今次講香蕉Pancake合體(真係食文,抽水成份極低,健康之選)

Pancake有咩好講呢?

首先睇睇幅圖,我係講緊食得的pancake,唔係唱歌果個。

所有圖片來源:作者

所有圖片來源:作者

呢個係香蕉pancake合體。通常香蕉pancake係指整完塊pancake之後再放香蕉上去,而呢個呢,係香蕉用自己既方式入左去pancake入面架,所以你搵唔到香蕉。
Ok而家真係講番個pancake。

unnamed (1)

佢既起源已經追溯唔到,大家已知的係,佢既主要成份係麵粉、牛奶同埋雞蛋。而係唔同既地方,又有唔同既食法,我地一齊向世界出發,去片:

先講澳洲呢度: 受到好多英國文化既影響,好多澳洲的飲食同埋生常生活習慣,其實都好英式的,呢度的人都好興食pancake落砂糖同埋檸檬汁,原來咁樣咬落口脆脆一粒粒的砂糖加埋酸的檸檬汁,甜度、酸度同脆度都配搭得非常好,而且兩種都係相對容易得到既材料。
然後又講下美式: 又叫hotcakes,好興落牛油同糖漿,係呀即係pancake本身都唔夠肥丫嘛,仲要加埋糖漿同牛油,所以食牡丹樓的人都咁 「強大」。(註: 牡丹樓是一國際知名美國餐廳,在世界各地包括澳洲及香港都有多間分店)
日式: 唔講你可能唔係好覺,原來叮當中意食的銅鑼燒,係兩塊pancake夾埋的,中間會加紅豆餡、栗子或者其他近年流行既新式口味,當然我最喜歡都係紅豆。(真係,我食左好多年之後先留意到)
終於輪到港式了: 港式呢隻算唔算pancake? 可能算係waffle多點,我地又興點食? 大佬梗係鍊奶+砂糖+牛油+花生醬再+花生碎啦!(除非你真係完全唔食街邊野,否則無咩可能未食過啦)

又返來雞汁部喇(哈哈哈哈哈哈哈哈哈哈哈哈哈),咁呢個蕉餅融合的pancake點整呢:

材料(份量至少12塊飯碗咁大,扁扁地的):
熟到就快爛香蕉      1隻
麵粉 半杯
雞蛋 1隻
牛奶 ¼-半杯
發粉Baking powder 1茶匙
牛油(溶) 4湯匙

1. 首先將香蕉用叉壓爛。
2. 然後將麵粉同baking powder平均地撈埋。
3. 再加入蛋、溶牛油同埋牛奶
4. 然後要講講牛奶份量,因為每隻香蕉大小軟硬度都唔同,所以麵糊的濃度都會有少少差別。
5. 所以牛奶先加少少,例如1/4杯或更少,加入麵糊入面,如果麵糊仍然是好杰再加多少少,若不幸失手令麵糊變得太稀,又再加番少少麵粉。(如果你不停失手,恭喜你,你加下加下就有足夠麵糊整到7打pancake喇。)

unnamed (2)

6. 起鑊,用易潔鑊唔駛落油(麵糊已經有少少牛油),非易潔鑊請自己調節
7. 用湯勺潷少少麵糊落鑊,如果整細細塊的可以一鑊落3-4塊
8. 等到開始冒泡(見圖)就可以試下鏟起個底,如果唔係仍然係濕漿(鏟起無漿痴住個鑊),就可以反面(再見圖)

unnamed (4)

9. 會見到pancake會漲多少少,然後用最孤獨的心換最溫柔的愛feel下佢熟未

3b76f18f-fd3f-48e5-bb7b-27d29bc86929

10. 熟呢,就反轉佢,佢會再突然漲多少少,約30秒左右就可以上碟喇
袋鼠先生多謝各位耐心睇完咁多肺話。

mr@roo.com'

Mr. Roo

Mr. Roo 係香港人, 不過而家住係澳洲珀斯, 八十後算是第二代working holiday香港人, 現職澳洲銀行、坐房所謂顧問果的茂里 (當然不是葉朗程的級數啦). 由working holiday時既低級打雜, 捱下捱下, 終於捱到而家大企業..... 既低級打雜, 真係除左恭喜之外, 我都唔知講咩好。 唔駛返工就食, 有得煮、有得食, 有分享, 有係香港售賣澳洲特色零食同食玩.

More Posts

Follow Me:
Facebook

高人指點

comments