職場十九事－點會唔得姐，一定得嘅
cc photo by flickr usergohan.hk
只要你唔係富樫義博呢類型咁有性格嘅巨星，相信你返工個陣一定會有客，老闆，上司同你講：「點會唔得姐，一定得嘅。」
真係好那正面，而我每次都聽到好躁。
係，真係世上無難事只怕有心人，只不過你想期望一個月薪得個萬零蚊嘅人可以幾有心呢？
「所以你咪就係得個萬零蚊囉！」
好！當你贏，我盡力去做，經過取西經一般嘅苦難去完成件事最後你就會答我
「那，係咪呢，我都話左係得架啦。」
我Hi Aunties !唐三藏取完西經都有得返去做佛啦，你老味你咁樣講完就算架啦？
而抵死嘅係，佢地心底裡會覺得係因為我自己有慧眼，有遠見，管理得好知道呢件事一定會成功，而唔係你因為你嘅努力同付出而成功。
咁到下次佢又同你講：「上次都得囉，點會今次唔得？」
＊老Ｘ馮＊
話說我當日做餐廳侍應，有一個相當受歡迎嘅焗豬扒飯，入面嘅汁一定係有蒜頭同洋蔥，但有趣嘅係每隔數日中午時間都會有一位打扮成中環精英嘅中年人過黎要求個汁走蒜頭洋蔥。
「先生呀，唔好意思，我地個汁一定會有，不過你試下我地個……」
個「個」字都未講完，條友就拍檯。
「唔好同我講唔得，你試都未試就話唔得，我唔想聽Excuse！」
呢一刻我就知道呢條友九成九係個S男，唯有笑笑口咁叫佢等陣，然後入廚房屌佢老母。
當時個經理極怕死，唯有叫廚房立即起個汁比佢，當我行去同佢講無問題嘅時候呢位S男先生就露出一個勝利嘅笑容同我講：
「咁頭先你同我講咩唔得姐？」 HI!!!!!!!!!!!!!!!!!我個吓真係想一個左勾拳打爆佢副眼鏡。
如是者，呢位S男先生就成為每次我地都好怕見到嘅客人（最重要呢種咁嘅人係連貼士都唔會比）
直到新經理－方經理出現，呢位S男先生終於可以收皮。
同樣嘅情況，方經理見到問我做咩咁忙仲廚房咁做，大家解釋完方經理立即跑去同Ｓ男先生講：
「對唔住呀，先生你個要求，我地依家做唔到比你啦，你可以選擇其他食物丫。」
Ｓ男先生立即連珠炮發咁爆一串英文又中文，我仲好似聽到一啲客家話咁，總之又係問點會做唔到？
方經理呢次拆招真係令我大開眼界。
「其實係做到嘅，不過先生你要先加入我地個VIP，然後每次都要預一小時黎落單，我地就可以幫你做一個岩你口味既菜單。」
「Well！okay ，幾錢丫？我依家做。」Ｓ男先生仍然有少少唔順氣咁講。
「多謝先生，８萬蚊一年，無問題我依家開單比你丫。」
Ｓ男先生無再出聲，然後佢order左個沙律食完就走，從此佢就無再出現過。
方經理此舉真係令我地高興到不得了，除左好順利咁趕走個麻煩客，最重要係佢開左一個先河可以杜絕任何呢類型嘅人。
不過呢樣野首先要你嘅上司了解，如果你上司都唔了解就只可以一直硬食落去直到永遠，呀門。
高人指點
Follow 爾雅集