當造之肥美 – 秋刀魚 刺身

秋刀魚刺身 by 伊藤

秋刀魚刺身 by 伊藤

秋刀魚

俗語有云:「秋風起,三蛇肥」,秋天總係一個令大家放開懷抱,解放味蕾既日子。今次想講既係入秋後肥美非常既秋刀魚刺身。

魚如其名:體形如刀,盛產於秋,可以話係日本料理既代表之一,香港人絕對唔會陌生。無論係鹽烤,蒲燒,定係汁煮,總有一個煮法可以係日式餐廳既餐牌上搵到。不過,講到刺身呢,有朋友真係會問:「原來秋刀魚可以生食嫁?」

無錯,係可以既(唔係我寫黎做咩呀)。秋刀魚係9-10月中呢段當造期,會出現一層薄既皮下脂肪,油脂豐富,肉質嫩甜。

咁點搞呢?師傅將新鮮秋刀魚去皮起骨,就部位及紋理將魚肉切成唔同形狀,參考本文三張相:有切片、有四方、有不規則等等形狀,呢樣就考師傅功力。除左食材成本外,貴既就係比呢份功力,好師傅難求呀,陰功。

食落去係點嫁?魚味濃郁豐腴,油脂鮮甜,加上薑茸同蔥花,更顯鮮味外,亦減淡油膩感覺。食完一舊,唔好咁快食第二舊,慢慢黎,感受下口腔入面既餘韻先再食第二舊。食好野,就唔好急;急,就唔好食好野(除左澳牛)!

至於大家好驚既腥味,有機會微腥,食過幾次都唔覺有;苦味,主要黎自魚腸,不過既然係刺身,當然完全無啦,放心食。

秋刀魚刺身 by 味彩(已結業)

秋刀魚刺身 by 味彩(已結業)

秋刀魚刺身 by 武館

秋刀魚刺身 by 武館

今次就講到呢到先,食友們緊記把握9-10月中呢段時間,出去搵下邊到有得食秋刀魚刺身啦,包你一試難忘。

下次同大家講講拖羅。

讚好「潮童焗飯」Facebook專頁,識飲識食:

潮童焗飯

透過食物,我們能認識世界 透過攝影,我們能了解他人

More Posts - Website

Follow Me:
Facebook

高人指點

comments