我的日本美女排行榜三甲

之前寫《夢想女朋友排行榜》講過有分香港榜同日本榜,一路都無留意原來我介紹完日本榜首之後未介紹現任三甲…宜家發現咗即刻補番篇~

圖片來源:epochtimes

圖片來源:epochtimes

其實第二名同第三名真係好難分高下,兩位年齡相約,分別喺唔同時間都紅到係佔據香港買到嘅日本雜誌一半嘅cover,而且都係fashion icon級數。最後,我都係決定由上過我嘅榜首,亦都喺唔少日本排名榜排過榜首嘅北川景子排第三。

圖片來源: elle.tw

圖片來源: elle.tw

圖片來源:on.cc

圖片來源:on.cc

先利申,雖然我高中開始已經有睇日劇,但其實以日劇迷嚟講我係未到入門級,所以我講嘅資料唔一定準確。北川景子係03年拍《美少女戰士》出道,當年17歲包包面嘅佢並無走紅。走紅係靠09年尾嘅《零秒出手》,之後憑住佢嘅標緻五官、長髮,加上身形比例極出色(最少我完全無留意佢其實幾矮,只係比石原里美高一寸),我印象中大概係10年、11年有喺金鐘廊嘅雜誌店見過佢真係佔據咗所有雜誌嘅一半封面。當年前任日本第一美女、Shiseido嘅首席模特兒伊東美咲已經算淡出,北川景子輕易憑更標緻嘅五官、年輕近乎十年成為我嘅日本第一美女。雖然唔夠一年佢已經被武井咲踢咗落我個排行榜第二位,但事實上佢喺日本,不論男、女眼中,都唔止淨係dominate咗咁短時間,直至石原里美憑《失戀巧克力職人》突然爆紅,男女通殺為止。

圖片來源:gq.com.tw

圖片來源:gq.com.tw

根據Oricon嘅年度「女性最想擁有臉孔」選舉,北川景子喺連續四年榜首後終於喺2016年被石原里美壓倒,成為第二名。石原里美宜家係日本10代、20代、30代嘅fashion icon,佢每套劇基本上都係fashion show,不過,北川景子其實一樣出色,佢舊年嘅《偵探的偵探》入面嘅造型我都推介咗俾個靚女friend,甚至以佢嘅標緻五官、纖細身形,我個人認為佢喺2011年嘅Paradise Kiss扮演國際級名模亦極有說服力。

圖片來源: ETtoday新聞雲

圖片來源: ETtoday新聞雲

圖片來源:vogue.com.tw

圖片來源:vogue.com.tw

我自己排行榜嘅第二位,就係石原里美。講真,如果淨係講靚,毫無疑問係北川景子靚啲。但講吸引力,睇過《失戀巧克力職人》嘅都好難否認,小惡魔石原對男人嘅殺傷力真係無敵級…佢唔止係可愛度爆燈咁簡單,又唔完全係只係可以扮無辜,雖然同北川景子完全係兩類風格,但的確都係強大到男女通殺,真真正正嘅女神級人物。我無辦法好客觀指出佢無敵嘅原因,客觀嚟講我都係覺得樣同身形都係北川更勝一籌,不過明顯地,男人要拒絕石原會被拒絕北川難好多。另外,由雜誌協會舉辦嘅「Cover Girl大賞」由於只有兩年歷史,都係由石原里美以35個封面同26個封面成為榜首,而2016年睇怕都係石原無對手地繼續蟬聯,所以我都唔知早幾年北川每年有幾多個封面。簡單講,北川同石原都係1986年出世,都係2003年出度,不過唔同風格,一個紅早幾年一個紅遲幾年。之後比較難估,北川嘅風格理論上universal啲,不過啱啱今年結咗婚,而石原雖然睇落比真實年齡後生幾年,不過呢個風格難以想像可以dominate多兩、三年。

圖片來源:奇摩新聞轉載

圖片來源:奇摩新聞轉載

最後就係武井咲喇~無咩好講,16歲攞Best Dresser賞,唔止係史上最年輕嘅得獎者,仲係同幾個四十幾歲同五十幾歲嘅一齊攞獎。17歲拍套劇就無對手地攞日劇學院賞女配角賞,佢嘅表現就算係強如松隆子如果喺同一季要同佢爭都爭唔贏。同年亦成為Gucci第一個簽嘅日本代言人。18歲係年度收入最高女藝人,18、9歲繼續橫掃電影新人獎,包括學院賞、評論家大獎,21歲仲攞埋最佳動作女星獎(套戲20歲上,唔知係19定20歲拍)。由於我已經另外寫過文介紹,所以唔講太多,簡單講,喺我眼中嘅武井咲,有佢嘅出現所有天才女演員、咩百年一遇、千年一遇美女全部都黯然失色,輸唔止九條街,根本唔可以同場較量。

圖片來源:SHISEIDO廣告

圖片來源:SHISEIDO廣告

圖片來源:http://topicks.jp/

圖片來源:http://topicks.jp/

日本靚女係比較多,而且水平普遍比香港高,例如崩壞前嘅戶田惠梨香,加藤愛、堀北真希,唔太啱我口味嘅佐佐木希、橋本環奈,可愛類嘅有村架純、新垣結衣,唔算靚但好有女人味嘅黑木美沙,真係我都唔知數漏幾多。當然,分別更大嘅主要係化妝技巧同fashion 配搭sense,真係講吸引力我個香港排行榜啱啱取代咗Lilian Kan個第三位嘅Ali,第二位嘅Kabby同榜首嘅王敏奕其實全部唔輸蝕,甚至單講著衫效果,Ali可以同北川揮過,演技亦更勝一籌。

等我認真考慮下專門為Ali寫一篇文先~

aragorn.ho@gmail.com'

明鏡

商科出身,一直認為自己是商界奇才。大學時期嫌課程沉悶,把時間都花在哲學、文學上。近年興趣為時裝、電影。

More Posts

高人指點

comments