《下一刻，將會係呢度最燦爛既一刻》 by 韓家驄
喺唔知幾時開始，我有一個近乎直覺既欲望：「我地將會喺度建立一個屬於我地既民族，然後我地會建立一個屬於我地既國家，香港會進入下一個時代。」
呢度既人一直歸納我係一個因為喺現實無機會向上爬而遷怒社會既失敗者。一啲都唔覺得出奇呀，因為我知道甘樣先係我熟悉既島城，甘既反應先更加證明我呢個諗法係正確。呢度係香港，我出世既地方。
有關呢度，相信已經有好多人對佢既充滿傳奇色彩既歷史背景，又或者佢獨有既華洋反差共融既文化都有深刻既描寫。但我認為要帶出一撻地方最真實既一面，最好就係睇下喺果度長大既人。甘究竟島城人係點既樣呢？
「香港人呀？好搏架。我地呀，一至五加班，每個月六七十個鐘加班走唔甩，就算放工都要顧住部電話覆公司電郵。我地好踏實，每日都奉獻俾工作。你睇其他國家點解又低迷又破產又盛甘，梗係啦，佢地淨係坐係度嘆下咖啡，每日晏就三四點就放工，怪得邊個？」
「香港人呀？識得走位變通囉。我地因為物資短缺，人力又短缺，要點樣善用手上擁有既，就係我地最善長既。我地可冧掂啲老細，等佢地俾生意我地;又馬得住啲細既幫你做牛做馬，等我地可以如期交貨。哪，就好似咖啡我地做得唔夠人地好，奶茶又唔夠人地正宗，不過我地動下腦筋，一杯鴛鴦就做到世界馳名。又好似菠蘿油甘，只係夾塊牛油落個菠蘿包度，除左味道提高三幾倍，售價又可以買高三幾倍，雙贏。」
「香港人呀？梗係獅子山精神啦。當初一個細細唔顯眼既漁港，憑住我地一雙手，變成國際大都會。乜野大制水、三年零八個月、六七暴動、股災、沙士、雷曼……我地經歷過一個又一個既難關但我地都無放棄，一直咬實牙關，一級一級爬過。不朽香港名句就係靠我地揼石仔一下一下甘鑿返黎。我地呀，好捱得架。」
呢度十個香港人有八九個都會甘樣介紹自己，但呢啲特質係咪就代表到香港人？有邊個會同你承認今日既香港人根本就係一班徘徊喺過去、沉迷小確幸、流連喺舒適區、墜落既一群？黎，等我話俾你聽我地係點。
我地好迂腐，我地會俾歷史綁住我地既思想，我地評論事件既時候唔係環繞事件既本質。我地好強調我地既祖先來自邊個國家，遠遠多過屬於我地子孫既國家。我地會用所謂既血統把自己圈起，然後組成今日既社會。喺呢度，唔係講擁有共同既價值同目標而係講擁有共同既祖先。
我地好軟弱，我地無遠大的夢想，我地終日只會流連喺果種瞬間既安慰。我地唔會追逐如何強大，我地係追逐如何弱小得惹人憐愛。我地唔會去諗大事，但係我地鍾意點樣將細微細眼既野諗到成件大事甘，我地沉溺到唔只唔覺得甘樣係羞恥甚至認為呢啲先係人生既意義。即使身處斷頭台，可能我地仍然會諗住屋企貓仔既小肉球、上載最後晚餐既甜品相、又或者會扮一個知識份子，然後寫一首憂鬱既新詩。
島城人喺呢兩年捲起一陣名叫和平理性非暴力既抗爭之風。而其實大家心裡面都知：又係我地新起既舒適區。我地喺裡面過得好安心好滿足，因為我地可以好低成本叫自己做抗爭者，然後又可以好低成本甘俾啲掌聲自己。一班被講成香港希望之光既左派理論家帶黎呢種既抗爭模式係唔需要群眾集體罷交稅又或者建立新政府，和平理性非暴力之餘，更重要既係廉價低付出。佢地帶黎既係「我們都是乜乜乜」遊行、係掛直幡、係搞晚會。呢種甘體貼、甘討人喜愛既抗爭我地最鍾意。
唔好以為我好憎呢度，相反我好鍾意呢度，我鍾意呢度既程度，係我會因為佢未成為一個國家而心痛，同時又會偷偷慶幸我可以趕喺呢個佢未係一個國家既時代出世。可能你會覺得好難理解，但其實就好似中學年代，你同坐喺你隔離果位女神之間既果種互動甘。曾經佢向你訴苦，你睇住佢因為失戀喊到隻眼都腫哂，覺得好心痛好無助好想幫佢，你會諗一個甘好既女仔點解要受啲甘既苦。之後單身既佢小息果陣成日同你傾心事，放學之後會糖黐豆甘搵你去玩，你呢，得閒會為佢整下啲小驚喜氹佢開心。你會諗自己好好彩唔單只可以係佢單身時同班，仲可以坐喺佢隔離，或者係命運想自己做佢生命中果位既男人，等佢以後都好幸福。我對呢度既愛，大概就係簡單到甘少年情懷。
而正因為我鍾意呢度，我諗好多關於呢度既野。我知道呢一刻，我地的確未係時候可以以成為一個既國家。唔係因為乜野無軍隊呀無水無糧呀，而係我地呢一代本身就有太多缺陷：偽善、軟弱、膽小、盲從……一直以來對呢啲弱者性格既放任同唔理，做成今日既島城依然孕育唔到一個強大既民族，成為一個國家。所以呢啲缺陷都係時候喺我地呢一代結束，唔可以再俾佢地繼續傳承落去。亦只有甘樣，我地既民族先可以順利喺呢度誕生。
我地將會係前所未有甘強大。我地將會擁有與生俱來既勇氣；唔會怕改變，只要果個改變係對呢度好，我地會大步跳出佢地既舒適區。我地再唔係因為過去而被綑綁埋一齊；而係因為擁有共同既價值同目標而連結喺黎。我地會肯定自己既歷史，不過更加重視通往未來既路。我地會將香港視為上天賜俾我地既福地；能夠喺香港出世會被視為上天既祝福。職業同收入唔再決定一個人係咪受尊重，思想同意志先係呢度量度人既果把尺。
一個高貴而自由既意志係唔應該因為世俗既諗法而自斷雙翼、亦唔應該因為要遷就世界而削去稜角。可能以上唔係主流對香港印象同期望，但我認為絕對要為島城寫低呢一頁，因為我想話俾大家係二零一六年喺呢片土地，係有人就係甘純粹鍾意呢度、就係甘純粹想建立一個強大既民族、就係甘純粹想呢度獨立，成一個國家，而當中一丁點仇恨都無。「下一刻，將會係呢度最燦爛既一刻。」我認為呢種種純粹唔係夢想，係國魂。
高人指點
Follow 爾雅集