吉列牛專門店 – 琥酌
香港首家 吉列牛 專門店上線囉（普通話）！真係首間？我唔知。我只可以話，呢間係太子新開既餐廳 – 琥酌 真係食得過，人頭$300聰明地試哂兩種吉列牛。
所有圖片來源：作者
餐廳主打兩款牛吉列套餐，包括親民既牛吉列御膳同埋貴價既霜降牛列御膳，每個御膳都提供一套既配菜：山葵汁漬白玉菇、龍蝦薯仔沙律、木魚絲白飯、赤麵豉湯、椰菜絲同溫泉蛋。老老豆豆，個白玉菇係醃得幾好食，幾開胃。
牛吉列御膳
親民版既牛吉列御膳，用上美國安格斯牛肉，濃濃既肉香，比A5和牛厚大既面積，仲有Juicy肉汁，成個餐收你$178，相當親民。
霜降。牛吉列御膳
而霜降牛列御膳用上日本鹿兒島A5和牛，油脂同紅肉相間，體積較安格斯牛少而肉質較軟。食落口，油脂味做底令肉味更加突出，少量既筋位增加咬口，食過真係難以回頭。
點樣食 吉列牛 最爽？
潮童係到建議，最好雙數成團，兩個一組咁去食，要哂兩個吉列牛套餐，除返開都係$288位，三百有找。
有幾點要提提大家：
1.其實兩個餐各有優點：單點A5和牛可能太油太溜，單點安格斯又唔盡興，咁不如要哂兩個Share食，Balance返仲好；
2.留意燒既次序：先燒安格斯牛，體驗肉味；後燒A5和牛，相信你食第一舊就分別到同安格斯牛既分別，更加滿足。
混合黎燒唔係唔得，不過食完和牛食安格斯，或多或少都有失落既感覺。點解咁講，因為我試過，我真係試過；
3.每一個位都會提供一個爐仔，將吉列牛放上鐵板，隨自己喜歡咁燒。
個人認為安格斯牛要耐少少，約40-50秒；而A5和牛夠嫩，燒30秒左右；
4.餐廳提供相當多既調味料，除左燒汁、柚子檸醋、和風芥末、粗粒Wasabi、柚子胡椒蓉、辣椒岩鹽外，仲有我最鍾意既蛋汁，增加滑溜感之餘，亦無咁Dry；
5.提提大家，吉列牛供應時段只在平日既晚市；而星期六、日、公假則全日供應。諗著平日Lunch去食，只會白行一趟；
6.坐位有限，早小小卜位啦，唔係就要企街排隊。同埋，我食既時候限時六十分鐘，等齊人先好入；
7.餐廳仲有其他野食提供，比如鰻魚茶漬上定食，雞翼都相當吸引；
8.食完仲可以去後面街食個滋補花膠甜品 – 227甜棧 。
讚好「潮童焗飯」Facebook專頁，收受最新既資訊：
餐廳資訊：
琥酌
電話：2650 0505
地址：太子西洋菜北街159A地下 (太子站A出口，旺角警署對出）
營業時間：星期一至日: 12:00 － 15:00 ／ 18:00 － 23:00
高人指點
Follow 爾雅集