韓國醬油蟹 VS 潮式瀨尿蝦

cc photo by flickr user Republic of Korea

cc photo by flickr user Republic of Korea

星期六晚難得富爸爸可以脫離個囡嘅魔爪,我同佢走咗去打冷飲下啤。
呢間新蒲崗嘅打冷鋪,小菜同價錢黎講都真係麻麻地,但點解我都仲要去就係因為佢呢到有好難得嘅生醃海鮮。

唔使懷疑我係咪打緊邊爐,拎住碟生料扮哂野,呢碟野堅係生食!好多人都抗拒呢碟野,但富爸爸同我就完全相反,愛到不得之了。
正所謂「食不言,寢不語」,呢句野根本就係為食嘅人黎將自己專心美食嘅行為而合理化。
碟野一到檯面,兩人碰杯,大家粒聲唔出,起手唔使10分鐘就搞掂哂全碟野。

富爸爸放低筷子又係到沉淪毒海,玩佢隻「魔靈召喚」,我就飲多兩杯屎水係到發噏瘋:

「尖咀韓國醬油蟹,唔好食288蚊;新蒲崗潮式瀨尿蝦,好好食88蚊。」

「你又噏乜春呀?」富爸爸望一望我低返頭打機。

「你話宣傳係幾咁緊要,當你紅左就算扔垃圾出黎都會大把人爭住要,就好似上次我去佐敦個間韓國餐廳咁,日日都排哂隊然後我發現入面全部都係垃圾,隻蟹要成二百幾蚊竟然係可以咁難食!」

「咁有冇大波白衫女侍應先!?」富爸爸笑淫淫咁,終於放低部手機。

「無!但呢個唔係重點,我就係唔明點解咁Q難食都可以咁多人排隊姐!但如果有個條咁大波嘅女,我會順氣D囉。」我講到鬼鍊咁大聲,好似驚死人唔知我鍾意大波妹咁。

「無架,呢個係形象嘅問題,你試下做個街訪問下人,對韓國第一個印象係乜?九成九都係答你GD,TOP呀,靚仔靚女呀,好型呀好有風格咁;但你試下問對潮洲有咩印象,肯肯定都係諗起一件滿面鬍鬚,擔住飛煙然後露出兩個乳頭嘅潮洲佬,口中念念有詞咁『BU里呀麼!』,你話D人點揀?

同樣係生野,如果你10年前同班女講,食潮式瀨尿蝦佢地肯定話:唔好啦,咁高危,唔健康乜乜乜,好核突;但你依家行去同班女講:同佢地食韓國蟹油蟹就肯定同你講:嘩,你好有品味呀,你真係識食,同你真係岩KEY啦!」

我將杯中啤酒一飲而盡:「係囉,同樣戇鳩鳩生勾勾,點解呢?」

「因為好多人食野,唔係為食野架啦,佢地為左食個文化,食個格調,最重要係為左佢證明佢真係與時並進;同樣個雞蛋仔加個雪糕有咩咁特別姐?又賣貴幾十蚊,型丫嘛!件食物特唔特別唔重要,最重要係佢自己特別D。」

我默不作聲,呢個毛聞完全諗唔到講咩,好似明又唔明咁。

「你諗下古爾丹點解要搵吳彥祖拍就明架啦!」富爸爸繼續飲佢杯放到熱哂嘅啤酒。

係喎,古爾丹其實由我扮都係一諗樣,點解要搵吳彥祖?

因為吳彥祖係吳彥祖,世紀大片唔搵返粒大明星,成個格調就會Cheap哂,有如女神去食醬油蟹係有品格,走左去食潮式瀨尿蝦就降格?
潮式瀨尿蝦永遠都係一個抬唔起頭個廢人,就算人地隻蟹有幾臭,你都係輸比人。

古爾丹根本就係一隻臭蟹,不過吳彥祖就係韓國呢兩個字立即升哂LEVEL;而我就一條瀨尿蝦,再新鮮我都做唔到主角。
講到呢到,我敢肯定我係醉咗。

blow@king.com'

吹水皇

港豬廢青一名。 只想吃喝玩樂不勞而獲 不求踏實地但求公屋有期。

More Posts

Follow Me:
Facebook

高人指點

comments