細細個總係揀飲擇食,大個左就知係寶

cc photo by flickr user tagcoor 10_3

cc photo by flickr user tagcoor 10_3

細細個阿媽總係話我成日揀飲擇食,吟吟沉沉講:「你咁樣唔健康啊!」或者阿爸會係隔黎加句:「你都唔識食。」可能女大真係會十八變,連口味都變埋,細個極度抗拒嘅野,而加又覺得幾好味喎!

汽水就十個細路九個鍾意飲(仲有一個仲諗緊),但係 – 忌廉呢一款我真係敬而遠之,走夾唔抖添,佢陣味同醫生開俾我嗰款白色澀撻撻嘅消炎藥無乜分別,但而加飲落,其實都唔係咁差嘅(好似係)。

老豆老母最鍾意放假捉我去飲茶,但細個嘅我點知道飲茶係寶,佢有佢地食蝦餃燒賣,我有我食豬柳漢堡配薯條;佢有佢地慢慢嘆緊壺普洱,我有我飲凍冰冰嘅可樂,但而加好似鍾意去食一盅兩件多過食老麥。

過時過節張枱一定有碟冬菇髮菜,而我見到冬菇好似見鬼咁,冬菇附近嘅餸我一概唔掂,我應該有冬菇恐懼症。而加新年見到佢,終於唔會慘過見鬼,雖然都未必會食,但有時煮餸,我都會覺得加兩粒冬菇原來會香好多,似乎細個真係我唔識「寶」!

蔬菜就多數小朋友都唔係太鍾意咖啦,但芹菜同西芹係個厭惡榜到應該敢認第二,無人敢認第一,但而加去食個麻辣芹菜同XO醬西芹雞柳真係無得輸!

蕃茄應該都可以入到我嘅討厭排行榜,蕃茄炒蛋我只係食蛋,最後成碟只會剩低孤獨嘅蕃茄。而加大個,學人冷係品味生活,試下啲來佬貨食西餐見到兩粒車厘茄,扮下高級食下荷蘭蕃茄配法國洋蔥,仲要淋啲Extra virgin olive oil上去,咦,又幾好味!(其實蕃茄炒蛋係好正)

但到呢一刻,青豆應該係永遠、呢一世、下一世都不受歡迎(除左芥辣青豆)。

black@shallot.com'

小黑蔥

沸青90後,相信文字能走進人的內心深深處,相信文字蘊含著無限的情感。

More Posts

高人指點

comments