Ali,點止飛躍咁簡單?

所有圖片來源:Ali Facebook

所有圖片來源:Ali Facebook

啱啱完咗嘅無線頒獎典禮,Ali攞咗飛躍進步女藝員獎,佢自己都話2016年係好圓滿嘅一年。其實講真,我並唔認為佢只係飛躍咁簡單。坦白講,作為一個80後,無線嘅編劇水準近十幾年真係吸引唔到我集中精神睇電視,除咗神劇《天與地》,我都無咩印象有咩特別精彩,我係會記得劇情或者對白嘅劇。宜家如果唔係有Ali,我真係唔會望實個電視,甚至連今年應該壓倒性優勢攞男配角嘅吳岱融我都無機會見識到…唔係講笑,連《巨輪》第一輯我都無興趣睇,點會有興趣睇第二輯?

1001028_1302369479776693_8757723955060278069_n

雖然我唔係一個演員,亦唔係一個影評人,但電影、電視劇都叫睇唔少,當然係日本嘅多,法國、英國嘅只係睇過下,咩叫好演技都識分嘅。近嘅有張國榮、張學友,遠少少嘅有北大路欣也,Daniel Day-Lewis,其實Keanu Reeves我都好欣賞。女演員除咗我成日提嘅武井咲,我都幾欣賞比較年輕嘅王敏奕同當年演《伊莎貝拉》嘅梁洛施。當然,我唔係話後兩者宜家已經可以同果幾位男演員相題並論啦…

1535022_1302370363109938_8904220456949287370_n

點解講Ali要講其他演員?因為我唔係一個fans(過咗三十歲仲fans咩,雖然我其實幾多歲都無做過fans),都真心認為佢今年嘅表現絕對可以拎埋最佳女配角同我最喜愛女角色。唔好誤會,我唔係唔鍾意龔嘉欣,佢幾年前喺《拳王》嘅演繹我已經有留意,而且佢都幾靚女。只係我從來都唔覺爆喊等如好演技,即使龔嘉欣爆喊係喊得好過鍾嘉欣。我又唔係話龔嘉欣個角色做得唔好,相反,由頭到尾佢都做得唔錯,不過爆喊果幕又真係…差少少。而Ali喺《潮流教主》入面嘅紀芸芸同埋《巨輪2》入面嘅鍾穎,都肯定唔差過龔嘉欣嘅演繹。你問我會唔會自己打自己,兩個角色邊個做得好啲,我都考起…不過紀芸芸嘅戲份多啲,有得揀我會投Ali憑紀芸芸攞最佳女配角。最喜愛女角色唔洗問啦下話?梗係《律政強人》嘅Hazel啦!我絕對認為Hazel攞最喜愛女角色同吳岱融攞男配角一樣,贏三條街,根本無得爭。

話時話,《律政強人》同當年《天與地》一樣,由劇本到cast都應該橫掃頒獎禮,雖然無後者咁誇張,應該掃哂男、女主角配角兼劇集,但明顯地係好過《城寨英雄》好多,唔係同一級數…

10363540_1302371416443166_6418329568755044142_n

Anyway,講番Ali,真係一個好特別嘅演員。一開始做嘅情婦類角色,以佢本身性格比較靜、內斂,仲會一個人行山嚟講,我到宜家都理解唔到佢點樣揣摩呢類角色。雖然佢係比較遲開始拍劇,但憑著佢驚人嘅掌握角色能力、每個角色都演繹到唔同嘅性格,我對佢嘅信心可能仲大過佢自己。話時話,胡定欣同朱慧敏都做咗好幾年情婦、妖女先有機會做其他角色,Ali都算幾快有機會轉型。順便講多句,咩叫掌握角色能力高低?反面例子唔洗睇得遠,無線就有。有無發現鄭嘉穎做任何角色都係chok到盡型半集,跟手就嚟個烚熟狗頭傻笑?除咗造型唔同,真係分唔出有咩分別。

14963257_1503097246370581_4425050063469082541_n

最後要講嘅梗係我個要revised嘅香港美女排行榜啦,Ali已經取代咗Lilian Kan嘅三甲位置喇~唔可以唔提嘅係,Ali真係幾適合唔同類嘅造型,最少型格、女人味都絕對無對手,絕對可以係技壓Janice Man嘅fashion icon!其實有機會嘅話,佢真係唔會輸俾日本嘅北川景子,最起碼北川景子喺《探偵の探偵》入面嘅型格style Ali全部都carry到。而且雖然做打女應該唔啱Ali,不過呢類行動力強,果斷、敏捷嘅女偵探角色應該幾啱Ali做。可惜,偵探劇真係唔係無線強項…

(編按:作者無facebook就索性放Ali Facebook算,作者send圖過嚟有編輯懶得source返晒啲圖嚟embed落篇文度……)

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments