大師兄：洗腦課程（三）

刊登於 2016-07-20 By 吹水皇 All, 人生思考, 生活文化, 香港小故事

cc photo by flickr user Naval Surface Warriors

（上集提要：大師兄上完初階洗腦後，由仆街變成耶穌。一眾朋友都體驗到呢件事嘅可怕。）

大家留意下身邊做銷售嘅朋友，佢地一入行就會變成一個「超級專業」同「十分正面」嘅人，但只你要深入了解佢地，其實佢地只係想有錢姐。
大師兄上完堂立即就有以上講嘅感覺，不過更可怕嘅係，佢骨子裡都係想你好，唔係單純要你埋單找數。

公司內，大師兄繼續係到分享佢所學到嘅「知識」，情況有如一個位神父向塵世中嘅迷途羔羊解釋我地所犯嘅罪行一樣。

一個人講耶穌，聽完都當9UP；一班人都講耶穌，你聽完就會心UP。
正如我話，呢個課程有如病毒一樣咁傳播出去，好快公司已經有人唔少人上緊呢個課程，仲要分哂師兄弟咁。
講埋啲對白，絕對唔係外人可以聽得明：認識自己，面對自己，意向，吸引力法則，信念乜乜柒柒。

坦白講，我個陣都有啲心郁，但無奈幾皮嘢去讀埋呢啲書，我真係打死都唔制。

誰不知呀星同大師兄呢兩件粉腸竟然諗到條絕世好橋，哄我地去體驗－學習銷售。
我本住一個「學習」同「冒險」嘅精神，選擇去試下深入虎穴。

【羊入虎口】
佢地所謂嘅「免費體驗課程」就係九展一個好大嘅展覽廳內舉行（見到咁揼本，我已經知道呢班人可以賺幾撚多錢）。
金碧輝煌嘅裝修，面帶微笑嘅工作人員，加上整齊嘅服裝，的確係會人減低提防，再有以下幾項賣點令到當日更加多人參加呢個活動。
「免費體驗」：其實就係呃你貪小便宜。
「參觀上堂」：令你覺得課程內無咩唔見得光嘅嘢。
「限額帶好友」：實際行「饑餓銷售」等你認為機會難得。

我地一行五人就係門外，被人叫熄手機，留低資料，同帶上名牌，當然熄手機係假，資料係假，名都係假。
老千對老千，無話邊個低劣啲。

佢地好聰明咁，用「異性吸引」「分離手法」分成男女一對嘅小組。

「異性吸引」：男比個靚女，女比個俊男，一對一對咁，唔使多解釋原因（可能我太樣衰，佢比左件豬扒我！屌！）。

「分離手法」：將朋友們分開，被推銷成功嘅機率就會大大提高。你無法同朋友商量，好易就會被人推入陷阱。

進入會場後，所有人就要同佢嘅另一半（即係現任學員加推銷員）一齊經歷大約２小時嘅洗腦課程。
無錯，我將會同隔離件豬扒一齊坐足２粒鐘。

【步步驚心】
佢地將推銷員美其名為「領航員」，帶領兼陪住你一齊體驗哂全個課程，因此「破冰」好快成功，而佢地會將識得嘅人分得好開，加強「分離手法」。

開始時，佢地台上會有數十位「成功例子」講解自己點樣由一個無目標嘅垃圾變成一個人生充滿希望嘅人。
台上面，有律師，醫生，保險業專才，企業家同外賣仔等等，當時我只係相信個位何金銀先生講嘅職業先係佢真正嘅職業。

「領航員」豬扒小姐係過程都交足戲，一邊聽完台上講，一邊就同我分享當日遇到外賣仔先生係幾咁低落，同佢一齊上堂個陣點撚幫佢成功，到依家見到佢咁有自信係台上面講出自己係做外賣仔個刻，係幾咁光榮同安慰！
八婆，你收嗲啦！

話咁快，就到遊戲環節，一個「聆聽」遊戲。
第一個版本，就係對方講嘢時不繼續講嘢騷擾對方；
第二個版本，就準備一張牛皮膠紙，痴住一方嘅嘴，然後等對方可以完整講出所有對話。
第三個版本，就係等對方講完說話，再講嘢去回應對方。

遊戲想令你感覺到聆聽對方嘅重要性，當然只係一步令你放下戒心嘅棋！
當豬扒小姐講個陣，佢會講返自己嘅故事，有幾咁悲哀，又話比人性侵又話比男人呃，等你再同情佢。
惻忍之心人皆有之，當對方講完一個感動故事，你自不然會開啟「感動模式」。

一旦開啟，你就會講出你平時嘅抑壓，或者一啲你認為痛苦嘅經歷，分享內心嘅感受。
當你一講，你就已經中計。
當你中計，你情緒就會波動。
當你波動，你對面個位已經唔再係陌生嘅「領航員」，而係你一個同你分享心底話嘅「好朋友」。

人係一個感性嘅動物，但防衛心理會令你同一個陌生嘅人去保持距離，因此一個陌生人黎到賣嘢比你，你會立即拒絕。
但一個「好朋友」黎到賣嘢比你，你就會開始考慮。
一個「好朋友」感動完你，再賣嘢比你……