凍飲為何要加2蚊？

刊登於 2016-05-28 By 吹水皇 All, 飲飲食食

cc photo by flickr user ryosuga

最近大快樂狼死到凍蚊要加４蚊，一眾香港人小爆佢屎忽之後終於跪低回返價。
（所以話，團結少少其實就可以令到班奸商收皮。）
因此令到好多人討論點解凍蚊要加２蚊？

本皇今日同大家講下歷史：

＊茶記原來係高級野＊
係７０年代初香港因為資源缺乏，唔好話自助餐就連飲杯奶茶都係奢侈野，當時好流行一種叫冰室嘅餐廳，亦即係依家茶記嘅前身。
可能好多後生唔知冰室係咩樣，詳情就可以係鄭伊健個套「九龍冰室」到參考一下。

不過當時冰室唔係依家嘅茶記咁，乜都有得賣，沙牛面呢類野個陣就肯定唔會有架。
而佢地最主打都係賣飲品同蛋撻。

以前冷凍技術無咁好，冰呢類產品相對係比較貴，而且餐廳都唔會有冰櫃可以放，所以冰係一樣好快就融（蝕）嘅野，因此價錢亦都唔平。
當時「飲冰」就一個溝女嘅必定節目，個情況有如今日請個女仔去食生蠔，飲白酒差唔多。

到後來經濟好轉，冷凍技術都好咗但凍飲嘅需求仍然好高，因此商家仍然會以用「加錢」呢個動作幫客人升級做凍飲。
而呢個「傳統」就流傳到依家。

＊走冰真係好屈機＊
細個個陣我已經意識到凍飲加２蚊仲要咁多冰真係唔抵。
記得有次我係樓下間茶記到食飯叫左杯凍奶茶走冰，Hi Aunties！個老闆竟然將一杯唔熱嘅奶茶放返係一杯熱奶茶Size杯入面。
我呆左咁望住老闆，老闆一個華麗轉身就走，後來我先知原來係因為我係細路所以咁屈我機，其他人嗌走冰係唔會有我呢個情況。

依家冰底就越黎越平，但個加個錢就越黎越貴。
中醫同我講凍飲飲太多會傷脾，但我肯定再咁加法一定傷我銀包先。