而我真係唔會自己一個單機玩Pokemon Go!

cc photo by flickr user Sadie Hernandez

cc photo by flickr user Sadie Hernandez

其實玩左半日,已經覺得Pokemon Go唔係真係咁好玩。先唔提香港係一個幾咁細嘅地方,真係有心chur Pokestop可能唔洗兩個禮拜都已經去得曬。147隻小精靈都真係唔多,如果目標只是集郵的話相信好快爆game。再者,你上到廿級,想再升級已經要幾萬經,即係幾百隻公廁蝠,真係捉到「人人期望嘔白泡」。

更何況,隻Game其實根本無世界觀可言。佢入面嘅操作暫時只得蒐集、進化同打道館,最多可稱為互動版小精靈圖鑑/ 有得掟精靈球嘅Google Map (個GPS仲要係唔準的)。我阿妹直頭當左個incubator係計步器,鼓勵自己落街散步減肥。

同埋隻Game雖然分左三大陣營(Valor, Mystics, Instinct),但其實真係唔知有咩用。個遊戲入面完全無顯示到勢力分佈,要知道道館依家係邊個陣營佔上風,只能親訪才有法知道。

再加上正值夏天,一個人玩真是傻的嗎? 即使儲曬小精靈又點,踢曬所有道館又點? 無劇情,無玩家互動,Pokemon Go! 完全體現左咩係「無敵是最寂寞」。

如果得我自己一個人出街,我真係唔會浪費電浪費data去開Pokemon Go!。

然而,呢隻Game對於我而言仍然係好有吸引力。佢為盛夏帶來不一樣青春、熱血,和回憶。

以前真係唔想成日約人出街,因為香港嘅典型娛樂–行街唱K睇戲,真係又高消費又無聊。但依家只要問一句「喂,一唔一齊Pokemon Go!」,已經可以平平地玩足成日。唯一嘅消費可能真係得$2.3嘅叮叮(最佳精靈球補給站),同埋烈陽下狂灌的一枝水。

無藉口約的人,Pokemon Going 令到見面變得理所當然;無機會搭訕的人,Pokemon Going令搵話題變到易過捉超夢夢。

你仲可以同班friend一齊為盞鬼Pokestop笑十世: 樓下連小朋友都唔玩嘅遊樂場叫「無人問津的公園」,裝置藝術叫「一堆爛鐵」,避雨亭就叫「當你以為擋到雨過到去先發現水滴滴傻的嗎嘅避雨亭」。真係好多謝Ingress班玩家係香港標記左咁多portal.

但真真正正令呢隻game最有魅力嘅,始終係那些同你一齊捉小精靈嘅人。

(下列情節半真實半虛構)
身邊總有啲超級黑仔嘅frd,會陪你喺叮叮上遇上人生第一隻比卡超。好似中左一億六合彩咁,你地立即Great ball同Razz berry。當你輕鬆great throw而佢只可以眼白白睇住比卡超走,你會贈比佢世上最長嘅恥笑。

你:「哈哈哈,你睇我捉到比卡超啦」
佢:「車,捉唔到比卡超咪因間捉佢嘅敵人喵喵怪囉」
(喵喵怪出現)
佢:「睇住黎啦!(拋精靈球)」
(捉左,喵喵怪逃跑)
你:「哈哈哈哈哈哈哈哈哈哈哈哈哈哈哈」

亦有啲傻仔,明明是說好的一齊行書展動漫節,最後變左一齊喺會展入面捉小精靈… 當其他人入書展掃書 入動漫節睇cos player,佢就大喊「Yea 我捉到迷你龍啦」,又或者係帶你沿住牆邊行行企企,只為搵到「一次掃曬三個Pokestop」果個位 (2014動漫節步驚雲LOL) 」

有啲人,明明是說好的開會呢,結果一入到wifi房,個個即刻swipe樓下嘅Pokestop. 當你地要諗搞咩活動好時,都只係諗到真人版Pokemon Go! 認真毒。

有啲貴人,會好認真咁開好pokevision,好有plan咁幫你搵齊地點同剩餘時間,齊齊去捉迷你龍。當佢好快捉到dratini而你因為GPS壞左所以想晦氣唔玩時,佢會「挑,等多陣啦!」然後好似魔法咁,佢講完之後你部機會突然出返曬啲迷你龍。最後當你地捉好迷你龍,施施然轉出街口,先見到成班人衝過黎捉,你會覺得你地根本完勝。

有啲人,無無聊聊行行下都可以捉到卡比獸。果一刻「狂奔只為卡比獸」的人應該覺得自己浪費自己HP了…

有啲人,成日都行行下就無啦啦「超好彩咁」 孵曬啲新小精靈出黎,而你一次又一次見證佢悲劇式地無開到雙經蛋,升lv無望。

有啲人,會教識你一定一定要儲齊好多粒candy開曬雙經先好一次過進化。

有啲人,一定一定會寸你唔記得小精靈啲名就學人玩Pokemon Go!,一定一定會笑你treegun上身將波音蝠講左做音波蝠 (無喊佢蝙蝠算係咁啦)

有啲人,明明好怕熱但又要捉小精靈,所以你地只能不停入開曬incense開曬lure嘅大商場(簡直係天堂:D)

有啲人會不停圍住維園果個封住左嘅水池,極固執咁想掃入面嘅Pokestop.

有啲LowB仔,會坐係海富M記為左自己無曬pokeball而崩潰。呢個時候你會一手拎左佢部機,熄左個app,重頭開過,然後望住佢塊面由悲轉喜由陰轉晴。

有啲低能仔,會癲到凌晨同你撲到機場,送機為名捉Pokemon為實。

有啲白癡仔,會同你一齊見證機場道館瞬間藍變紅,紅變黃,黃變藍。然後佢會無啦啦掃視全場候機人士,勢要知道究竟係邊條友成日坐係同一個位打同一個道館。

有啲人,會同你一齊喺機場問周圍嘅人係咩team,而當你地知道你地係同一隊時會好Yo好厚面皮好瘋狂咁大喊”Team Instinct!!!”

有啲人,玩玩下肯定會手機無電(而且又唔帶尿袋),所以只能好似導盲犬咁成為你嘅pokemon guardian,守護你祈求你唔會成為香港第一個玩Pokemon Go! 而撞車身亡/碌落樓梯身亡/撞柱身亡(so many dumb ways to die…)嘅人。

有啲人,會直頭當左你係小精靈。行行下一隻手包成一個拳頭,捉住你嘅左手,永遠唔再比你逃走。

正因為你第一次玩Pokemon Go!,已經係同一班咁正嘅人一齊玩,搞到你覺得毒丁一條去捉真是甚麼滋味也沒有;而你,返到屋企會突然突然好掛住成班人一齊熱血一齊青春嘅感覺。

真正令我們熱血的不是Pokemon Go!,
而係你我知道一齊行街玩手機會PK,都要Go!

高人指點

comments