四大天王的滄海遺珠 (1)

90年代嘅香港樂壇百花齊放,當中四大天王嘅歌曲更加係膾炙人口,不少歌曲到今時今日仍為一眾樂迷至愛。當中除了數之不盡嘅首本名曲,還有好多極具可聽性但不為人所熟悉嘅滄海遺珠,呢堆歌曲當年未必係主打,但筆者希望介紹俾各位,等大家重新欣賞及回味一下本地歌曲嘅輝煌時代。

要從學友嘅歌曲找滄海遺珠並不容易,因為基本上佢所演唱過嘅歌曲,大部份都為樂迷所熟悉,每一首都耳熟能詳。筆者最近聽返佢10多年前嘅作品,很喜歡當中的<有病呻吟>。此曲收錄在其2001年的專輯<天下第一流>,由林健華作曲,歌詞則由林夕負責。這首歌在專輯推出時,是安排作第三波主打,知名度其實亦不算低,只是後期這首作品不常被公開演唱,在K房熱唱度亦不高,所以漸漸被人淡忘。該專輯推出時,其實學友已有兩年沒有推出廣東大碟,小休復出,加上其時唱片行業逐漸步向低潮,故樂迷對此專輯是有所期待。記憶所及,大碟推出後,外間反應好壞參半,可能因為專輯所選取嘅歌曲風格跟之前嘅大碟有所不同,但不論如何,整張專輯製作都相當認真,始終歌神並非浪得虛名。

說回<有病呻吟>,歌曲本身訴說的,是當生病時,想起分手伴侶那種淡淡然的哀傷。故事一開始講述生病接著描述獨自留在家沒人照顧,再而回想起以前一路陪伴左右嘅伴侶,關係已今非昔比,圖添幾分悲痛。文字演繹往往是一首歌曲嘅靈魂,林夕嘅詞亦有其一貫水準,喺<有病呻吟>入面,佢運用好多生活日常嘅鎖碎事,將失戀比生病更難熬這種意境完全表達出來。想像一下,平日就算只是患感冒都已覺得相當難受,但為何偏偏要喺呢個時候碰到失戀,需要某人但某人已不再陪伴身旁?第一段歌詞就有一句,描述高燒後,「然後鎮靜情緒,忘掉我這裡應該… 有誰」。

相信失戀你我也曾試過,繁忙都市,男歡女愛之事,可能已經沒太多人對之認真著緊,好多時人們以為自己不會為離離合合這些等閒事上心,但可惜往往喺夜深人靜,獨個自處時又會不自覺地想起他/她。副歌部份就有這一段;

如果失戀註定逃不過 逃到病床前才明白更多
和你分手都也捱得過 然而這夜為何無能力退燒 多麼錯

至於編曲方面,同樣由林健華負責,由於筆者不懂樂理或任何樂器,固只能單憑感覺去欣賞及判別編曲手法。當中有一些小細節,倒可看出製作人喺處理上係花過心思,例如開首以結他彈奏,沒有太多伴奏底下,音樂營造出孤獨嘅凋零,與歌詞描繪嘅情景互相呼應,曲詞配合度頗高。後段雖然較激昂,但學友在演繹上沒有用以往那種激烈唱腔,反而唱出患病時用盡力氣說話的無力感,演出恰到好處。

P.S. 執筆時剛剛聽到劉華受傷嘅消息,希望佢平安無事,所以下一篇筆者會選劉華嘅一首舊歌作介紹,請繼續留意。

little@iron.com'

小鐵

初為人父, 平時愛看美國漫畫, 欣賞各類電影, 不時會以戲論政, 借題發揮(or抽水)

More Posts

高人指點

comments