
路嘉茵準備回覆時，鄧雨茵卻「正在輸入中」。
「叮咚」
「鄧雨茵：連少少震撼或者傷心都無，點解會咁，不如你鬧下我」
路嘉茵看着訊息與藍天白雲交滙在一起的螢幕。
「路嘉茵：嗯⋯⋯唔只你，我都係一樣⋯⋯」
路嘉茵看着鄧雨茵下線了，自己也跟着關了電腦，然後走到窗前看着外面一個大型公園裏，男生們在快樂地打籃球，女孩們扛着浮板走向室內泳池。
今日，唔係應該要落雨㗎咩，陽光咁燦爛嘅夏天，天氣咁好，叫人點傷心得落⋯⋯她輕輕嘆了一口氣，這樣想着。
從那之後過又了一個禮拜，到了AL放榜日。
「今年學校都唔例外地出咗兩個狀元，我哋所有同學嘅合格率達到95%⋯⋯」
校長正在台上表揚着一起集合大禮堂裏的所有考生，但是知道反正狀元不會是自己，身穿着校服的路嘉茵、鄧雨茵和柯以樂也沒有特別留意聽。
「喂，聽講Miss汪上星期走咗喎，你哋班有無啲咩表示啊？」與自己班坐在一起的柯以樂恰巧在路嘉茵和鄧雨茵的後面，於是輕聲問道。
「嗯⋯⋯無啊⋯⋯好似話啲大人唔想咁多學生都去曬靈堂，所以我哋都無其他嘢可以做到。」路嘉茵回答道。
「你顧掂自己先啦，唔好一陣成績真係meet唔到conditional offer就搵我喊啊。」鄧雨茵雙手抱胸前，說。
「我⋯⋯」柯以樂竟然真的被說得有點坐立不安。
「你哋阿爸阿媽有無嚟到啊？」路嘉茵自己也對即將派成績感到沒有自信，所以轉移了話題。
「無啦，我啊媽要返工」鄧雨茵說。
「我媽咪話一收工就會過嚟。」柯以樂回答道。
「哦？姨姨噚晚返夜班？」鄧雨茵轉過頭問柯以樂。
「嗯！」柯以樂點點頭。
「好啦，咁依家返各自嘅課室等班主任派成績表啦，祝大家好運。」
隨着校長的發言和同學們的掌聲結束，大家都懷着忐忑不安的心情返回自己的教室。
柯以樂向路嘉茵和鄧雨茵道別的時候，被自己的班主任叫到了一旁。路嘉茵和鄧雨茵跟着自己班的同學走，漸漸就見不到柯以樂。
「做咩啊？」路嘉茵問。
「唔知呢，聽唔切⋯⋯」鄧雨茵不時回頭，也看不見柯以樂走回男子部的身影。
「唔會真係畀你講中咗，用唔到conditional offer掛⋯⋯」路嘉茵挑着眉說道。
「⋯⋯」鄧雨茵隱隱也有點不安。
回到教室後，Miss袁已在坐在講台後，並告訴大家的家長都已經在隔壁的活動室等待着。同學們都自動自覺地回到幾個月沒見的自己的座位上。
Miss袁拿着一疊成績單說：
「我哋準時，跟全港時間搭12先派啦，咁呢15分鐘嘅時間，我想播條片畀你哋睇下。」
Miss袁走到門口關上燈和門，然後開着了投影機。
「喔！」有同學開始驚呼了一聲。
身穿着一貫黑色上衣的Miss汪出現在螢幕上，她依舊精神奕奕，臉上帶着和藹微笑地望着全班的同學。
「好，今日係最後一堂中文堂，大家一齊揭開書，第62頁，我哋繼續講〈人生的意義〉。四個層次、作者價值意義個啲我已經教過曬你哋啦，今日想同大家討論下嘅係你哋嘅人生意義。你哋覺得平凡人所謂嘅人生的意義究竟係咩呢？人生最終嘅目的地究竟係邊呢？我諗淨係掛住考試同享受暑假嘅你哋，呢啲都係未值得去深思嘅話題，但係我相信好快你哋就會問：究竟我做緊咩？咁辛苦入到大學之後，我嘅人生仲有啲咩好做呢？但係呢啲問題無人答到你哋，要你哋自己去搵，係咪好似作者咁講由物理層次上升到價值層我哋就搵到人生嘅歸宿呢？一定唔係，依家唔做你哋老師我先敢講：唔好太依賴課本，課本教唔到你哋點做人、點去生活⋯⋯我到呢個年紀都仲搵緊自己嘅人生意義，不過做咗咁耐老師，我慢慢都意識到教育你哋成為一個身心健康嘅大人就已經係我人生最大嘅欣慰，所以到你哋之後真係對自己人生感到迷惘嘅時候，可以偶爾咁試下諗起下我。對唔住啦，你哋咁重要嘅時刻，我都唔能夠陪住你哋。咁，以上就係我同你哋上嘅最後一堂啦，但係絕對唔係你哋人生最後一堂課⋯⋯依家諗返起，我好似從來都無要你哋向我敬禮，咁依家，好頭好尾，等我哋講句再見啦，Goodbye class。」
螢幕上的Miss汪用一如既往地微笑着注視着大家。
「起立⋯⋯！」鼻子開始塞起來的班長說。
「咔——」刺耳的椅子移動的聲音此起彼落地響起。
「Goodbye Miss汪。」路嘉茵和鄧雨茵跟着前面的班長一起對着螢幕鞠躬。
立直身子的時候，路嘉茵看到身邊的鄧雨茵伸手擦眼角。驚訝的是她從來都沒有見鄧雨茵在人面前哭過。
「喂，你唔好喊啦！」路嘉茵說着，眼眶也開始發燙起來，然後眼淚像一串珠似地「答答答」的落下。
「你睇下，你喊又搞到我喊啦⋯⋯」路嘉茵本來還想好好地控制自己，但聲線卻不由自主地抖顫起來。
「你睇下其他人都喊緊啊！」鄧雨茵不斷抹着眼淚說。
路嘉茵環觀了一下周圍，其他同學也在低頭哭泣着，班長哭得特別厲害。
錄影完結了，定格在Miss汪說再見的一幕，她仿佛就這看着我們，不會離開，那一刻，成了我們中學時代永恆的瞬間。
「柯以樂！」鄧雨茵拿着成績單走到男子部七年級的班房喊道。
鄧雨茵在教室裏張望。有些同學拿着成績單圍着老師焦急地問，有的伏在桌子上哭，家長則在旁安慰，有的已不在座位上。
「柯以樂呢？」鄧雨茵找了柯以樂的同桌問。
「唔知佢啊，一開始已經無見佢啦，不過佢都屈機㗎啦，有conditional offer，我都唔知入唔入到u，你呢，考成點啊——喂，喂，人呢？」同桌顧着說，一抬頭，鄧雨茵已經不見了。
鄧雨茵回到自己課室。
路嘉茵的父母正在向Miss袁道謝。
「佢人呢？」 路嘉茵問。
「搵唔到。唔理啦，我要去搵Mr 李傾下點排jupas 好。」鄧雨茵撒手，說。
「你仲洗傾咩，咁嘅成績，亂排都得啦，我就要用策略排啦。」路嘉茵氣忿地說道。
二人走出課室時，剛好碰到鄧雨茵的媽媽。
「誒？你唔係話唔得閒咩？」鄧雨茵驚訝問道。
「我啱啱好趕得切嘛，同埋我要幫埋以樂同老師傾。」鄧雨茵的媽媽穿着一身幹練的裝束說道。
「柯以樂搵咗你啊？佢係邊啊？我由頭先已經唔見佢啦喎。」鄧雨茵問道。
「佢媽咪急性腦中風入咗醫院，好似好嚴重，所以咁重要嘅日子都一定要以樂去醫院睇下。」鄧雨茵媽媽皺起眉頭，聲線鎮靜地說。
路嘉茵看到鄧雨茵不為意地在把成績單弄皺了，於是輕輕拍她的手，拿過她的成績單，放在自己的文件夾裏。
「你哋唔係話去搵老師咩？順便帶我去搵以樂班主任啊。」鄧雨茵媽媽一邊推她們兩向前走一邊說。
高人指點
Follow 爾雅集