一生只想尋找一個肯Happy Friday night食安利嘅飯腳？

刊登於 2016-03-04 By saiding. All, 飲飲食食

圖片來源：作者

Happy Friday朝頭早，坐喺office得返個軀殼靈魂已經唔知飄咗去邊。損友占忽然之間text我：

占：「喂今晚洗唔洗瘟女？我喺太古坊放早喎，不如今晚happy hour直落dinner吖。」

我：「飲嘢就免喇，不如食個early dinner啦。反正我哋都放咁早可以去安利食喎。」

佢竟然唔知我講邊度，openrice埋俾佢之後，佢竟然話……

占：「你唔Ｌ係呀？Happy Friday食咁頹？梗係落老銅食好西啦！」

占兄咁嘅反應，我當堂嚇一跳，然後得啖笑，(恥)笑佢走寶，然後我哋餐飯就不了了之咗。唔通要搵一個肯Happy Friday night食安利嘅飯腳真係咁難？

如果要為香港島揀條食街，筲箕灣嘅東大街實在當之無愧－歷史耐啲有呂仔記、威到上米芝蓮嘅恆河(已結業)，近期啲就有低調高手、隔離嘅小食皇，等等等等，而每次落到東大街，安利魚蛋粉麵絕對係我必食之選。

安利魚蛋粉麵(同一條街斜對面仲有閒安利大排檔，聽聞係原店主兄弟開嘅分支，感覺上啲嘢亦相對冇咁正宗)歷史悠久，至今已經有五十年歷史，開業至今深受街坊鄉里歡迎，仲吸引到不少星星幫襯－邱淑貞、林海峰、葛文輝等都係擁躉，據聞依家員工們身上嘅制服都係由葛爺設計，認真巴閉！而我則從小就跟家父幫襯，一食就食咗快廿年。

去到安利，好多人或者會叫切腩片頭撈粗。而我嘅必叫三寶則係魚蛋魚片頭河、凍檸茶、鮮油奶多。佢嘅魚蛋魚片頭口感魚味十足，加埋佢個鮮味十足嘅湯簡直perfect池，我次次都會飲晒碗湯。佢嘅凍檸茶亦堪稱一流，茶味從來都唔會太澀太濃，糖漿同檸檬比例啱啱好，作為一個檸檬茶忠實擁躉，絕對係我試過最好味凍檸茶嘅頭三甲之選！至於佢個鮮油奶多，簡直係不得了，次次食完都會有一份莫名嘅滿足感！原諒我才疏學淺，嗰種滿足感實在冇辦法用筆墨去形容！要食好西？呢啲咪係囉！

最重要最重要最重要嘅係，你知唔知你weekdays可以食到安利做晚餐係咩意思？即係你好撚好彩好死幸福因為你咁春死早就放到工咁解！事關安利係開朝九晚七！朝九晚七！朝九晚七！(好重要所以要講三次！！！)作為一個營營役役嘅打工仔，返朝九，話就話晚六，但有幾多個又可以做得到？OT半個鐘係等閒事，一粒鐘都係家常便飯，多少辦公室食物鏈中下層晚晚做到八九十點甚至更晏，而你！冇錯，就係身處筲箕灣東大街安利魚蛋粉麵食緊鮮油奶多嘅你！你知唔知你係幾咁幸運幾咁幸福？

Happy Friday黃昏六點，間舖八成滿，要搭檯得嚟我仲可以將隨身物品放喺吉櫈上面。點咗三寶，五分鐘內已全部上齊。一個人，喝一口湯，呷一口凍檸茶，再咬一口鮮油奶多，禁不住想：其實有啲嘢，自己一個人去食都會好開心，又何須咁辛苦要其他人認同我字典入面嘅美食同幸福？或者呢啲就係所謂一個人的浪漫，而安利三寶大概就係我一個人的浪漫。肯Happy Friday night同我食安利嘅飯腳？如果有的話，我都會好開心嘅，不過就算冇，自己一個人食安利都絕對係一種享受。