千里馬要食的草嗎?

cc photo by flickr user nekoshell

cc photo by flickr user nekoshell

係香港地唔學返一兩招「笑裡藏刀」「跟大隊」「推得就推」嘅招式,相信你都幾難做到一位傑出青年。

好多人都被欺壓,但有更多人為咗唔被人欺壓就唯有選擇欺壓其他人,欺壓更多人。

欺壓手段係社會上黎講一門大學問,欺壓就一定係持強凌弱架啦。
例如你下屬明明今日都做到仆街,但為咗顯示你嘅權威,同埋想測試下佢嘅忠誠,你會叫繼續開OT;班前線已經拎緊最低工資,但為免佢地突然意識到自己嘅重要性同將來繼續加大要求,你會同佢講加夠1蚊,已經好盡。

呢種就係中國歷史文化入面一樣必不可少嘅權謀之術。

【偽】
只要你返到強國,你就好體會到呢種文化有幾影響深遠。
一間外國連鎖名牌店,但明明個英文字係寫錯咗,佢都夠膽寫:
「遠離盜版,支持正貨」。

好多人會一笑而過,但正如一個風水佬去搵食一樣,我將呢個大話對一千個人講一千次,只要有1%嘅人信,個1%嘅人就會繼續幫我宣傳開去。
其餘唔信個班人,唔重要啦!只要有呢班忠實嘅粉絲繼續支持,個班唔信嘅人只係異教徒~~~終有一日會被火燒死

同樣地,只要你識玩權謀,玩欺壓,玩到連下面個班人都信呢個先係唯一出路,呢個就係最成功嘅步伐。

點解啲帝王咁支持「君臣父子」?因為咁樣先可以確保自己嘅利益立場不被削弱;點解啲政府一定要叫你地擁護佢地?因為咁樣佢先可以肯定自己可以繼續係到玩落去。

所以,你返工個陣,上層點解會同你講:
「我個陣都係咁捱架啦。」「你地依家好幸福架啦。」

個原理同叫你信教係無乜分別。你係咪千里馬?就要睇下你可唔可以係唔食草嘅情況下,仲可以跑得郁啦。當你發現唔食草都可以跑,你仲會相信呢個世界啲馬係需要食草嘅咩?

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments