唔好講笑,竊書櫃不能算偷!

近日有單失竊案,報導嘅傳媒唔算太多,但值得睇下。

事件嘅來龍去脈其實非常簡單:最初青年旅館發現漂書櫃被偷走,之後喺網民幫助下成功搵得返,發現書櫃原來落入露宿者手中。而青年旅館除咗同露宿者解釋返漂書理念,仲主動提出幫佢哋整個新嘅儲物櫃。

表面嚟睇,櫃同書最後平安無事,露宿者又多個新櫃,皆大歡喜。

但問題嚟喇:露宿者過程中有冇偷嘢?有,定冇?如果你呢一刻心入面已經有答案,你唔好答住,一齊睇下某啲留言同埋報導先。

網民A:「係你自己說被貪心的人偷走,我同某啲留言的人諗法一樣,係被有需要一個櫃、但沒能力擁有的人執咗去用」
網民B:「由誤會到大家諒解,真係互惠互利,何樂而不為呢?」

上面兩個留言用「執咗去用」、「誤會」等字眼,留言者自然係認為露宿者冇偷到嘢。而另一邊廂,香港01將事件描述成「露宿者誤取自用」,蘋果指「露宿者取去圖書車儲物」,立場新聞則用上「漂書車遭露宿者改裝儲物」、「被露宿者拿去儲物」等嘅描述。立場嘅報導內文甚至反問讀者:「你可能會話,露宿者不問自取,不是賊,是甚麼?但你有沒有嘗試理解,對方「偷車」的真相是甚麼?」

不問自取,是為賊也。呢個說法並唔難理解。特別係事件中嘅漂書櫃原本有用鐵鏈綁住兼鎖上,而露宿者先剪鎖、再扣上自己嘅鎖將櫃帶走,明顯係偷竊行為。即使未了解所謂「背後真相」,稍為諗下都知道咁樣唔會係「誤取」。咁露宿者不是賊,是甚麼?

要知道,唔追究係人情,追究係道理。青年旅館事後冇追究,甚至仲主動提議幫露宿者整多一個櫃,呢個係佢哋嘅選擇,係佢哋理解他人需要後嘅決定。但無論青年旅館做啲咩,結果都只係反映佢哋點樣去睇成件事,而唔會改變「露宿者偷走漂書櫃」呢個事實。

可能因為露宿者連儲物嘅空間都冇,處境太令人同情,所以唔止傳媒避用「偷」呢個字,連青年旅館自己都由一開始未知情時話個櫃「被貪心的人偷走」,改成今日話「座落在天橋下與露宿者們在一起」。或者指責弱勢者,總係會俾人冷血、涼薄嘅感覺;而郁啲就講個「偷」字,又會顯得不近人情,所以大家都特別小心翼翼、適時含糊其辭。大概咁樣都係人情味嘅一種?

不過如果你真心覺得露宿者拎走人哋個櫃係唔小心、成件事係誤會、露宿者只係為自己解決需要、佢好慘唔應該話佢……你大可以諗下,「拎咗」麵包食嘅乞兒,「執咗」件衫着嘅貧窮人,點解又冇得到應得嘅同情?

你亦可以諗下,如果他日你嘅物品不慎俾人誤取,落咗喺好慘嘅人手上,咁佢又算唔算係偷嘢呢?

先感謝大家的意見和幫忙,有網友告訴我們,終於找到流動車的下落,就座落在天橋下與露宿者們在一起,我們上前去跟他們聊天了解一下,他們缺少了一個儲物和將他們比較寶貴的東西鎖起來的地方,然後把流動車改裝成儲物車,我們亦跟他們說了建造此車的概念和原因…

Posted by Wontonmeen on 2016年9月18日

fungs@high.com'

瘋子海

聚沙成塔,集腋成裘。瘋子成海都係。調查發現每兩個人就有一個係瘋子,我唔係。即係你……係?

More Posts

Follow Me:
Facebook

高人指點

comments