新‧地面最強小三 《Pokémon Go》

cc photo by flickr user Michael Verhoef

cc photo by flickr user Michael Verhoef

近兩日行出街,男男女女,有老有幼,全民手執一部智能手機,化身小精靈訓練員。當然,我男朋友都唔例外。以前啲人話最強小三係LOL,今時今日恐怕係呢隻仆X mon Go,平時約佢出街會左推右推嘅男朋友,今日突然轉性好想出去同陽光玩遊戲,因為 ─ 佢想出去捉小精靈。呢隻game令佢隨時隨地,行街食飯去邊玩,只要佢部電話仲有電,佢就會完全無視你,殺傷力大過LOL好幾倍,起碼佢唔會搬部電腦出街打LOL。

而佢屋企附近有四個人人求之不得嘅Poke stop,所以無論係屋企定係街,佢雙手同部電話難離難捨想抱緊些咁,仲親密過同我,過左無數個被冷落嘅鐘頭,以為可以手牽手咁落街散步拍下拖,點知都係難逃小精靈訓練員嘅命運,個情況就好似當小智佢地好開心咁去緊下一個道館嘅時候,火箭兵團總係會走出黎過下場,而啲小精靈都好活潑咁走出黎想你捉佢返屋企。

小智頭上一頂紅色Cap帽,拎住部電話好似拎住精靈球咁周圍轉,唔會錯失任何一個poke stop同小精靈,就算係波音幅都唔會放過。

企係身旁嘅我心入面諗,我估兩個人一齊捉小精靈應該都幾幸福,你怪我捉左你隻小火馬,我話你搶左我隻小呆獸,打打鬧鬧都幾開心。但其實,我只係想有十五分鐘,有十五分鐘淨係屬於你同我 ─ 兩個人,放低訓練員嘅身份,放低部電話,唔需要有目的地,只係拖住手散下步,或者依偎係一齊睇下卡通片,就已經好足夠。

black@shallot.com'

小黑蔥

沸青90後,相信文字能走進人的內心深深處,相信文字蘊含著無限的情感。

More Posts

高人指點

comments