莫欺少年窮?Hey,窮先欺!

Cc photo by Flickr user Harald Groven

Cc photo by Flickr user Harald Groven

莫欺少年窮。
背後隱含嘅潛台詞,就係「即使少年依家可能好窮,但將來都可能會有出頭天」,所以你千祈唔好睇少佢。
不過事實係,大部分窮少年最終都唔會有出頭嘅一日,只會慢慢演化成為窮中年,再變成窮老年。
而如果有人自以為勵志咁大嗌「莫欺少年窮」,想話俾大家知自己「終須有日龍穿鳳」嘅時候,喺香港呢個階級結構封閉、缺乏向上流動機會嘅社會,佢嘅結局往往都係「一世褲穿窿」收場。

要知道莫欺少年窮呢句說話,從來都只係「得個講字」嘅說話。
譬如阿爸阿媽睇唔起你另一半搵唔到錢,你大可以話「莫欺少年窮」,等冇辦法預知未來嘅佢哋駁你唔到;又或者有人串你人工低,你同樣可以拋呢句出嚟,拎返個尾彩;再唔係欺人順便自欺,安慰下自己總會有發圍嘅機會一樣都得,絕對係送禮自用皆相宜。
因為喺現實中,欺唔欺你嘅決定權從來係喺人哋手中。
由窮少年冇叫價能力俾公司壓榨、到窮老人被逼住老人院俾人虐待,道理其實都一樣,正正因為窮,先會被人欺。正正因為窮,人哋先欺佢。

「人善天不欺」係簡單一個道理,「人善被人欺」聽落都好有道理。
但其實喺香港,欺唔欺從來都同善惡無關,只同你富定貧有關。人窮,容易被人欺,唯一可以做就係寄望大眾同情肯伸出援手;但當你人工高到一個點之後,莫講話企圖強姦都可以變非禮、迷姦完人都可能會俾法官讚。如果有錢之餘仲要位高權重,更加係點樣亂噏點樣明目張膽做壞事都冇人理到你,永遠只有你欺人而冇人欺你。

所以近日食環署職員票控清潔女工,唔少人鬧佢選擇性執法,絕對鬧錯晒。
佢只係見阿婆人又老錢又冇,身體自然反射咁上前票控「依法辦事」一下,滿足權力欲之餘又方便交差。
你唔會見到食環去搞隨地丟紙皮嘅走私客、票控污水亂排兼阻街嘅黑店,或者制止周街便溺嘅人形動物。因為佢哋見人似乎有兩個錢、有財有勢咁唔招惹得,再望下自己又覺得自慚形愧,逼不得已下身體居然失控,臨時發雞盲。
幾時都話:食環都係被逼啫。而既然佢哋都係逼於無奈,咪即係冇選擇性執法囉!

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments