論港獨:「可不可行」和「應唔應該」

cc photo by flcikr user Mike Behnken

cc photo by flcikr user Mike Behnken

我相信好多人,對港獨呢個議題只係沉默。未必係大多數,但肯定有好多人冇講出心底說話。

有人話港獨不可行,我都同意。事實就係,喺可見將來,港獨唔會發生。但一樣嘢「可不可行」,同「應唔應該做」,係兩回事嚟。

支持港獨嘅人,從來都冇話路途輕鬆,反而係有一種「知其不可為而為之」嘅精神在其中。真正反對港獨嘅人,唔係同你講 feasibility 架,係會同你講「港獨唔應該做」。重點係「應唔應該」,而唔係「做唔做到」。

舉個例,你問人應唔應該偷嘢。正常答案係「唔可以,因為咁做係錯嘅,所以唔應該做」。但如果有人答:「唔得架,俾人捉咗會坐監」,咁你都會疑惑,究竟呢條友道德底線去咗邊。如果偷嘢唔使坐監,可能佢第一個走去做賊。

好多人搞亂「應然性」同「實然性」嘅問題,浪費口水,其實可能香港人所持立場都好接近,只係見到可行性咁低,唔想瞓身或者付出啫。

好多口口聲聲話支持港獨嘅人,都未必肯犧牲。其實佢哋同啲話「港獨唔可行,不如算數啦」嘅人所持立場,實質上冇咩分別,只係前者會喺媒體上口頭講獨啫。

但*假設*有一日,港獨勢力搞得有聲有色,終點遙遙在目,嗰班「港獨不可行」嘅人究竟係會係支持定係反對,真係冇人知。可能香港人只係現實 (practical),而唔係咁愛國愛黨。

張德江話唔好輕視港獨。其實亦都係講實話。香港人成日話中共壓迫乜乜乜,其實如果倒返轉,你坐佢個位,就知道中共對香港嘅合法手段,可用嘅手牌極其有限,佢要耗盡九牛二虎之力,暗地裡做好多唔見得光嘅功夫,先可以迫到香港嘅政客歸邊。你諗下連一個建制派立法會主席都唔肯乖乖聽話,佢哋幾咁擔心。

喺香港,真係好少人會話「港獨係唔應該做架!就算可行都唔應該做呀!」嗰啲係真正嘅統派。其他人,都只係騎牆,佢最後跳向邊一方都好難講。

散彈一號

全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

More Posts

高人指點

comments