我的數碼暴龍世界(二)

cc photo by flickr user Amber Case

cc photo by flickr user Amber Case

嗰陣個世界又被Pokemon摧毀過一段時間,應該就係佢出動畫之後再出埋Gameboy 帶個期。
又係分哂派別,紅,藍,綠,黃版,我當然又沉淪埋一份(個陣仲發生咗一件趣事,將來有機會再講。)但重點係無耐,BANDAI都唔執輸再出咗隻「數碼暴龍世界1」係PS1平台。

故事內容就係主角(即係你)被召喚去拯救被病毒入侵嘅數碼世界。你就同你嘅朋友(亞古獸/加布獸)開始冒險旅程。
好有趣嘅係佢同以前玩暴龍機一樣你都係全天侯照顧佢起居飲食,同時間你亦要係數碼世界到周圍走。
除咗好似古惑仔咁,見廢柴就恰,見勁人就縮之外,仲要幫啲無咗你佢地就會迷失人生方向嘅數碼獸朋友。
(例如:無你就一世都鑽唔到地嘅鑽地獸;無你就一世都會迷失自己嘅火焰獸;無你就一世都會訓係條街嘅獨角馬獸;無你就一世都搵唔到自己祖先係乜水嘅獅子獸;無你就一世都搵唔到朋友嘅比丘獸……)
基本上如你唔出現,佢地只會係數碼世界嘅廢青,乜都唔識做。不過話哂都係救世主,呢啲門面嘢點都要做架。

除咗你所認識嘅數碼獸立體化之外,佢地嘅數碼暴龍世界觀亦都出現呢係個遊戲入面,例如:
肉係地下種出黎;怪獸們所屬嘅地方都會分哂,雪人獸就一定係冰封聖域,奧加獸就只會係大山谷;火屬嘅怪去到濕嘅地區就會變弱;你就唔屬於數碼世界,所以你亦唔會感到累到肚餓;佢地要安排啲雜魚角色,因此會出現一啲變種嘅數碼獸,冰亞古獸,黑加布獸等等。

咁當然玩得暴龍,一定係玩進化。
同以前暴龍機一樣,必須到達到某種進化條件先至可以成為某隻獸:亞古獸要攻,防,速,智都要達到100以上,無任何失誤先至可以成為暴龍獸。
不過呢隻有樣特別之處,就係佢係可以食道具進化。
食粒金香蕉就會變成悟空獸,不過食道具進化就自然差啲架啦。

當時可以係佢地嘅世界到周圍走,可以透切咁去了解哂成個數碼暴龍世界真係一樣好過癮嘅事。不過當時PS1未係咁多人有,所以唔係個個小朋友都可以拎住自己張卡去人地到玩BATTLE。
對比起Pokemon Gameboy年代,數碼暴龍世界已經係比唔上佢。不過動畫好快就再次將數碼暴龍炒起!
八神太一,亞古獸,被選中嘅細路,令人熱血嘅進化音樂就係我個小學六年班生涯到不斷咁巡迴。

直到中學生時代,我就無再望過佢地。
可能個陣青春期淨係想識女仔,又或者電視入面個班主角已經唔再係我認識嘅數碼獸。

「乜鳩嘢機甲進化呀?有呢啲嘢嘅咩?」
熱情就隨住我嘅年紀慢慢消失。

直到手遊時代出現,我時不時都會留意下幾時出返隻數碼暴龍GAME,結果絕對係令我失望。

下集,我會講「Digimon LinkZ 」同「PS vita 數碼暴龍 next order」 玩後感。

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments