談應昌佑的復出之作〈過來人〉

charlesying

一般人大概對應昌佑這個名字既熟悉又陌生-對其印象大概就是黎明旗下歌手、唔知邊個台灣女歌手個仔、衛蘭首〈大哥〉入面嗰位大哥,諸如此類。

根據維基,「應昌佑乃A Music公司2005年力捧新人以及台灣1970年代紅歌姬冉肖玲之子。憑演唱電影《大城小事》插曲〈我是否還愛妳〉被雷頌德發堀,後被黎明簽下成為旗下A Music歌手」,並於2005年推出過個人同名專輯。

初出道嗰陣我都對佢幾有好感,覺得佢睇得又唱得。嗰時除咗鐘意佢同Janice合唱嘅〈24〉同派台歌〈逢星期四〉之外,仲好鐘意沒有派台嘅〈你是我喜歡的路人〉同埋改編自台灣樂團夢飛船首〈不值得〉嘅〈不能愛戀只能暗戀〉。仲記得嗰時佢同Janice一齊以鄰家男女孩形象出道,又同期一齊出碟,兩人都有實力有台型(當年Janice仍未變成一部電單車),不過明顯地老闆黎生係重女輕男嘅,宣傳攻勢主力都係Janice嗰邊。加上同年新人走勢強勁(例如:側田、Soler、王菀之、方大同、謝安琪等等),成為一碟歌手嘅佢就kind of被投閒置散,碟又冇得出,一年先出得一首歌,間中參與吓電影工作,之後直情淡出埋,主力搞生意同做PR,間唔中先喺幕前出現吓。報章偶爾報導佢嘅近況,每次一看,心諗:「陰功,又一個被老黎糟蹋嘅實力派。」總覺得佢懷才不遇,好凳佢可惜。不過最近,應昌佑終於宣布復出歌壇了!

今年,應昌佑終於簽咗新公司,並啱啱有新歌派台,歌名叫做〈過來人〉。歌曲由「太興Iron Man」Eric Kwok作曲,林若寧填詞,講述自身的經歷。根據應生自己介紹,「在我人生最不愉快的時候,四周有很多人都安慰我……雖然很感激身邊有很多關心我的人,但其實這些說話對受困的人來說,幫助並不大,因為只有當事人才明白其感受及清楚整件事,而這首歌想表達就的就是當遇到困境時,最重要的是當事人要懂得如何再次站起來重新面對。」Well,講多無謂,睇片啦!

其實由我前文鋪排咗咁耐我諗大家都估到其實我係好期待,可惜睇完個mv聽完首歌,唉,都幾失望囉。先講mv,情節大概就講男主角同女主角分手之後把自己封閉在自己的世界裡,但最後決定勇敢面對現實咁上下嘅老套情節啦。個mv都有不少佢個靚仔樣,ok la係成熟咗但都keep到;忽然女主角出現了,我不禁_出聲,多麼醜的妞啊,開頭我都未為意係邊個,只係覺得熟口熟面,睇到差唔多最後,我醒覺了,咪就係岡本女王個妹莊思明囉妖。真係不禁要講多次:多麼醜的妞啊。明明同公司都有其他女artists例如餅碎Angela同新女子組合SZSTER,雖然都唔係靚但點都好過阿莊小姐囉唔該。點解唔考慮自己人反而要外求呢?出事㗎嘛~

唉算,講返首歌本身。應昌佑的唱功無庸置疑,而作為林夕高徒的林若寧向來多產之餘水準亦有保證,而Iron Man近年水準不太穩定是不爭的事實。今次嚟講首歌旋律算不過不失啦,不過首歌都有啲突兀位,例如chorus第一次唱「過來人」三粒字嘅時候真係超odd,因為呢三粒字係唔啱音嘅!!!要知道chorus對一首歌相當重要,依家就好似洩咗道氣咁,就算第二次再唱「過路人」係啱音嘅都彌補唔返。唉,what a waste。除此之外,首歌收尾亦收得甚為倉促。其實首歌本身都唔係好長,只是四分鐘不夠,大可以再來個升key版chorus再show吓應生嘅唱功又或者來一個比較完整嘅outro,咁首歌就唔會好似依家咁甩頭甩髻草草收場囉。唉,真係好嘥囉。

愛之深,責之切。作為應生嘅復出之作,其實個頭開得唔靚㗎,嘥咗佢把靚聲同靚樣。老黎已經嘥咗佢近十年青春,如果今次仍然唔能夠一擊即中,睇怕佢一係繼續喺呢個圈浮浮沉沉,再唔係就唯有疊埋心水繼續努力做生意。希望第二波主打可以遇到一首更好嘅作品同埋會有更好嘅反應啦。

vivien@vivien.com'

Vivien Lam

(Editor's comment: writer with good taste in music)

More Posts

Follow Me:
Facebook

高人指點

comments