아가씨/下女誘罪/The Handmaiden

poster_1465215712

入場睇咗三次之後,我決定咗揀呢套戲做自己嘅Movie of the Year。

故事大綱之類想知就自己揾啦,朴贊郁導演今次係改編英國作家Sarah Waters嘅”Fingersmith”,然後將時空由維多利亞時代搬到日治朝鮮。我想強調嘅係朴導嘅回勇令呢套戲特別好睇,點解話回勇?上次套”Stoker”/《私房嚇》囉,唔知係咪編劇Wentworth Miller(係呀”Prison Break”個男主角施米高呀)嘅問題搞到成套戲出哂事,今次揀返個啱用嘅故事就大師兄返嚟喇。

「女僕」小姐「伯爵」姨丈四個人嘅計中計中計唔係咩新奇嘢,朴導跟原著將故事斬開三部分,頭兩部兩個主視角最後玩返拿手復仇戲就係妙處。第一部我哋睇住「女僕」點樣實行計劃點樣沉船最後點樣__,好一貫韓國異色片劇情呀可?第二部就嚟料喇,你會睇到姨丈呢個始作俑者有幾變態兼仆街(一定要引用佢呢一句:「我只係一個鍾意聽咸故嘅阿伯。」),睇到「伯爵」為咗計劃其實做咗幾多嘢,但睇得最多嘅其實係小姐,梗係啦韓文片名아가씨都已經話過你知朴導將重心放喺邊啦,係中文同英文片名「誤導」你以為「女僕」係唯一主角嗟。好啦其實佢都好緊要,冇佢小姐又點知自己想要啲乜?冇第一部嘅主視角同結尾嘅扭橋,又點令你睇第二部補完之前刻意掩蓋嘅部分時有拍案驚奇兼感動你心?尤其是係櫻花樹下一幕呀。不過小姐真係好重要,重要到大呼過癮嘅第三部看似係「伯爵」嘅主場,其實都係小姐玩哂,「女僕」真係冇講錯,呢個小姐真係___。

wttp000p04a

講完故事講其他,朴導嘅戲電影語言一向係賣點,由鏡頭嘅推移、剪接、佈景、用色,到充滿象徵意義嘅道具——一條繩一對鞋一幅《章魚與海女圖》等等,全部都係講緊故事,講緊一個攝人心魄嘅故事。四個主要演員都交足功課,兩位女主角金敏喜同金泰梨自然不在話下,沖涼磨牙一幕可謂氣氛營造嘅絕佳示範,仲有私奔逃走嘅幾段戲,加埋朴導嘅場面調度,倆忘烟水裏五個字活靈活現。河正宇嘅「伯爵」亦都搶鏡,一出場就已經帶住劇情走,舉手投足都散發著奇怪嘅優雅同淡定。至於趙震雄⋯⋯你覺得姨丈變態兼仆街佢已經成功咗。

有讚亦有彈,最重要嗰一場做愛戲,我點睇都係認為突兀咗,就算之前幾有鋪排都係咁話。仲有「伯爵」失手又係,雖然之前一段讀書會嘅戲已經顯示出佢並非真係心如止水,不過咁中招法除咗柒都係柒囉。

撇除朴導灑多咗少少鹽花(出埋《金瓶梅》添呀),아가씨喺扭曲嘅背境當中顯示咗真摯嘅感情,令人更加動容。最後想講嘅係,韓版其中一款海報好正,類似浮世繪嘅風格顯示其中一啲重要場景真係絢麗非常,不過同一款海報嘅英文版竟然劇透囉好鬼掃興。

chester@chester.com'

查斯特

其實比起表達,我更擅長聆聽。

More Posts

高人指點

comments