一粒魚蛋引起嘅用字迷思

cc photo by flcikr user boon chuan low

cc photo by flcikr user boon chuan low

如果有人攞住一串龍津嘅咖喱魚蛋,已知佢嘅味道係中挺(戴頭盔:性價比合理嘅),然後同你繪聲繪影咁講:「依啲魚蛋真係天上有地下無!」你會點諗?
1.依個人真係覺得啲魚蛋好好好好好好食
2.依個人見識少,未食過神級好食嘅魚蛋,至少佢應該未食過林昌記
3.依個人唔識「天上有地下無」係咩意思

好多時我會聽到一啲幾哽耳(http://words.hk/zidin/%E5%93%BD%E8%80%B3)嘅用字或詞句,然後過耳即忘,久而久之可以將不擅溝通(有啲自己都唔自知)嘅人分做兩類:

a) 用字唔精確

即係上面例子3.的類型。再舉個例:有個朋友托咗我手肘,咁我梗係嬲同忟咖啦。事後佢道歉,但類似語句係: “Sorry that I made you suffered.” 令人皺眉。我可以係annoyed, 我可以係pissed,但唔係suffered。
Suffering,痛苦,係一種深層嘅苦難,唔係表層嘅憤怒,而係骨子受折磨後靈魂哀嚎式嘅辛苦。依個朋友可以用錯依個字,大部份原因係所有字都對佢嚟講都差唔多,唔開心係痛苦,傷心係痛苦,懊惱、惆悵、無奈、悲憤、抑鬱都係痛苦。

如何解救?睇多書同字典,諗多啲,正如講咗巧多次:「認為」同「覺得」,係兩樣嘢嚟咖!

b) 睇世界唔夠清晰

咪成日話人:「把自己看得那麼大」嘅?當一個人錯判自己嘅位置,就會開始有啲奇怪嘅用字出現(依樣嘢日文啲敬語發揮得淋漓盡致,你用錯都幾突兀),例如自己結婚叫做「本人大婚」,無rank嘅人叫自己老婆做「我夫人」,讀者叫編輯「喂小編呀~」。
你嘅positioning錯咗,自然會用錯字。再嚟一個例子,我愛你,你唔愛我,我走去唱:「最愛你的人是我 你怎麼捨得我難過」係一件幾odd嘅事,你唔愛我梗係捨得我難過咖啦!依個係一個思維嘅問題。
除咗係個人立身處世嘅定位外,依種模糊嘅思維延伸到世界:除咗我好重要之外,我嘅一切都係世界嘅定義!(多麼強國)是以就會有第2.類人出現,如果依類人無知則無救--我係覺得我最叻我最大我夫人最靚、龍津魚蛋係全世界最好食嘅!但如果保持一顆自覺嘅心,明白永遠都天外有天,依啲語病會漸漸改善,由「依啲魚蛋係全世界最好食嘅!」變成「依啲魚蛋係我食過最好食嘅!」--
無人會話你,或者你真係未食過更好食咖呢?你咁講,就開始有人唔係恥笑你,而係真正同你溝通喇。

呆總

爾雅集總編輯,他們如此叫我,我便有如此稱號。 以文會友,不問姓甚名誰,不理江湖恩怨;勸天公抖擻,樂見世間文章不拘一格。不小器但挺怕煩。

More Posts - Website

高人指點

comments