熱石沾麵 – つけめん TETSU

所有圖片來源:作者

所有圖片來源:作者

都仲係凍凍地,揀湯麵類既野食暖暖身就最啱。身為拉麵控既我當然係選擇「拉麵」作為暖身之選。今次介紹既係位處銅鑼灣街市旁,東京元祖級沾麵店 つけめんTETSU(沾麵哲,下簡稱TETSU)。

TETSU共有三款麵食可揀,分別係沾麵豚骨拉麵千馱木拉麵。雖然我本身對沾麵麻麻,不過一場黎到以沾麵聞名既TETSU ,當然要試一試。結果?令我驚喜,可以一食再食。

TETSU 餐牌

TETSU 餐牌

沾麵(熱,原味)$89 + 味付半熟蛋 $9

點菜紙

點菜紙

原味熱沾麵

原味熱沾麵

TETSU 豚骨魚介沾湯
沾湯用上可謂近期大熱既豚骨魚介*,以豚骨、雞蛋殼、沙甸魚、鰹魚及鯖魚魚乾等材料熬製36小時,提取出豚骨既濃,雞既香、魚既鮮,味道濃郁厚稠中帶少少甜,唔錯唔錯。

*過去幾年,市場以豚骨湯底為主流,鹽味、魚介、蝦等湯底較少有。不過近幾個月,去幾間都有魚介湯底選擇,可能因應潮流而有所改變。

豚骨魚介沾湯

豚骨魚介沾湯

TETSU沾麵(熱)
細心既你可能發覺到,係點菜單上有兩個Items較特別,較為少見,分別係「麵既溫度」同「麵既份量」

先講「麵既份量」,係同一價錢下,可以選擇200G或者300G。作為客人既你,當然覺得好著數。不過緊記,沾湯份量,溫度,個人食量等等因素都有所影響,唔係多就一定好嫁啦。

「麵既溫度」就講緊係熱麵冷麵之分。通常我地見到既都係冷麵,即係用熱水煮起後用冷水沖洗令麵條收縮緊緻,再放係筲箕上來回篩動去掉水份,保持嚼勁。因為麵條本身溫度較低,放入沾汁浸幾次就令沾汁溫度下降。如果揀200G還好,300G既話,食到尾就凍哂,好唔開心。

熱麵就係為左解決呢種情況而誕生,係冷水沖水後再浸係熱水中呈上,保持麵條溫度從而令保持沾汁溫度。但係, 缺乏冷水收縮一個工序,麵條亦有一段時間浸係湯內,麵條嚼勁會相對下降,有違沾麵最重視既麵條質素。大家唯有視乎當日天氣溫度,個人喜好,湯底等等因素作出取捨。

扯遠左少少,返正題,TETSU用左自家研製「TETSU-102」,店內介紹為混合烏冬用麵粉及麵包用麵粉而成。夾起,直得黎又有小小彎曲,目測粗度同烏冬接近,掛湯度上升;放入口,濃郁既沾汁跟著粗麵條流入口內再直入喉嚨。雖然點左熱麵,嚼勁仍然在接受範圍內。暴風式吸入!

TETSU-102 麵條

TETSU-102 麵條

TETSU 叉燒
有別於一般拉麵鋪,TETSU叉燒並唔係切片,而選擇切條,增加口感。咬啖,軟腍入味,瘦中帶點肥肉,同我一樣,我幾鍾意

TETSU叉燒

TETSU叉燒


半熟付味蛋

半熟付味蛋係我每次到拉麵鋪必食既單品。唔,簡單黎講,入味度同流心度都唔錯,我嫌蛋香不足,不過都係水準之作。

半熟付味蛋

半熟付味蛋

TETSU 熱石沾湯

食完沾麵啦未完嫁,仲有最後一步「飲湯」,咁要點做呢?

  1. 首先加入鰹魚湯到沾湯內,份量隨個人喜好而定。我就喜重口味,落小小就收手;
  2. 跟手將湯匙放係小碟上,問職員拎呢粒「熱石」,佢會夾起熱石放係湯匙上,同教你點做;
  3. 慢慢將裝有熱石既湯匙放入湯內,神奇既事情就咁發生啦;
  4. 大功告成,品嘗美味既湯暖身啦!
TETSU熱石

TETSU熱石

我真係飲哂食碗湯嫁!

Untitled-1

File_006

Untitled-1

讚好「潮童焗飯」Facebook專頁,收受最新既資訊:

餐廳資訊:
つけめん TETSU
電話:2172 6433
營業時間:星期一至日: 11:30-23:00 (最後落單時間:22:30)
地址:銅鑼灣堅拿道西23號地舖

潮童焗飯

透過食物,我們能認識世界 透過攝影,我們能了解他人

More Posts - Website

Follow Me:
Facebook

高人指點

comments