《貓城小故事》 by 阿唯

我由出世至今，都喺貓城呢座山頭度過活。呢度有大量人類活動、居住，仲有好多車出出入入，對於貓貓來講，唔可以話係好理想嘅地方。不過呢度有森林有小溪，廣闊嘅自然環境令我哋有足夠地方容身，加上有好多有心人肯餵我哋，於是吸引到來自五湖四海嘅貓貓嚟呢處定居。

貓城嘅居民雖然外形、毛色、品種都唔同，但係我地都會互相照應，得閒就交換吓捉老鼠情報，或者瞓晏覺嘅理想地點，關係總算融洽。之不過，自從某隻唔多合群嘅貓嚟咗貓城之後，就成日都同其他貓起衝突，搞到嘈嘈閉，有時想靜靜地喺水池旁邊思考吓貓生都唔得……

好似今日天矇光時份，我又嚟到貓城嘅山頂，等待早餐嘅出現。雖然貓城有幾處都有人派餐，但住喺呢度附近嘅後生仔女特別錫貓，派發時間又夠早，所以就算我住喺山腳，好多時都會特登過嚟開餐，順便同其他貓吹吓水，聯絡吓感情。

垃圾收集站旁邊嘅空地，放咗好幾個膠兜，但裡面已經空晒，一粒乾糧都無剩。附近有幾隻貓已經等緊開飯，比較意外嘅係，通常都好遲先出現嘅妹頭，已坐定定喺度，用條脷梳緊背後嘅毛。於是我走過去打招呼︰「好少見你咁早喎，妹頭。」

「樂樂，你都唔係唔知架啦。呢排肥騰騰成日蒲頭爭食，我再遲嚟，咩都無得食啊。」

妹頭口中嘅肥騰騰，就係果隻唔合群嘅名種貓(自稱)。佢身型比起我哋呢啲普通貓大成倍，食量驚人。加上佢性格串串貢，乜都拎嚟炫耀一餐，所以貓城居民都唔係太鍾意佢。

「嗱，你學我咁，噬得快啲大啖啲，就唔怕畀肥騰騰搶晒啦。」

「點得喎！我係淑女嚟架。食得太快消化不良，容乜易嘔……哼，都係唔同你講喇。」

妹頭輕輕一跳，上咗去收集站嘅蓬頂同其他貓傾偈，剩返我一個喺度曬太陽。

過咗一陣，悠閒嘅氣氛開始消失，附近嘅貓齊齊望向同一個方向。果然係肥騰騰駕到。佢拖住龐大嘅身軀，扭吓扭吓咁施施然行過嚟。有唔少貓，包括妹頭，一路睥住肥騰騰，露出厭惡嘅表情。

正當我以為，肥騰騰今日又會得得戚戚咁講佢啲威水史時，佢竟然講咗一堆我完全聽唔明嘅「咒語」︰

「鏈姣～鏈姣～煎茄挨～～」

肥騰騰好似撞邪咁，係咁走去每隻貓面前唸咒，搞到大家係走夾唔抖。當走到我面前時，我終於忍唔住問佢︰「你到底喺度UP咩嘢啊？係唔係食咗啲深山野菇，搞到神經錯亂？」

肥騰騰一臉囂張咁講︰「嘿嘿，我呢啲係高等語言，你哋呢啲貓聽唔明，都唔出奇嘅。」

雖然我完全唔明當中嘅邏輯關係，但聽到佢乘機想暗示我係低等貓，就真係聽到火都嚟。

正當我想走開嘅時候，貓群裡面好奇心最旺嘅黑炭就搭嘴喇︰「我認得啊，肥騰騰你學緊捲脷星人講嘢嘛。」

「哈，都係黑炭你識貨！」肥騰騰見有人附和佢，就更加鬆毛鬆翼。

捲脷星人，係我哋貓族幫呢班人起嘅名。佢地同平時相處開嘅人類唔同，最大特徵係講嘢時條脷會好誇張咁捲捲吓，而且我哋根本就理解唔到佢地講乜。原本貓城好少捲脷星人，但唔知點解呢幾年愈見愈多，就連我哋貓族都覺得有啲難適應。

平時八八卦卦嘅妹頭，亦忍唔住走過嚟問︰「咪住先，肥騰騰你痴埋捲脷星人度，唔怕危險咩？相傳佢哋會捉啲貓貓狗狗嚟食，好恐怖架喎。」

「呢啲都係作出嚟嘅啫，咁都好信？」肥騰騰舔一舔個口接住講︰「繼我話，佢哋都不知幾好人，我而家每日去親個神秘地方，都有高級罐罐任食，都係全靠佢哋咋。」

一聽到「罐罐」兩個字，在場所有貓立即雙眼發光，豎起晒隻耳仔留心聽落去。

「真係可以任食罐罐咁著數？」妹頭似乎唔多相信肥騰騰嘅說話︰「咁陣間食早餐時，你記住唔好同我哋爭喎！」

「好啊，啲咁難食嘅乾糧就留返畀你哋囉。」

一聽見平日經常嗌肚餓嘅肥騰騰，竟然主動話唔會同我哋爭食，我只能夠相信，佢今次堅係無講大話。

黑炭走到肥騰騰面前，用誠懇嘅眼光望住佢︰「咁…你可唔可以帶埋我去見識吓啊？」

「咁又唔得喎，」肥騰騰好不屑咁擰歪面︰「果個咁神聖嘅地方係我發現嘅，做乜要益你？」

其他貓見到肥騰騰果種不可一世嘅態度，都唔想同佢多講落去。無幾耐就有個成日餵我哋嘅女仔，拎住一大包乾糧走過來，我哋掛住開餐，就無再理肥騰騰，而佢亦都唔知幾時離開咗山頂。

自此之後，我有好一段時間無見過肥騰騰。可能佢每日有得食罐罐，太開心嘞，唔駛再搵我哋解悶啦。不過貓城又回復返昔日嘅寧靜同悠閒，都未嘗唔係一件好事。

然之後有一晚，橫風橫雨，天空係咁行雷閃電，我同好多貓都匿咗去山腳教堂嘅樓底避一避。我哋吹吹吓水，有貓提起罐罐，令我忽然間諗返起肥騰騰。

「都好耐無見過肥騰騰出現喇喎，你哋知唔知佢最近點？」

正當其他貓都擰擰頭之際，唯獨係黑炭好似想講嘢，但又唔敢開口。等咗一陣，佢終於肯講︰「我想講好耐架喇……其實肥騰騰佢……畀人……捉走咗啊。」

「吓！」妹頭反應比我想像中更大︰「點解會咁架？唔通同果個捲脷星人有關嘅？」

「嗯，就係佢喇。早幾日，我偷偷地跟住肥騰騰，去到一個好偏僻嘅位置…」黑炭嘆咗一口氣︰「我見到有個肥斯大隻，滿面鬚根嘅男人，拎咗幾個罐罐出嚟，肥騰騰食完之後，唔知點解好似周身無力咁攤喺度，跟住就畀個捲脷星人塞咗入背囊度，帶走咗喇。」

聽到呢度，我哋都無貓再敢講嘢，只係聽到淅瀝沙勒嘅雨聲喺耳邊響起。

貓貓每日都要面對唔同嘅危險，有啲係避無可避，只有怨自己唔好彩，但亦有啲時候係因為大意而中伏，如果想生存落去，只好萬事小心，唔係有九條命都唔夠。我之後見到其他貓貓，都會提起肥騰騰遭遇到嘅事，叫大家唔好因為貪圖罐罐，同陌生人太過親近。

無人知道肥騰騰係生係死，最好嘅下場，可能就係喺某個好狹窄嘅角落，畀人類馴養緊，直至終老。我有時會喺度諗，如果肥騰騰知道自己將會喪失喺貓城享有嘅自由，佢仲會唔會貪圖果幾個罐罐呢？如果問我嘅話，我就寧願餐餐食乾糧，甚至捱吓肚餓，都堅持要做隻無拘無束嘅自由貓喇。

comments