10後年青人成功交租金上期,政府認為青年人仍有進步空間(中)

cc photo by flickr user Jose Santiago Tan

cc photo by flickr user Jose Santiago Tan

記者們有如烏蠅嬲蜜糖咁,立即就包圍住場內另一個焦點 - 黃小姐
黃小姐意氣風發嘅樣,同頭先陳先生完全係兩個世界,記者對佢就更有興趣。

「Well,我都ready 好哂,你地隨便問。」黃小姐講

「到底黃小姐你係點樣可以成功咁交到成2年嘅租金嘅呢!?」

「okok! Actually……」突然香蕉記者打斷黃小姐發言:「黃小姐,你介唔介意用返最基本嘅廣東話呢?」

記者們都忍唔住偷笑幾聲,黃小姐終於除咗佢副高級太陽眼鏡,反咗一下白眼繼續講:
「無架,其實係香港地做人,最緊要係咩呀?錢囉!所以我大學未畢業已經決定去做金融,傳銷,保險呢啲搵錢最快嘅嘢。
不過啲人成日都同我地呢行有微言架啦,又話我地呃人。痴線!你地啲廣告夠呃人啦,又唔見你地去話佢地!?
我地呢啲就係食腦嘅,如果唔係點搵大錢呢?點樣可以係呢啲新盤到交到租呢?」

「其實黃小姐,你可唔可以講下你點樣呃人錢?」香蕉記者又忍唔住,其他記者亦記唔住大笑一聲。

黃小姐仍然沉住氣:「你呢啲低層次嘅人就係咁講,我地有學識,專業人士就叫做『搵客』。總之唔理咩客都好,有錢就叫佢買嘢!唔理個樣係咩都好,最緊要有錢分,咁就得架啦!」

「咁你地覺唔覺得自己好cheap?」

「呵!?Cheap ? Cheap得過窮!?好似頭先你地訪問個陳君龍咁呀!佢先cheap!我大學個陣都唔知發咩神經先會同佢拍拖架咋,好彩過我之後醒目咋,馬上溝個有錢仔,如果唔係我依家個男朋友,我都好難交到咁多租金。」

「哦!!即係你男朋友幫你交租嘅。」一眾記者嘩然。

黃小姐立即尷尬到面紅:「哈哈,唔係唔係,我意思係我男朋友好支持我姐。所以呀,我係到同各位姊妹講呀,做女人最緊要鍚自己!你唔好以為愛情信得過呀,最緊要搵個靠得住嘅男人!咁樣先至對生活有保障架!而且……」

香蕉記者又再次打斷黃小姐發言:「不如講下你當選今屆傑青嘅感受丫?」

「哦~~其實都無乜嘢姐。我覺得做女人最緊要就係獨立囉。唔好以為成世都需要靠男人咁,最重要係自己識搵錢。那,好似我呢啲獨立嘅女性就係例子啦,我淨係今個月份佣金都夠交一次租啦~哈哈哈哈。」

「唔知黃小姐嘅客戶係咪主要都係男性黎嘅呢?」香蕉記者問。

「無錯~而我嘅客戶全部都上流社會嘅人,每次我地傾生意都去啲高級嘅地方,例如高級酒店餐廳之類咁啦,咁樣啲客戶先會相信我嘅專業架嘛,係咪!?」黃小姐又再次講到眉飛色舞。

「哦~高級酒店之類,明白。」香蕉記者冷冷地重覆住呢句。

「喂!!!喂!!!你咩意思丫!?」黃小姐開始忍唔住「你唔好亂講嘢呀!!!我可以告你架,我識得香港傑出青年會主席架!!」

「哦~識得香港傑出青年會主席架!明白!」一眾記者笑住大叫!

黃小姐發現寡不敵眾,馬上帶返太陽眼鏡就離開。

記者無再追問黃小姐,因為接住出現嘅就係一位大人物,亦即係黃江實業嘅主席,李黃江。

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments