《無題》 by 何春霖
阿宗(0)
有冇聽過島‧城？
每個人都有佢自己既秘密。
我成日都會發夢，最近我不斷發同一個夢。
好耐以前有一個小島，呢個島有山，有海岸，仲有一個小村落，小村落建立係兩座山中間。
呢個村落到處都係貧窮既人。
有一個好窮既小朋友，係記憶所及既時間開始，佢已經係一個人，佢一直都係村落裡面流浪，天氣炎熱，佢就去海邊搵海水沖涼；落雨既日子，佢就搵瓦遮頭，天氣轉涼，佢就搵舊紙皮包裹住身體訓覺。
慢慢長大，佢認識到唔少係同一條街道出現既人。
有一日，一個女仔問佢：「成日見既，你叫咩名呀？」
個小朋友冇答佢。
原來其他小朋友個個都有名，只係得佢冇。唔知點解，由果一刻開始，佢突然覺得自己缺少咗啲野。
名，原來每個人係需要有一個名，佢都好想要有一個名，所以有一日，佢去村入面偷野，佢偷咗一箱木頭，聽講只要拎啲野去搵一個村口既男人，佢就會比倒你想要既野你，佢拎住箱木頭一路走一路走，真係遇見一個男人，男人拎起其中一塊木頭，佢望住個男人，然後講。
佢：「我想要一個名。」
男人：「一個名？」
佢點點頭。
男人：「原來每樣野，都有佢既代價。」
佢望住箱木頭，然後問：「呢度夠唔夠？」
男人：「我都唔知。」
佢：「我想要一個名。」
男人嘆一口氣，用樹枝係泥沙地上面寫左個字：「咁以後，你就叫阿宗。」
佢：「阿宗。」
從果日起，我有咗一個名，叫做阿宗。
每個人都有佢自己既秘密，呢個就係我既秘密。
阿宗(1)
我叫阿宗，係一個小偷。
我居住係一個小島上面，島上面有好多人，有錢既人，窮既人，高尚既人，低下既人，唔同人會有唔同既生活方式，有錢人會打扮得光鮮一啲，窮人就著得隨便一啲。
今年係我生涯既第十五年，任何類型既野我都偷過，我已經對偷野感到厭倦。
我突然覺得，人唔可以一世都做同一樣野，如果你一世都做同一樣野既話，可能你已經唔再係一個人。我決定要作出一啲改變。
有一日，我遇到一個老男人，呢個老男人問我。
佢：「你有冇聽過島‧城？」
我：「冇。」
佢：「聽講你想知道呢個島既事，但我有一個請求。」
無錯，我想知島既事，所以我答應左佢既請求，佢請我幫佢去搵一對藍寶石耳環。
阿宗(2)
呢個城市可以分為四條街，由一個噴水池分隔開。
我搵倒線索，沿住海邊既街道，行到盡頭，會見到一間荒廢既木屋。木屋已經破爛不堪，冇屋頂、窗戶同門口，可以見到只係燻黑同埋被藤蔓植物包圍既外牆，應該好多年冇人住係入面。
我圍繞房屋走左一個圈，除左燒焦既痕跡，同一片頹垣敗瓦，實在冇咩值得留意。屋後面係一片小空地，可以睇到好靚既海岸線，已經係夕陽時份，淡黃色既陽光透過海面折射過黎既陽光，比人好溫暖既感覺，我諗以前係呢間屋生活既人應該會好幸福。
呢個時候，我撞見一個女人，佢有一對好閃亮既眼睛，流線形既輪廓，長而順滑既頭髮，佢企係我身邊睇夕陽，陽光投射係佢既側面。
我：「好靚呀可？」
佢：「嗯。」
我：「可以係呢度住既人，應該都幾幸福。」
佢：「嗯。」
我：「又會一個人黎呢度既？」
佢：「嗯……」
女人諗左一陣，大家又靜返落黎。
佢：「我都唔知，不過沿住街道一直走，就黎咗呢度……」
我係佢身邊走過，佢耳朵既形狀都好靚，頭髮柔和咁散落係耳背上面，耳珠仲勾住一隻耳環，係一隻好襯佢既耳環，一隻藍寶石耳環。
阿輝(1)
我叫阿輝，我係一個好簡單既人。
我覺得我呢世只係做錯過一件事，就係我偷過一次野，之後我就再冇偷過。
果一次，我幫人揸車，佢地入左去一間屋，我係外邊睇水。成個環境都好靜，我一直係度等，後來佢地拎住一袋二袋出返黎走上車，話已經偷倒，於是我開車。
果次我係第一次揸車，架車不停咁死火，仲有個男人追咗出黎，終於開倒車，嚇死我。
個男人搏哂命不停咁追，我好驚，好驚比佢追倒，所以不停踩油，慢慢佢再追唔到，佢跌低左，跪左係路面。
唔知點解，我鬆左一口氣。
我以為呢件事會告一段落，後來我發現，我根本冇辦法忘記。
阿宗(3)
聽講呢個島原本係一個小村落，聚居係度既人慢慢建設，過住簡單既生活，但係好不幸，小村落後來遇到一次大火災，燒毀左唔少人既居所。
我見倒有一條街開始搭起圍牆棚架，佢地要建設一座新博物館，記念城市發展，以前燒毀既地方，將會一步一步會變成新既樣貌，燒焦以後既房屋，好快會同歷史一樣，放入博物館既角落被人慢慢遺忘。
後來我再次遇到果個女人，噴水池、公園，仲有海邊，係唔同既地方都遇到佢。
我話比佢知，我叫阿宗。
佢話比我知佢個名，呂敏。
我話我覺得好有緣，成日都遇到佢。
佢笑住答，係巧合。
係巧合，巧合到連神明都會露出驚訝既地步，因為係人造既。我跟蹤佢，為咗佢身上既藍寶石耳環。
第一次見佢之後，每次見到佢，佢都係度食煙。
佢點一支煙，呷係口，然後繞起手，煙慢慢咁升上半空，形成一道灰色既孤線.
然後我都點左一支煙，夾係手指，煙就黎燒完既時候，我吸左一啖。
苦既。
阿輝(2)
我叫阿輝。
我有一個盒，一個好殘舊既盒，係我最珍貴既寶物，我將佢收埋係一間燒焦既廢屋入面，琴日我再去果度，將呢個盒拎返出黎，個盒仍然係度，我打開左佢，舊盒子入面有兩個格，其中一個係空既，另外一個，放住一隻藍寶石耳環。
藍寶石，每次望落去都會有深深沉沉既感覺。
我將佢送左比湘蘭，湘蘭係我最愛既人，好多年前我地遇到一個大災難，變成孤兒，同樣冇哂親人既我地開始一齊生活，兩個無依無靠，係街邊執垃圾，冒住比人拉比人打既風險偷野食，渡過左好多困難既日子，直到依家，艱難既日子終於都過去。
於是，我要佢陪我去海邊散步，十二點既鐘聲敲響，我跪低，向佢求婚。
我係一個好直接既人，所以用最直接既方。
我將我最珍貴既藍寶石耳環送比佢。
阿宗(4)
我又再去一次廢屋，呢一次已經係我呢個月第三次黎呢個地方，我發現除左我之外仲有新既腳印，應該有其他人黎過，隨住腳印一直走，好快又出返大街道，輾轉返返去噴水池。
係道路由面穿插，消磨左一晚既時間。
返到屋企門口，竟然有個女人坐左係度，係呂敏，佢好似飲左唔少酒。
我：「咦，你係度做乜？」
呂敏醉醉地咁講：「哼，坐囉。」
我：「好夜喇喎？」
呂敏：「哼，唔俾架咩?」
我：「咁……你繼續坐。」
呂敏：「哼。」
我：「……做咩啫你？」
呂敏：「……」
我：「有咩我可以幫倒你呢？」
呂敏：「我冇屋企」
我：「哦……咁朋友屋企呢？」
呂敏：「我都冇朋友……」
我：「……」
我：「咁你要唔要入黎坐？」
呂敏：「唔要，我要坐係呢度。你陪我啦。」
所以我同佢一齊坐左係我屋企門口。
佢飲左一陣酒，又話。
呂敏：「可唔可以陪我去一個地方？」
我：「好遠架？」
呂敏：「好遠好遠架，陪唔陪呀？」
我：「行啦。」
我由噴水池開始沿住街道行，佢停左係路中心，望住一個方向，果邊只有一排排新建成既房屋。
五分鐘之後，佢開始不停咁喊，我都唔知可以點安慰佢，唯有坐係佢隔離。
唔知過左幾耐，佢問咗我一句。
呂敏：「可唔可以……唔好再掉低我一個人……」
我諗一諗：「嗯。」
當我係度諗緊，我冇掉低過佢第一次，應該唔算可以「再掉低佢」，佢已經喊到訓著左。
果晚我揹住佢返屋企，我發現，飲左酒既女人真係特別重。
阿輝(3)
我係地盤既工作，天氣好熱，夏至都已經過去，三十八度高溫，每一個工人都做到滿身大汗。
其實一個年輕人有好多唔同既選擇，不過我選擇左地盤，因為我希望穩定，地盤好穩定，地基、打裝、扎鐵、水泥，只要有建設就會有工程，有工程就會有地盤。城市不斷建設，就不斷有工開。
我只係個想過住普普通通既生活，過住平淡既日子，城市穩定發展，我可以每日都有野做，每個月有糧出，然後結婚生仔，供書教學，睇住啲小朋友長大，退休養老，安享晚年，就係禁簡單。
我唔想有咩變化，唔想有咩驚險，驚險既日子我已經過夠，我只係想平平無奇咁過日子。
但係近來發生左好多事，地盤入面接二連三出現意外，死左唔少工人。
再係咁落去，安穩既日子好快離我而去，所以今晚我要去望一下。
阿宗(5)
* * *
我一個人係一條長長既街道入面偷木頭，我搵左一個空箱，然後一間屋一間屋咁走，我係每間屋門口偷一塊木頭，呢個夜晚好靜好靜，一粒聲都冇，每個人都訓得好冧。
花左好長時間，我儲齊咗一箱木頭，拖住佢係街道一路向前行，一直都遇唔倒任何人。去到街道既盡頭，我見到一個男人，我將呢箱木頭交比佢，我同佢講，我想要一個名。
個男人抬起頭，佢對眼好紅，佈滿紅根既白色眼球。
* * *
終於天光，呢個夜晚真係過得好漫長。
呂敏佢訓得好冧，我襯佢訓左，將佢既耳環除落黎，放入褲袋。
要繼續搵另一隻耳環既下落，我決定留低呂敏係屋企，自己出去。
行勻附近既店舖都冇發現，突然想去琴日既街道，由街頭行到街尾，經過佢所講既噴水池，噴水池由一塊塊白色磚頭砌成，陽光照射係花灑噴出既水花上面，形成一條條小彩虹。
我望住彩虹，任由時間慢慢過去。
噴水池黎咗一個女仔，長頭髮既女仔，一個男人係附近行左出黎，佢地傾左幾句，就一齊走左。
女仔轉身既時候，我發現佢左耳帶住一隻耳環，好靚既藍寶石，同呂敏果隻簡直係一樣。
於是我開始跟住佢地。
阿輝(4)
入到地盤，第一步要確認附近有冇其他人。
已經入黑，四周圍都好暗，我拎住手電筒到處走，係冇咩可疑既人出現，於是我上咗寫字樓，用萬字夾嘗試打開寫字樓既門，我都係第一次用萬字夾開鎖，比我想像中更加難攪，花左唔小時間，終於俾我開到。
寫字樓入面好凌亂，工人帽、衫、文件，手套，鋼頭鞋放滿一地，我好小心咁拎起枱面既野研究，我發現最有用既應該係地盤既設計圖，可以知道哂成個地盤既結構，我望下望下，想話記住張圖既結構。
突然出面傳黎一啲聲……係有人傾計既聲！
阿宗(6)
女仔身體唔係好靈活，走既速度都唔算快，我好輕易就可以係後面跟上佢地，我發現佢地入左一個地盤，係一個新發展既地盤。
兩個人走入去唔夠一百米，就停低咗腳步. 佢地係度傾計，突然男人用手一揮，打暈咗個女仔，然後佢烏低身靠近個女仔，伸手去佢左邊臉。
啊，我明喇，我跑近佢地。我知道呢個人原來都打算搶隻耳環。
聽到腳步聲，個男人好慌忙咁就逃走咗。
我扶起女人睇下，佢意識有啲模糊，但應該冇受到咩大傷害，我拎左袋入面既耳環出黎，同佢戴住既耳環對一對，果然係同一個款式。
搵齊喇，我鬆一口氣，呢個時候，我個頭比人重重咁打咗一下。
阿輝(5)
聲音好快消失，出面又靜咗落黎，我雞手鴨腳咁走出去，發現有一個男人抱住個女仔。
我走埋去望真啲，咦！係湘蘭！呢個男人係乜水黎？點解佢會抱住湘蘭？點解湘蘭佢軟賴賴咁既？啊！佢暈咗。
個男人做咩愈貼愈埋身，想對佢點呀？我一步一步行近，佢都冇發現，佢仲拎起啲野對準湘蘭個頭。
呢個男人，竟然呃湘蘭黎地盤，仲對佢落手，正人渣！我已經忍唔住，衝埋去一拳打落佢個頭。
佢暈左，同時跌左野出黎，係藍寶石耳環？
呢個人……我執起耳環，抱住湘蘭離開地盤。
阿宗(7)
我後腦比人用力咁打咗一吓，瞓係地上面，斜眼望過去，打我既係一個幾大隻既男人，應該唔係頭先逃走既男人。
佢執起我既耳環，然後抱住果個暈咗既女仔離開。
我掙扎咗幾下，摸住腫咗既頭企起番起身，跟蹤呢兩個人。
佢地入左醫院，一直到天光都冇返出黎。
我發現，我認得果個身影。
阿輝(6)
等咗幾個鐘頭，湘蘭終於醒返，真係謝天謝地。
「湘蘭，你醒嗱！你醒嗱！」
佢斬一斬眼：「嗯……」
我：「點呀！有冇覺得邊度痛啊？」
佢搖搖頭。
我：「太好喇，太好喇。」
佢：「阿輝……」
我：「你睇你，個口乾哂喇，我去針杯水比你好冇？」
佢點點頭。
我：「湘蘭，點解你會去地盤既？」
佢：「係一個男人帶我去。」
我：「男人？頭先果個？」
佢：「唔係……果個人救咗我。」
我：「吓！」
佢：「嗯……」
我：「咁係邊個？」
佢：「佢係屋企附近等我，話識得你。」
我：「識得我？」
佢：「嗯，佢話你係地盤出左事，叫我過去。仲拎左自己同你既工作證出黎。」
我：「工作證？咁佢係咩人？」
佢：「佢係地盤既工頭。」
我：「工頭？」
我地靜靜咁坐左一陣，然後我拎左另一隻藍寶石耳環出黎。
我：「湘蘭」
佢：「嗯？」
我：「我搵倒另一隻耳環。」我捉住佢隻手，將耳環放係佢掌心。
佢：「啊……點解既？」
我：「係頭先救你既時候，係個男人身上攞倒。」
湘蘭仔細咁望住隻耳環。
我：「我想由你保管住。」
阿宗(8)
* * *
我一個人係一條長長既街道入面偷木頭，我搵左一個空箱，然後一間屋一間屋咁走，將一個個跌得歪歪斜斜既木頭拎起，放入箱，呢個夜晚街道好靜好靜，一粒聲都冇，每放一塊木頭入去，都聽到好大聲既迴音。每個人都訓得好冧。
花左好長時間，我儲齊咗一箱木頭，拖住沉重既木頭箱一路向前行，木頭互相撞擊發出咯咯咯咯既響聲，一直都遇唔倒任何人。去到街道既盡頭，我見到一個男人，男人坐左係石頭旁邊，用手蓋係臉上面，我將呢箱木頭交比佢，我同佢講，我想要一個名。
個男人抬起頭，佢對眼好紅，佈滿血根既白色眼球，佢望住我，將開口，但係冇講野，佢塊臉流住兩行眼淚。
* * *
地盤既事之後，我對呢件事有啲在意，除左我之外，好似仲有唔少人都搵緊呢對耳環，我再去搵果個男人。
佢住係一間好殘舊既鐵皮屋，入面得一張爛梳化，曱甴老鼠四圍走，鐵風扇有好多生銹既痕跡，盲頭烏英係上面飛黎飛去。不過冇蚊，一隻蚊都冇，牆上面只係有一隻好肥既四腳蛇，一下一下咁係度呻脷。
佢見到我，並冇表現出咩特別既反應，可能一早就預咗我會再黎搵佢。
我同佢講，我想知道多啲關於呢對耳環既事。
佢冇出聲。
阿榮(1)
我以前係一個船工，跟隨住漁船四圍漂泊，我地冇家，因為一直都冇安定過落黎。
有一年，我地既盤開去到一個北方既小島，呢個小島環境清幽，有森林海灘又有小動物，地方好舒服，仲有一班友善既村民，我同一班漁民開始成日黎呢個島，最後仲定居咗落黎。
定居之後，我開始嘗試更精細既技術，所以開始整吊飾。
我整左一對藍寶石耳環，送左比一對夫婦。
我以為自己會安安樂樂咁樣過埋呢世。
但係事與願違，後來呢個村落出左意外，大部份人都死去，一場大火將呢度慢慢咁燒毀，果對夫婦都係。
阿宗(9)
返到屋企，見呂敏係不斷搵野，一見我返黎，就問我。
呂敏:「耳環呢？」
我冇答。
佢望住我，好大聲咁重覆：「我隻耳環係邊呀？」
我：「冇咗。」
呂敏:「冇咗？拎左去邊呀？拎返出黎啦！」
佢一個個櫃桶打開搵。
我：「冇咗。」
呂敏:「拎咗出去外面？」
我:「嗯……」
呂敏:「之後呢？跌咗？」
我:「…… 」
呂敏:「妖！跌咗係邊呀？」
佢拉住我隻手衝出門，然後扯住我行。
我:「你記唔記得，我地見面既噴水池？」
呂敏:「噴水池？」
佢好嬲咁揮開我隻手，轉身就走，佢行得好快，愈行愈快，我跟係佢後面。
佢係噴水池每個地方都搵。
呂敏:「跌左係水入面？石罅入面？定係坑渠入面？」
我冇答佢。
呂敏:「咪玩啦，快啲講啦！」佢又到處望，烏低身望地下。
「唔駛搵喇… 」我決定話比佢知：「比人搶左…」
呂敏:「比人搶左？頭先你又話跌左？」
我:「……」
呂敏:「你有冇攪錯啊！你唔問過我偷我隻耳環拎出街仲要比人搶左？咁衣家點啊? 你點賠返比我啊? 你賠倒咩? 你知唔知隻耳環對我幾重要啊! 你地啲男人都痴線嫁。做野唔理人地感受嫁咩？你以為自己係邊個啊！上帝呀？鐘意俾你就俾你，鐘意攞返就攞返牙……」
「唔好意思……」
呂敏:「咩料啊! 道歉大哂牙。有咩用啊？」
「小姐，你搵緊既……係咪樣野。」係琴日果個女仔，佢拎住呂敏既藍寶石耳環。
呂敏:「咦……點解係你度既？」
我:「呢位先生琴日跌左，我估……對佢可能幾重要。所以諗住出黎俾返佢，行到噴水池就見到你地。」
阿輝(7)
因為工頭既事，令我要再去地盤調查下，地盤有好多人圍堵，原來工頭已經係琴晚意外身亡，地盤封鎖住，暫時冇人可以入去。
我發覺身邊既人一個一個無聲無色咁死，我既家人，湘蘭既家人、地盤既工人，再輪到工頭。
我去醫院睇湘蘭，但係佢唔係度。
於是我折返番屋企，經過附近既噴水池，一架車經過我身邊，車慢慢係前面停低。
我見到，湘蘭比人捉左入一架車。
阿榮(2)
呢個島有盛產寶石既傳說，不過已經係好多年以前既事。
但係當我地定居落黎之後，發覺呢個的確只係一個傳說。
最後一次航行，返黎之後，我將擁有既銀器重新鑄造，做左一對介指同一對耳環。
本來我要送俾一個等我既人，不過最後我將佢送左比一對新婚夫婦，我希望為佢地帶黎祝福。
但係呢對耳環，令呢個寶石傳說復活。
阿宗(10)
女仔將耳環比返呂敏，然後望住我。
佢：「可唔可以問你一個問題？」
我：「好呀，你講。」
佢：「點解你要禁著緊呢對耳環既？」
我：「哦，我係幫人搵。」
佢：「係咩人黎？」
我：「嗯……係一個老男人。」
佢：「一個老男人？」
我：「嗯。」
佢：「係個點樣既人黎架？」
我：「嗯……四、五十歲左右，好多白頭髮，滿面皺紋，仲有好粗糙既手。」
佢：「噢……點解佢要搵呢對耳環既？」
我：「呢層，我都唔係好清楚。」
佢：「嗯……」
當佢若有所思既時候，呂敏插咀。
呂敏：「你問禁多做咩啫？」
佢：「嗯……冇，我只係好奇。」
呂敏：「唓，睇你絲絲文文，原來禁八卦，成個八婆咁。」
佢：「唔好意思，咁打攪哂你地。」
我：「唔會。」
我同呂敏係噴水池目送住個女人行走。
前面係一條馬路，有架汽車駛過黎，車門打開，一隻手伸出黎，手搭左落果個女仔手臂上面，一手扯左佢入車。
阿輝(8)
湘蘭比人捉咗，我真係唔知點算，我一路追過去，但係架車開得好快，一下子就冇左影。
我四周圍望下，又係上次果個男人！身邊仲多左個女人添。
次次佢係度湘蘭都有意外，衣家身邊仲多咗個女人，睇佢個樣禁風騷就知唔係好人，隻手吊吊下咁，似乜野，邊度有女人係咁，成條街都係正常人，係佢地唔正常。
咦！點解佢會拎住隻耳環架。
我行近啲去望真啲，冇錯，果然冇錯。
係佢隻耳環。
阿宗(11)
上次個男人走埋黎，望住呂敏隻手，佢應該係望住對耳環。
呂敏：「望咩呀你？」
男人：「點解係你度！」
呂敏：「咩野呀？」
男人：「點解隻耳環係你度呀！」
呂敏：「吓，隻耳環我嫁喎。」
男人：「係湘蘭嫁。」
呂敏：「痴線。係我嫁！」
男人：「拎返黎！」
呂敏：「乜料呀你！」
男人：「拎返黎呀！」
然後男人伸手捉住呂敏隻手，想搶走隻耳環，雖然呂敏反抗，但係結果唔夠佢大力，比佢推跌左係地。
呂敏發哂矛咁大叫：「痴線佬！拎返黎呀！」
男人搶倒耳環，轉身諗住走。
我：「你唔係要救返你女朋友咩？」
佢轉個頭望住我。
我：「我哋可以幫你，但係呢個係條件。」
我用手指住佢手上既藍寶石耳環。
佢：「我會搵你。」
然後將耳環放係我手掌。
阿榮(3)
一開始，無數商船登陸呢個島，去探尋寶石既下落，但係一直都冇任何發現。
商人慢慢放棄，來往既船隻都變少。
但係有一日，海盜登陸咗呢度。
村民好驚訝，幸好村落因為有山既保護，村民暫時安全。
但係有村民背叛咗大家。
阿宗(12)
由果日開始，我同呂敏好努力咁搵呢個比人捉咗既女仔。
不過莫講話身影，連有佢蹤跡既線索都冇，佢同捉佢既人好似突然人間蒸發左咁。
然後有一日阿輝打比我，佢約我出黎，係噴水池等。
幾日之間，呢個男人好似蒼老左幾十歲，頭髮凌亂、滿臉鬍鬚皺紋、冇重心既眼神。
我去到噴水池，差啲唔認得佢，佢坐左池中心，同埋佢身邊成地既啤酒罐一齊。
佢問我有冇消息，我搖搖頭。
我問佢知唔知咩人會捉走湘蘭，佢冇答我。
然後佢又繼續飲啤酒，打開啤酒罐既易拉蓋，等泡沫散開，然後飲，一罐，又一罐，又一罐……佢飲左好多罐。
我：「你搵我出黎，就係睇住你飲啤酒？」
佢：「其實我知道。」
我：「知道乜野？」
佢：「我知道佢地係邊。」
我：「吓？」
佢：「你有冇聽過島城？」
冇，我冇答佢。
佢：「島城，其實就係呢個島既名。」
我：「呢個島？」
佢：「呢個島，係向北方航行第一個見倒既島嶼，以往既人，每發現一個新既島嶼，就表示多一片自由既土地。」
「島代表土地，城代表和平、安穩。一開始就居住係度人，擁有呢片土地，所以被稱為『北島』，然後第一批定居落黎，係呢度建立村落既人，被稱為『城』。呢兩班人為呢片土地帶黎新既生機，久而久之，呢度用咗佢地黎命名。
「『島城』一直安穩和平，好多唔同類型既人開始搬黎住，直到有一日，發生咗一場大火，大火不斷燒不斷燒，唔單只建築物，連人都一樣，一夜之間，屬於『島城』既野幾乎完全消失哂。」
我：「點解會咁？」
佢：「因為有個人放火。」
我：「放火？」
佢：「嗯，佢放左一把火，燒毀咗『島城』。」
阿宗(13)
於是果晚，我地三個去到地盤。
係地盤門口，我聞到強烈既燃油味。
但係阿輝唔理三七廿一就跑左入去，隔咗一陣，我聽到有人傾計既聲音，於是我都慢慢行入去。
阿輝(9)
我入到去，見倒兩個人，係地盤既工人，佢地已經死咗。
然後我見倒一個男人，佢坐咗係度，係佢。
我諗返起果一刻，十幾年過去，我都忘記唔倒既一刻。
果次我地成功偷咗野，係海邊慶祝，我地好開心飲左好多酒，不知不覺就訓著咗，醒返之後得我一個人，我慢慢返行返去村，我見到成條村都好爛，不斷走都冇人，只有一個小妹妹訓左係水池邊，佢身邊有一個盒，我揹起佢四圍走，然後我見到佢，佢拎住一支火把，開始燒著我既屋企。大火一直燒一直燒，我既家係一夜之間燒成灰燼。
我：「湘蘭呢？」
佢冇答。
我：「你到底想點。」
佢冇答。
我：「你要報仇，報係我身上咪夠囉，你放咗湘蘭啦。點解要連累湘蘭，佢無辜嫁，佢咩壞事都冇做過。」
佢冇答。
我：「你已經殺死哂所有人，點解仲唔肯放過我地。」
佢冇答。
我：「我地根本就冇害你。」
佢冇答。
我：「我地只係想過安穩既日子啫，禁難咩？答我啦，做咩唔答我呀！」
我用力捉住佢既手臂，發現佢既身體好凍。佢心口插住咗一條鐵枝。
呢個時候，旁邊有人走過黎，係湘蘭。
我：「湘蘭……」
湘蘭：「阿輝……」
我：「湘蘭！係佢呀！」
湘蘭冇出聲。
我：「你睇吓佢，比鐵枝插住，就黎死喇。」
湘蘭冇出聲。
我：「禁多年，終於俾我等倒呢一刻。」
湘蘭仍然冇出聲。
我：「人渣，等我送你一程。」
我伸手打算將鐵枝拔出黎。
「啪」我塊臉突然感受到一陣熱，湘蘭企咗係我側邊。
湘蘭：「阿輝，夠喇……」
我：「做咩呀你？」
湘蘭：「一直以黎，我地都誤會咗。」
我：「點會誤會呀！係佢呀！佢害死哂我地既家人呀！」
湘蘭：「阿輝！唔係咁嫁！」
我：「咩唔係咁呀，佢殺咗人呀！殺咗工人，殺咗工頭，連我地佢都想殺埋呀。」
湘蘭：「唔係呀！你仲唔明咩，佢地係海盜呀。」
我：「邊個係海盜呀？我同你點會係──」
海盜。
當寶石傳說再開始既時候，海邊多咗好多新面孔，阿明同阿泰，係我係果度認識既朋友，佢地帶領其他人發現好多新事物，我都係其中一個。
後來，佢地開始認定寶石就係呢個島嶼上面，大家都好興奮，於是有一次，我答應佢地幫手，去一個村落邊緣既房屋偷野，我開車帶佢地繞過山頭同樹林，走到房屋既外面，呢條路並唔易行，唔係住係村入面既人唔會知道，我將車停低，等佢地將戰利品拎上車再離開。
果次我地成功偷咗野，係海邊慶祝，我地好開心飲左好多酒，不知不覺就訓著咗，醒返之後得我一個人，我慢慢返行返去村，我見到成條村都好爛，不斷走都冇人，只有一個小妹妹訓左係水池邊，佢身邊有一個盒，我揹起佢四圍走，然後我見到佢，佢拎住一支火把，開始燒著我既屋企。大火一直燒一直燒，我既家係一夜之間燒成灰燼。
阿明同阿泰冇再出現過，直到呢一刻，佢地訓係地盤既中心。
阿榮(4)
有人黎襲擊我屋企，佢地用棍打我，整爛哂我屋企既野。我追出去，但係佢地上左一架車，架車愈開愈快，我盡全力追，但係都追唔倒。
原來佢地已經知道咗村落既位置。
我不斷想走返入村話俾佢地知，但係眼前既野變得模糊，然後係漆黑一片。
當我醒返，已經係凌晨，我趕去大街，但係已經太遲……
我由街頭行到街尾，每家每戶都係一樣，唔知行咗幾多間之後，我停低左，我已經冇力再行我覺得個胃好痛，覺得心口好似有野塞住，呼吸唔到。唔知幾耐之後，我先意識到自己跪咗係地上面，成個身體都係冷汗。
阿宗(14)
老男人坐左係地上面，胸口比一條鐵枝插住。
阿輝企左係側邊，湘蘭扶住老男人。
我嘗試搖醒阿輝，但佢只係失神咁望住我。
老男人睇黎受到好嚴重既傷，佢抬頭見到我，問我。
「後生仔……耳環搵倒未？」
好可惜，我身上既耳環放係佢手。
「對唔住……」
老男人望一望掌手。
然後湘蘭將另一隻耳環拎出黎，疊係上面。
佢笑一笑，然後用手將兩隻耳環合埋，扭動，藍寶石既部份打開，裡面各自裝住一隻銀介指。
「咁多年喇，估唔到仲係度……」
阿榮(5)
我第一次黎呢個島，遇上一個女人。
每次我再黎，我都會去搵佢，佢係一個好溫柔體貼既女人，善解人意，而且好細心，我愛上咗佢。
我希望可以同佢一齊生活，但係我只係一個普通既船工匠，冇辦法俾倒佢啲乜野。於是我決定再一次出海，我打算完成最後一次尋寶旅程之後，可以最風光既形式娶佢，於是我又再一次離開佢，係船出航既日子，我同佢都係海邊用力咁揮手。
尋寶花費既時間雖然長，但係最終亦有所回報，我地搵倒一箱寶物，我得到一粒藍寶石。
或者係命運既安排，幾年過去，我又再返到黎呢個島。但係當我再去搵佢，佢唔肯見我，我四處打聽，原來佢已經決定嫁俾人。
我冇野可以俾到佢，所以我整咗一對藍寶石耳環，係新婚既日子作為對佢地既祝福。
後來，我定居咗落黎，係村既邊緣起咗一間屋，屋後面有個大空地，可以睇倒海，
新婚之後佢黎過一次，佢見到果個大空地，望咗好耐。
我：「黃昏會有好靚既夕陽，夜晚仲可以睇倒星星。」
海風吹過黎，佢長頭髮自然咁飄起。
佢：「呢度好靚。」
我：「嗯……」
佢：「多謝你。」
我：「嗯？」
佢：「多謝你仲記得。」
我記得，記得佢想有個睇到海既家，可以睇住船隻黎黎去去，記得佢想有個睇到夕陽既空地，可以享受比其他人更多既黃昏，直到太陽沉沒海底。
我想一直留係佢身邊，守護住佢，但係到咗佢需要我既時候，我乜都冇做到。
阿宗(15)
老男人既聲音愈黎愈細，不知不覺，佢就訓著咗，臉上面仲殘留住兩行淚痕。
我地聽到有腳步聲走遠，我追咗出去，見到一個女人，係呂敏。
佢背對住我，開始跑得好快，然後慢落黎，最後停低左，踎咗係地喊。
我發咗一個白日夢。
* * *
「我想要一個名。」
「咁以後，你就叫阿宗。」
男人帶住我，返返去寂靜既街道，我地走訪每一間房屋，敲門，行入去，有一個個訓左既人，男人用手將佢地雙眼合埋，然後我地一齊將訓咗既人搬出屋，放上木頭車，推去山坡，將佢地埋入泥土。每完成走完一間屋，我地就會燒一塊木頭。
每個木頭上面都寫住一兩個字，但係我睇唔明，我只係努力咁埋葬訓覺既人，同埋燒木頭，最後我個箱入面所有木頭都燒哂。
我地埋葬完最後既兩個人，男人係女人身上面發現一張紙，佢仔細咁讀完果張紙，然後係身上面拎左兩塊用繩連住既木頭出黎，將佢燃著成一支火炬，一直行一直行，停係一間屋外面，用火炬點著咗佢。
火勢漫延得好快，一間連接住一間，好快所有房屋都被火海包圍。
我地見到街既另一邊，有一個男仔揹住一個細路女，佢地望住我地。
我跟住男人，去到街道既邊緣，果度有一間破爛既木屋。
男人行入屋，搬開好多破爛既雜物，入面有一個女仔。
女仔耳朵既形狀都好靚，頭髮柔和咁散落係耳背上面，心口有一條縄，掛住一粒閃亮既藍寶石。
* * *
阿宗(16)
地盤開始著火，火勢漫延得好快，一直燒一直燒，將一切都燒成灰燼。
從果日開始，我再冇發果個夢，亦都再冇見到果兩個人，島城既事，工匠既事，藍寶石既事，都被大火燒成灰燼。
我發覺，我地每個人都曾經生活係陰影之下，失去親人既陰影，失去熟悉事物既陰影，失去希望既陰影。
於是我地重複做一件事，就係為咗脫離過去既陰影。
但係人唔可以永遠都做同一件事，永遠做同一件事既話，可能慢慢我地唔再係本來既自己。
呂敏佢慢慢失去緊自己。
阿宗(17)
我帶咗呂敏去到廢屋，係廢屋既瓦礫入面，我搵咗幾塊比較完整既小石頭，疊起一個小石塔。
佢問：「係咩黎？」
我：「係墳墓。」
佢：「墳墓？」
我：「係屬於我地過去既墳墓。」
我捉住佢雙手，等時間過去。
我地一齊坐係廢屋前既大空地，直到晨曦既光線照亮眼前既景色。過去或者係令人可怕，但係未來，可以靠我地雙手建造。
＜完＞
高人指點
Follow 爾雅集